Read Simte SILBAWLTE 8 Bible Online

SILBAWLTE 8 - Simte bible

SILBAWLTE 8

¹Huleh, Saul in zong Stephen sih chu lem a sa hi. Hu hun laiin Jerusalem khua a kouhtuam umte chu nasatahin a sawi panta va; huchi'n sawllehte chauh loungal chu Judia leh Samaria gam khochinah a dalhjah vehta uhi.

²Huleh, Pathian ngaihsah kuate aha in Stephen chu a vui va, nasatahin a suun uhi.

³Saul in ahihleh, kouhtuam pawlte a suduhdah mahmah a, inn chinah a luut a, numei pasal a kaidoh a, suangkul ah a khum hi.

⁴Huleh a dalhjahte chu khochin ah a chiah va thu a soita uhi.

⁵Huin, Philip chu Samaria khopi ah a chiahsuh a, a kawmvah Khrist thu a soi hi.

⁶Huleh, a silmah bawlte a jah va, a muh un mipite’n Philip thusoi chu lungsim munkhat in a ngaihsah uhi.

⁷Dawiniinte, aw ngaihtaha kikou a, mi tampi a matte uh sunga kipat ahung pawt va; huleh zeng leh keengbaai tamtahte zong ahung damtaah jiahun;

⁸Huleh, hu khopi ah kipaahna nasatah a umta hi.

⁹Hizongleh, a min Simon kichi mi khat a um a, ama’n chu, milian ka hi chi'n, tum a la min hu khopi ah mitphialdawi zang in Samarimite limdangsatahin a koih veu a.

¹⁰Mi zousiah in, a neupen apat a lianpen tanphain, Hi mi hi Pathian silbawltheihna loupi a chih uh ahi, chi'n a thu a ngaihsah veu uh.

¹¹Huleh, mitphialdawi a hun sawttah limdangsataha ana koih taah jiahin a thu a ngaihsah uhi.

¹²Hizongleh, amahun chu Pathian gam leh Jesu Khrist Tanchinpha, Philip soi a gintaat un, a numei a pasal in baptisma a tangta uhi.

¹³Huin, Simon nasanin zong ahung gingta a; huleh, baptisma a tan nungin, Philip kawmah a um zing a, chiamchihna leh silmah nasatah kibawlte muin, limdang a sa thei mahmah hi.

¹⁴Huin, sawlleh Jerusalem khua a umte’n, Samarite’n Pathian thu a awita uh chih a heet un, a kawmvah Peter leh John a sawl va.

¹⁵Hu mite chu a va tunsuh un Hagau Siangthou a tan theihna diingun a haamteisah va;

¹⁶Hu ma in chu a lahva kuamah tungah a tung nai sih hi; Lalpa Jesu min a baptisma tang chauh ahi nalai uhi.

¹⁷Huin, sawllehte’n a tungvah a khut uh a nga va, Hagau Siangthou a tangta uhi.

¹⁸Huleh, Simon in sawllehte khut ngah jiaha, Hagau Siangthou piah ahi chih a muh in.

¹⁹Hitobang thuneihna hung pe ve un, kua tungah hizongleh khut ka ngahna phot in Hagau Siangthou a muh vena diingun, chi'n sum piah a tum a.

²⁰Hizongleh, Peter in a kawmah, Na sum nangmah toh mangkhawm heh, Pathian silpiah dangka sum a lei na tup jiahin.

²¹Hi thu ah tellah na tel sih a, tan zong na nei ngal sih hi, na lungtang Pathian muh a, a dih louh jiahin.

²²Hujiahin na mohna kisiih inla, Pathian kawmah haamtei in, huchi'n na lungtang a na ngaihtuah hi ahung ngaidamkhamoh sih diing.

²³Ajiahchu sil khaatna sinkha ah leh, bohsiatna kaan gawmna ah na um hi, chih ka he hi, a chi a.

²⁴Huin, Simon in a dawng a, Na sil soite uh bangmah ka tunga a tun louhna diingin nangun Lalpa kawmah hung haamteisah un, a chi a.

²⁵Huin, amahun Lalpa thu chu a heetsah leh a soi zoh nungun, Jerusalem khua ah a chiah kiitta va, Samarite kho tamtah ah Tanchinpha a soita uhi.

²⁶Huleh, Lalpa angel in Philip a houpih a, Thou inla, simlama Jerusalem khua akipan a Gaza kho sunsuh lampi, hu gamdai ah chiah in, a chi a.

²⁷Huleh, amah chu thou in a chiahta a; huleh, ngaidih, Ethiopia gam a mi khat, Ethiopia kumpinu Kandake nuaia michilgeh lal tah, a gou zousiah koltu chu Jerusalem khua ah Pathian be diingin a va chiah a.

²⁸Ahung pai kiit lam in a kaangtalai a toukawm in zawlnei Isaiah lehkhabu a sim hi.

²⁹Huin, Hagau in Philip kawmah, Hu kaangtalai va naih inla, va kithuahpih in, a chi a.

³⁰Huin, Philip chu a kawmah a va tai a, zawlnei Isaiah lehkhabu a sim a ja a, Na sim chu na theisiam nai? a chi a.

³¹Huleh, ama’n chu, Kuamah hung hilhchet louhin bang ka chi theihsiam diai? a chi a. Huleh, Philip chu kaldohtou a, a kawma tou diingin a zawn a.

³²Pathian lehkhabu a simna mun chu hih ahi, Thah diing belaam bangin Amah chu a pui va; huleh belaamnou a mulmeettu ma a, a sip khiinkhian bangin, Ama’n zong a kam a keeh sih;

³³A thunuaigolh laiin a tunga thudih soina laahmang ahi a; a haahte tanchin kuan ahiai hung soi diing? Leitung akipanin a hinna laahsah ahi ngal a, chih.

³⁴Huleh, michilgeh in Philip a houpih a, a kawmah, Ka hung ngen hi, hi thu hi zawlnei in kua thu a soina ahiai? amah thu ahiai, mi dang thu? a chi a.

³⁵Huin, Philip in a kam a kaah a, hu Pathian lehkhathu ngei apanin a kawmah Jesu thu a soita hi.

³⁶Huleh, lampi a, a pai laiun tui umna mun khat ahung tungva; huleh michilgeh in, Endua, hi ah tui um, baptisma ka tanna diing bangin ahung daal ei? a chi a.

³⁷Huin, Philip in, Na lungtang zousiaha na gintaat leh, na tang thei hi, a chi a. Huleh, ama’n a dawng a, Jesu Khrist chu Pathian Tapa ahi chih ka gingta hi, a chi a.

³⁸Huin, kaangtalai chu a khawlsah a; a nih un, Philip leh michilgeh chu tui lahah a chiahsuhkhawm va; huin, Philip in amah chu a baptista hi.

³⁹Huleh, tui apat a paidohtouh phet un, Lalpa Hagau in Philip chu a la mangta a, michilgeh in chu a mu kiitta sih hi; huleh, a lampi ah nuamtahin a pai jelta hi.

⁴⁰Hizongleh, Philip chu Azota khua ah a mu kiitta va; huleh, paisuaah pehin Caesarea khua a tun masiah khochin ah Tanchinpha chu a soita hi.