Read Simte SILBAWLTE 7 Bible Online

SILBAWLTE 7 - Simte bible

SILBAWLTE 7

¹Huin, siampulal in, hi thute a dihna eimah? a chi a.

²Huin, Stephen in, Mite, unaute leh pate, ngai un; I pu uh Abraham, Haran khua a a um ma a, Mesopotamia gam a a um laiin, Loupina Pathian, chu a kawmah ahung kilaah a,

³A kawmah, Na gam akipat leh na chite lah apat pawt inla, gam ka hung etsah diing lamah hung pai in, a chi a.

⁴Huin, amah chu Kaldaite gam a kipat a paikhia a, Haran ah a va umta hi; huleh a pa a sih nungin Pathian in hu apatin, hi tua na teenna gam vah a peem luutsahta hi.

⁵Huleh, hi-ah chu mun luah diing bangmah, a keeng ngahna diing khop zong a pe sih a; hizongleh, amah leh a nunga a suante tanphaa gou diingin piah a chiam hi, ta a neih ma pehin.

⁶Huleh, Pathian in hichibangin a soi hi; A suante mi gam ah a taam diing va, suaah in a khawi diing va, huleh kum za li a bawl genthei diing uh.

⁷Huleh, Pathian in suaah a, a umna diing uh nam chu Keima’n ka ngaihtuah diing a, huzoh chiangin ahung pawt diing va, hi munah ka na a tong diing uh, a chi hi.

⁸Huleh, Pathian in a kawmah zehtan thuhun a pia hi; huchi’n Abraham in Isaak ahung hing a, huleh, a ni giat niin a zeh a tan a; huleh Isaak in Jakob ahung hing a; huleh Jakob in chihaahtu sawm leh nihte ahung hing hi.

⁹Huleh, chihaahtute chu thangsiatna a hung dim in Joseph chu Aigupta gam lamah a zuah va; hizongleh, Pathian a kawmah a um a.

¹⁰A gimthuaahnate zousiah apat a hundoh jel a, Aigupta gam kumpipa Pharaoh aang sungah deihsahna leh pilna a pia a; huchi'n amah chu Aigupta gam leh a inn a mi zousiah tungah houtu in a bawlta hi.

¹¹Huin, Aigupta leh Kanan gam zousiah ah kial ahung tunga, gimthuaahna nasatah ahung umta a; i pulepate un neeh diing mawngmawng a muta sih uhi.

¹²Hizongleh, Jakob in Aigupta gam ah buh a um chih a jah tahin i pute uh a sawldoh a, huchu a chiah patna masapen uh ahi.

¹³Huleh, a nihvei chiahna vah, Joseph chu a unaute a kihesah a; huleh, Joseph unaute chu Pharaoh a hesahta uhi.

¹⁴Huin, Joseph in a pa Jakob leh a unaute zousiah a kousah a; a bawnun sawmsagih leh nga ahi uh.

¹⁵Huchi'n, Jakob chu Aigupta gam ah a chiahsuh a, huleh, amah leh i pute uh a sita va,

¹⁶Huleh a luang uh Sikem khua a potungva, Abraham in Sikem khua a Emmor tapate laha dangka sum a, a lei, haanah a vuita uhi.

¹⁷Hizongleh, Pathian in Abraham kawma a thuchiam a tun hun ahung nai tahin, hu mite chu Aigupta gam ah hung pungin ahung tam deuhdeuhta va.

¹⁸Joseph he lou kumpipa dang ahung um masiahin.

¹⁹Hu mi’n i chite a a zeheem a, i pulepate uh a suduhdah a, a naungeehte uh hing lou diingin a paidohsah veu hi.

²⁰Hulaiin Mosi ahung piang a, a meel a hoih mahmah a, a pa inn ah ha thum a vaah va.

²¹Huleh, amah a paihdoh un, Pharaoh tanu in a la a, amah tapa diingin a vaahta hi.

²²Huleh, Mosi chu Aigupta gam mite pilna zousiah a hilh va, huchi'n, thu leh silbawl ah a loupi mahmah hi.

²³Huleh, ama’n chu kum sawmli ahung hihin, a unau, Israel haahte chu kan ahung utta a.

²⁴Huleh, a lahva mi khat dihloutaha suhgima um a mu a, a hun a, suhduhdah a umpa phuba a laahsah a, Aiguptami chu a sulum hi.

²⁵Ajiahchu ama’n amah khut in Pathian in amahuh hundoh diing ahi, chih a unaute’n he diing a sa a; hizongleh, amahun a he sih uhi.

²⁶Huleh, a jingin a lahva mi nih a kisual laiun a kawm uh ahung tunga, Pute, unau na vevua; bang diinga dihloutaha kibawl na hi viai? chi'n lep a tum a.

²⁷Hizongleh, a innveengpa tunga sil gilou bawl zawpa in Mosi chu a sawndoh, a, Kuan nang ka tungva houtu diing leh vaihawm diingin ahung bawl ei?

²⁸Jaanni a Aiguptami na thah banga, hung thah tum na hi maw? a chi a.

²⁹Huin, hi thu jiahin Mosi chu a taimangta a, Midian gam ah a taamta a, huah chu tapa nih a va nei hi.

³⁰Huleh, kum sawmli a bei nungin, Sinai taang gamdai ah, sawlbawh a mei kuang lahah, Lalpa angel khat a kawmah ahung kilaah a.

³¹Mosi’n hi a muh in a silmuh chu limdang a sa a; en diing a ava naih laiin, Lalpa aw in a kawmah,

³²Kei, na pulepate Pathian chu ka hi, Abraham Pathian, Isaak Pathian, Jakob Pathian, a chi a. Huin, Mosi chu a kithing a, a en ngamta sih hi.

³³Huin, Lalpa’n a kawmah, Na keeng apat na keengtophah suut in; ajiahchu na dinna mun lei siangthou ahi.

³⁴Aigupta gam a ka mi umte gentheihdan chu chiantahin ka mu zing ahi, huleh, a thuum uh zong ka zata a, amahuh hundoh diing a hungsuh ka hi. Hungin Aigupta gam ah ka hung sawl diing, a chi a.

³⁵Hi Mosi, houtu leh vaihawmtu diingin kuan ahung bawl ei? chi a, a huat uh chu, sawlbawh laha a kawma hung kilaah angel kithuahpihsah in, Pathian in amah ngei chu houtu leh hundohtu hikhawm diingin a sawlta hi.

³⁶Ama’n chu Aigupta gam ahte, Tuipi san ahte, huleh gamdai ahte kum sawmli sung silmah leh chiamchihnate a muhsah nungin, amahuh a puidohta hi.

³⁷Israel suante kawma, Lalpa na Pathian un keimah ahung bawl bangin na unaute laha mi zawlnei khat ahung bawlsah diing a, amah thu na ngaikhe diing uh, chitu hu Mosi chu hih ahi.

³⁸Sinai taanga amah toh kihou angel leh i pulepate toh gamdai a kouhtuamte laha um, i kawma piahsawn diing a thu hingte latu chu hipa ahi.

³⁹I pulepate’n a thu a jui ut sih va, a hua va, huleh Aigupta gam a lunggulh kiit va,

⁴⁰Aaron kawmah, I ma pui diingin pathiante hung bawlsah in, ajiahchu hi Mosi Aigupta gam a hung puidohpa laha tanchin ka he nawnta sih uh, a chi uh.

⁴¹Huleh, hulaiin bawngnou lim a bawl va, a lim chu gan that in a bia va, huleh amahuh khutsuaah tungah a nuamta uhi.

⁴²Huin, Pathian in a kiheisan a, vaan a aahsite a biah theihna diingun, amahuh a nuseta hi; zawlneite lehkhabu a, Israel chite aw, gamdai ah kum sawmli sungin sa leh gan that in kei na hung bia ngei uh maw?

⁴³Moloch biahbuuh (puan inn) leh na pathian uh Remphan aahsi zong biah diing a, a lim na bawlte uh, na zawng zaw veu va; huleh, ke’n nanguh Babylon khawkhen lamah ka hung puimang diing, chih gelh bangin.

⁴⁴A lim a muh banga bawl diing a Mosi hilh tu’n a guat bangin, i pulepate un hu gamdai ah heetsahna biahbuuh (puan inn) a nei va.

⁴⁵Humah chu, i pulepate haah sawnte’n Pathian in i pulepate ma-a Jentel a delhdohte gam a luah laiun, Joshua luut gualin a luutpih va; David hung umtanphain huah chu a um zingta hi.

⁴⁶Hu David in chu Pathian mitmuh in deihsahna a mu a, Jakob Pathian diingin biahbuuh bawlsah a ut a.

⁴⁷Hizongleh, Solomon in hu inn chu a bawl zawta hi.

⁴⁸Ahihvangin, Tungnungpen chu khuta bawl inn bangah a um sih hi; zawlnei in,

⁴⁹Lalpa’n, Vaan ka touphah ahi a, lei ka keeng ngahna ahi; inn bang chi bangin na hung bawlsah diing viai? Ka khawlna mun zong bang ahiai?

⁵⁰Ka khut in hi sil zousiah a bawl hi lou amaw? a chi hi, chi a, a soi bangin.

⁵¹Mi chihmoh, lungtang leh bil jehtan louhte haw, Hagau Siangthou na doudaal zing uhi; na pulepate uh bawl bangin na bawl zing uhi.

⁵²Na pulepate un zawlneite laha kua ahiai a suhduhdah louh uh um? huleh Mi dihtah hung diing thu soilawhte chu a sulum va; hu Midihtah mansahtu leh thattute tuin, nanguh ngei na hi uhi.

⁵³Daan angelte piahsawn munapi a jui tuanloute aw, a chi hi.

⁵⁴Hi thute a jah tahun a sin uh a khoih a, Stephen chu ha a gial khum va.

⁵⁵Hizongleh, amah chu Hagau Siangthou a dim in vaanlam a ensaal a Pathian loupina leh Pathian jiatlam a Jesu ding a mu a.

⁵⁶Ngai un, vaan kihong a, huleh, Pathian jiatlam a mihing Tapa ding zong ka mu hi, a chi a.

⁵⁷Huin amahuh chu aw ngaihtahin a kikou va, a bil uh a huum va, thakhata pang in a noh uh a;

⁵⁸Huleh, khua apatin a delhdoh va, suang in a sep va, huleh a heetpihtute’n tangval khat a min Saul keeng bul ah a puante uh a koih uhi.

⁵⁹Huleh, Stephen in, Lalpa Jesu ka hagau la in, chi a Pathian a kouh laiin suang in a sep souhsouh uhi.

⁶⁰Huleh, amah chu a khupdin a, aw ngaihtahin a kikou a, Lalpa, hih a sualna uh a tungvah mohposah sin, a chi a. Huleh, hi thu a soi zohin a ihmuta hi.