Read Simte SILBAWLTE 9 Bible Online

SILBAWLTE 9 - Simte bible

SILBAWLTE 9

¹Huleh, Saul chu Lalpa nungjuite a vau thu leh, thah a tup thu sekhe kawmin, siampu lal kawmah a va chiah a,

²Huleh, Damaska khua a kikhopna innte a diingin lehkha a ngen a, hilama mi kuapouh, pasal hiin numei hitaleh uh a muhmuh kaansa a Jerusalem khua a ahung pui theihna diingin.

³Huleh, a zin a; Damaska khua kawm ahung tunga; huleh thakhat in vaan akipanin vaah a kiim ah ahung taang hi;

⁴Huin, lei ah a puuh a, Saul, Saul, nang bang diinga hung suduhdah na hiai? chih aw a ja a.

⁵Huin, ama’n, Lalpa, kua na hiai? a chi a. Huin, Lalpa’n, Jesu na suhduhdahpa chu ka hi; vuaahna siihzum peeh zing nang di’n a hahsa hi, a chi a.

⁶Huleh, ama’n kithing kawm leh limdangsatahin, Lalpa, bang bawl diingin na hung deih ei? a chi a. Huin, Lalpa’n a kawmah, Thou inla khopi sungah luut in, huchi'n na bawl diing ahung na hilh diing uh, a chi a.

⁷Huleh, amah toh zinkhawmte chu soi diing beiin a ding va, aw chu a ja va, hizongleh kuamah a mu sih uhi.

⁸Huin, Saul chu lei a kipanin a thou a; huleh, ahung hah a, hizongleh bangmah a muthei sih a; huchi'n a khut in a kai va, Damaska khua ah a puiluut uhi.

⁹Huleh, ni thum kho mu louin a um a, bangmah a nein a dawn sih hi.

¹⁰Huleh, Damaska ah a min Anania kichi nungjui khat a um a; Lalpa’n manglam bangin a kawmah, Anania, a chi a. Huleh, ama’n, En in Lalpa, hi ah ka um hi, a chi a.

¹¹Huleh, Lalpa’n a kawmah, Thou inla, kotzing-tang a chih vah chiah inla, huleh, Juda inn a um, Tarsa khua a mi, a min Saul kichi kandohin; ajiahchu, ngai in, a haamtei laitah ahi.

¹²Huleh, manglam bangin, mi khat a min Anania kichi luut a, a mit suvaah diing a a tunga khut nga in a muta hi, a chi a.

¹³Huin, Anania in, Lalpa, hipa in Jerusalem khua a na misiangthoute tunga sil hoihlou a bawl dante mi tampi kam ah ka ja hi.

¹⁴Huleh, Hi ah zong na min lou zousiahte kaanna diingin siampu lalte kawma kipanin thu a mu hi, a chi a.

¹⁵Hizongleh, Lalpa’n a kawmah, Chiah mai in, ajiahchu amah hi jentelte leh kumpipate leh Israeltate kawma ka min poluuttu diing a ka beel teel ahi.

¹⁶Ajiahchu ka min vangin gimna bangchi banga nasa aha a thuaah diing, a kawma theisah diing ka hi, a chi a.

¹⁷Huin, Anania chu a va chiah a, inn ah a luut a; a tunga a khut nga in, Unau Saul, na mit vaahna diing leh, Hagau Siangthou a na dim theihna diingin, Lalpa, na hungna lampi a na kawma kilaah Jesu ngeiin, ahung sawl ahi, a chi a.

¹⁸Huleh, thakhat in a mit apat phulipte bang a kepah a; huleh, a mit ahung vaah a, huin, a thou a, baptisma a tangta hi.

¹⁹Huleh, an a ne a, a halhta hi. Huin, Saul chu Damaska a nungjui umte kawmah ni bangzah aha a um a.

²⁰Huleh, kikhopna innte haw ah Jesu chu Pathian Tapa a hihdan thu a taangkoupih pai ngal hi.

²¹Huleh, a thu jate zousiah in limdang a sa mahmah va, Hi pa Jerusalem khua a, Hi min loute suduhdah veupa hilou amaw, huleh, kaansa a siampu lalte kawma pui tum a hi-a hung hilou maw? a chi va.

²²Hizongleh, Saul chu ahung haat sem a, Hi mi chu Khrist ahi tahtah hi chih hilhchian in, Damaska khua a Juda umte chu a ngaihna he lou in a koih hi.

²³Huleh, ni tamtah nungin, amah thah tum in Judate a kihou va;

²⁴Hizongleh, Saul in a siltup uh ana he a. Huleh, amahun amah thah tum in kulh kotkhaah suun leh jan in a taang uh.

²⁵Huin, nungjuite’n amah chu janin a pui va, kulh baangah bawmin a khaikheta uhi.

²⁶Huleh, Saul Jerusalem a tunin nungjuite kithuahpih a tum a; hizongleh, amahun nungjui ahih ve a gintaat louh jiahun, a lau mahmah uhi.

²⁷Hizongleh, Barnaba in amah a pui a, sawllehte kawmah ahung tonpih a, lampi a Lalpa a muh a, a houpihdan bang, huleh, Damaska khua a Jesu min a haangsantaha thu a soidante bang a soita a.

²⁸Huchi'n, amah chu Jerusalem khua ah a kawmvah luut jel pawt jelin a umta a.

²⁹Lalpa Jesu minin haangsantahin thu a soi a, huleh, Grik-Judate a nial a; hizongleh, amahun amah thah a tum uhi.

³⁰Huchu, unaute’n a heettah un, Caesarea khua ah a puisuh va, Tarsa khua ah a sawlmangta uhi.

³¹Huin, kouhtuamte chu Judia gam vel, Galili gam vel, Samaria gam vel ah a det deuhdeuh va; muangtahin a umta uhi, huleh, Lalpa laudan siam in, Hagau Siangthou hamuan in a um va, ahung pung deuhdeuhta uhi.

³²Huleh, hichi ahung hi a, Peter chu amahuh laha vaah leh leh kawmin, Lidda khua a misiangthou umte kawma zong a chiahsuh a.

³³Huleh, hu ah a min Ainia kichi, a zeng jiaha kum giat lupna a lum zing khat a mu a.

³⁴Huleh, Peter in a kawmah, Ainia, Jesu Khrist in ahung sudam hi; thou inla, na puanphah jial in, a chi a. Huchi'n, amah chu a thoupah hi.

³⁵Huleh, Lidda leh Saron a umte zousiah in amah chu a mu va, Lalpa lam a ngata uhi. Tabitha (Dorka) sihna apat thohkiitna

³⁶Huleh, Joppa khua ah a min Tabitha kichi nungjui khat a um a, (Tabitha umzia chu Dorka ahi) hi numei in silbawl hoih leh silpiah a hau mahmah hi.

³⁷Huleh, hichi ahung hi a, hulaiin a chi ana a, a sita a; a sil zohun pindan tungnungah a lumsah uhi.

³⁸Huleh, Lidda khua chu Joppa kho kawm ahih jiahin, nungjuite’n Peter hu ah a um chih a ja va, sawt hal loua a kawmva hung diing a va ngen diingin, a kawmah mi nih a sawl va.

³⁹Huin, Peter chu a thou a, amahuh geel toh a kitonta a. Ahung tun in, amah chu pindan tungnung ah a pui va; huleh, meithai zousiah a kawma dingin, Dorka a kawmva a dam laia a puannaah bawlte a puan bawlte lah pum in a kap uhi.

⁴⁰Hizongleh, Peter in a bawnun a pawtsah a, a khupdin a, a haamteita a; huleh mi luang lam ngat in, Tabitha, thou in, a chi a. Huleh amahnu’n chu a mit ahung hah a; Peter a muh tahin ahung touta hi.

⁴¹Huleh, Peter in a khut a pia a, a kaithouta a, huleh, misiangthoute leh meithaite a kou a, dam in a peta hi.

⁴²Huleh, hu thu Joppa khua zousiah in a he veh va; huleh, mi tampi in Lalpa a gingta uhi.

⁴³Huleh, hichi ahung hi a, Peter chu Joppa khua ah savun bawlpa Simon inn ah ni tampi a taamta hi.