Read Simte SILBAWLTE 5 Bible Online

SILBAWLTE 5 - Simte bible

SILBAWLTE 5

¹Hizongleh, mi khat a min Anania in, a ji Saphira toh a neih uh a zuah va,

²Huleh, a ji heet in a man khenkhat a iimta a, huleh, khenkhat hung tawi in sawllehte keeng bul ah a koih hi.

³Hizongleh Peter in, Anania, Hagau Siangthou heem diing leh, gam man khenkhat iim diingin, bang diinga setan in na lungsim sudim ahiai?

⁴A um sungsiah nang a hi zing lou ahiai mah? na zuah nungin zong na thuthu in a um sih eimah? bang diinga hi thute na lungtang a ngaihtuah? mihing heem na hi sih a, Pathian heem na hi zaw, a chi a.

⁵Huleh, Anania in hu thu a jah tahin a puuh a, a sita a; huleh, hu thu ja zousiah chu a lau mahmahta uhi.

⁶Huleh, tangvalte’n a thou va, a tuam va, a zawngdoh va, a vuita uhi.

⁷Huleh, daahkal thum diing vel nungin, a ji, sil umdan he loupi in ahung luut a.

⁸Huin, Peter in a kawmah, Hung hilh in, gam hizat chauh in ahi maw na zuah uh? a chi a. Huleh, ama’n, Hi, hizat chauh in ahi, a chi a.

⁹Huin, Peter in a kawmah, Bang diinga Lalpa Hagau ze-et diing a kithutuah na hi viai? ngai in, na pasal vuite keeng kotkhaah bul ah ahung umta, nang zong ahung zawngdoh diing uh, a chi a.

¹⁰Huin, thakhat in a keeng bul ah a puuhpah a, a sita hi; huin, tangvalte ahung luut va, amahnu chu si in ahung mu va, a zawngdoh va, a pasal kawmah a vuita uhi.

¹¹Huin, kouhtuam zousiah leh hu thu ja pouhmahte’n a lau mahmah uhi.

¹²Huleh, Pathian in sawllehte khut in mi lahah chiamchihna leh silmah tamtah a bawl jel hi; (Huin amahuh a bawnun lungsim mun khat in Solomon innliim ah a um uhi.

¹³Huleh, midang kuamah a lahvah a tel ngamta sih uhi; hizongleh mite’n amahuh a paahta ngal uhi.

¹⁴Gingthah numei leh pasal tampi tah Lalpa kawmah ahung kibehlap deuhdeuh uhi).

¹⁵Huchi'n mi damloute hung pui in, lupnate bang, talaaite bangah, kotzing vai ah a lumsah va, Peter a chiah kawma, a liim in khenkhat beeh a liah theihna diingin, a chi va.

¹⁶Huleh, Jerusalem kiima khuate akipat mipite zong damloute leh dawiniin suhgimte hung puiin ahung khawm va; hute zong ahung dam vehta uhi.

¹⁷Huin, siampu lal leh a lawite zousiah a hung va, (hu a lawite chu Sadukai pawl ahi uh) a thangse mahmah va,

¹⁸Huleh sawllehte chu a man va, vaantaang khumna ah a khumta uhi

¹⁹Hizongleh, Lalpa angel in jan in suangkul kotkhaahte hung hong in amahuh a puidoh a,

²⁰Pathian biahinn ah va ding unla, mi kawmah hi hinna thu zousiah va soi un, a chi a.

²¹Huleh, hu thu a jahun jingkal matahin Pathian biahinn ah a va luut va, thu a va hilh uh. Hizongleh, siampu lal leh a lawite a hung va, vaihawmte leh Israel suan upate tengteng a koukhawm va, sawllehte va pui diingin suangkul ah mi a sawl uhi.

²²Hizongleh, houtute a va chiah va, suangkul ah amahuh a va muta sih va, ahung kiihkiit uhi.

²³Suangkul bittaha kikhaah in leh a veengtute zong kotkhaah bula ding in ka mu ngal va, hizongleh ka hon uleh a sungah kuamah ka mu sih uh, chi'n a soi hi.

²⁴Pathian biahinn houtu leh siampulalte’n hu thute a theih un hi-hi bang chiphet in ahung thangta de aw, chi'n, a thu ah a mangbang mahmah va.

²⁵Huin, mi khat a hung a, a kawmvah, ngai un suangkul a na mikhumte un Pathian biahinn ah dingin mi a hilh uh, chi'n ahung soi a.

²⁶Huchi’n houtupa chu upate toh a va chiah va, vantaang a lau jiahun bawlse louin ahung pui va, huchilou hileh suang in ana sep diing uh.

²⁷Huleh, amahuh ahung puitung phetun, vaihawmte ma ah a dingsah va; huin siampulal in a kawmvah,

²⁸Hi min a thuhilh kiitta lou diingin thu khauhtahin ka hung peta uh hilou maw? he un, na thuhilh un Jerusalem khua na sudim vehta uh, huleh hi mipa sisan hung khuhsah tum na hi uh, chi'n a dong a.

²⁹Huin, Peter leh sawlleh dangte’n, Mihing thu sangin Pathian thu ka man zawh diing uh ahi.

³⁰Jesu, nangun singa na khai va na suhluppa uh, i pulepate Pathian in a kaithouta hi.

³¹Amah ngei chu Pathian in Kumpipa leh Hundampa a um diingin a jiatlam ah a hihlianta a, Israelte kawma kisiih a lungheina leh sual ngaihdamna pe diingin.

³²Huleh, keiuh hi thute heetpihtute ka hi uh; huchimahbangin Hagau Siangthou, Pathian in a thu jui photmahte kawma a piah taah zong heetpihtu ahi nalai hi, a chi va, a dawng uh.

³³Huleh, amahun hu thu a jahun a sin uh a khoih mahmah a, suhlup a tumta uhi.

³⁴Huin, vaihawmtute lahah mi khat a min Gamaliel, Pharisai, daan siam mi zousiah laha minthangtah khat ahung ding a, hu sawllehte chu puidoh tadih diingin thu a pia a.

³⁵Huin, a kawmvah, Nanguh Israel mite aw, hi mite tunga na sil bawl guat uh pilvaang un,

³⁶Tuma in zong, Theoda, milian ka hi chi'n ahung um a; hupa kawmah chu mi tamtah, zali vel ana um va; amah chu suhlup in a umta a; huleh a thu na jui photmah a bawnun a dalhjahta va, bangmah ahita sih uhi.

³⁷Hupa nungin mingelh laiin, Galili gam mi Juda ahung um kiitta, huleh, a kawmah mi tamtah a hiip a; hizongleh amah zong a sita a; huleh, a thu juite zousiah zong a dalhjahta uhi.

³⁸Huchi'n, tuin ka hung hilh ahi, hi mite khoih dah unla, huchi'n um mai uheh. Hi a siltup uh leh a silbawl uh mihing akipan ahih inchu ahung mang diing hi;

³⁹Ahihvangin, Pathian bawldoh ahih inchu, amahuh na sumang thei sih diing uh, huchilouin zaw Pathian dou na hi zenzenkha diing uhi, a chi a.

⁴⁰Huleh, a soi chu lem a sata va; huchi'n sawllehte chu a kou va, a jep va, a jep zohun, Jesu min a thu soi kiit hetlou diingin thu a pia va, a hahta uhi.

⁴¹Huleh, amahuh chu vaihawmte lah apatin a pawtkhia va, hu min jiaha zumna thuaah taah a guat ahih jiahun a kipaah mahmah uhi.

⁴²Huleh, ni chinin Pathian biahinn leh inn chinah Jesu chu Khrist ahi chia thu hilh leh soi a tawp sih uhi.