Read Simte SILBAWLTE 6 Bible Online

SILBAWLTE 6 - Simte bible

SILBAWLTE 6

¹Huleh, hulaia nungjuite a punpun laiun, a nichin sil hawm vah a meithaite uh a ngaihsah louh veu jiahun, Grik haam zang Judate chu Hebraite tungah a phunta va.

²Huin, sawmlehnihte’n nungjui mipite a kou va, Pathian thusoi tawpsan a dohkaan a neeh diing nna ka toh unchu a hoih sih diing hi.

³Hujiahin, unaute, na lahva Hagau Siangthou leh pilna a dim, mi min hoih ngen sagih teel un, amahuh chu hi sil ngaihtuahin i bawl diing uh.

⁴Keiuh chu haamtei leh thunatong in ka um zom zing zaw diing uh, a chi va.

⁵Huleh, hu thu in mi zousiah a kipaahsah a; huchi'n Stephen, ginna leh Hagau Siangthou a dim toh, Philip toh, Prokora toh, Nikanor toh, Timon toh, Parmena toh, Judate biahdan jui, Antiok khua a mi Nikola toh a teel va;

⁶Amahuh chu sawllehte ma ah a dingsah va, a haamtei zohun a tungvah a khut uh a nga uhi.

⁷Huleh, Pathian thu ahung dalh a; Jerusalem khua ah nungjuite a pungta mahmah uhi; huleh siampute lahah zong mi tamtah ginna lam ah a thumangta uhi.

⁸Huleh, Stephen, ginna leh silbawltheihna a dim in mi lahah silmah leh chiamchihna loupitahte a bawl veu hi.

⁹Huin, Libertinete, Cyrenia khua ate, Alexandria khua a mite kikhopna a chih va mi khenkhat leh Silisia gam a leh Asia gam a te kikhopna a mi khenkhatte ahung kisa va, Stephen ahung kinialpih uhi.

¹⁰Hizongleh, a pilna leh a soipihtu Hagau chu a nialkhe theita sih uhi.

¹¹Huin, mite a chiilgu va, hute’n chu, Mosi leh Pathian a soisiat ka ja uh, a chi va.

¹²Huleh, mite, upate, lehkhagialtute a chiilsia va, Stephen chu a sual va, a man va, vaihawmtute kawmah, a pui uhi.

¹³Huleh, heetpihtu dihloute a bawl va, hute’n chu, Hipa’n hi mun siangthou leh daan a soise zingzing hi.

¹⁴Ajiahchu hi Nazareth Jesu’n hi mun siangthou a suse diing a, Mosi in daan ahung piahte a sudanglam diing chi a, a soi ka ja uh, a chi va.

¹⁵Huin, vaihawmna a pute zousiah in Stephen a ensaal chiat va, a meel chu angel meel bangin a mu uhi.