Read Simte ROMETE 10 Bible Online

ROMETE 10 - Simte bible

ROMETE 10

¹Unaute, Israelte diinga ka lungtang deihpen leh Pathian kawma ka haamteina pen chu, hutdama ahung um theihna diing uh ahi.

²Ajiahchu Pathian lamah phatuamngaihna a nei uh chih ka heetpih hi, ahihvangin heetna dungjuiin chu ahi sih uh.

³Bang jiahin ahiai i chih leh Pathian dihtatna he lou in, amahuh dihtatna suhkip tum in, Pathian dihtatna ah a kituluut nuam sih uhi.

⁴Ajiahchu a gingta photmahte diingin Khrist chu dihtatna muhna diingin daan suhtawpna ahi.

⁵Ajiahchu Mosi in, daan a dihtatna juitu chu hu dihtatna in a hing diing, chih a gial hi.

⁶Hizongleh ginna a dihtatna in chu hichi'n a chih hi, Na lungsim in, Vaan ah koi a kaltou diai? (huchu, tunglam apat Khrist puikhiah diing chihna ahi; )

⁷Ahihlouhleh, Lei nuaiah koi a kumsuh diai? (huchu, misi lah apat Khrist puidoh diing, chihna ahi;) chi sin, chi in.

⁸Hizongleh bang ahiai a soi? Thu in ahung naih hi, na kam leh na lungtang ah a um hi; huchu ginna thu ka soi uh chu ahi.

⁹Na kama Jesu chu Lalpa ahi chia na phuan a, misi laha kipan Pathian in a kaithou chih na lungtang a na gintaat leh hutdam in na um diing hi, chih.

¹⁰Bang jiahin ahiai i chih leh mi’n lungtang in a gingta va, dihtatna a mu veu uh; huleh ka min a phuang va, hutdamna a tang veu uhi.

¹¹Ajiahchu Pathian lehkhathu in, Koipouh amah gingta chu a zahtasah sih diing, a chih hi.

¹²Ajiahchu Judate leh Grikte kilimdanna bangmah a um sih hi; a bawnva tunga Lalpa chu khat ahi a, huleh amah kou zousiahte tungah hoihna a hau hi.

¹³Bang jiahin ahiai i chih leh Lalpa min kou photmah chu hutdam in a um diing uhi.

¹⁴Ahihleh a gintaat louhpi uh bangchi’n a min a kou diviai? huleh a thu a jah louhpi uh bangchi’n a gingta diviai? huleh a soitu um louin bangchi’n a ja diviai?

¹⁵Huleh sawl ahih louh uleh bangchi’n thu a soi diviai? Ha muanna tanchinpha leh, silhoih kipaahhuai hung utte keeng kilawm hina e! chia gelh bangin.

¹⁶Hizongleh tanchinpha a bawnun a ngaikhe sih uhi. Ajiahchu Isaiah in, Lalpa ka thusoi uh kua’n ahiai gingta? ana chi hi.

¹⁷Huchi'n ginna chu jahna jiahin ahung um a, huleh jahna chu Pathian thu jiahin ahung um hi.

¹⁸Hizongleh ka chi ahi, Israelte’n a ja sih va ahiai mah? Ja tham e, a thawm uh leitung pumpi ah a thangsuaah a, a thu uh kawlmong tandongin a thangta hi.

¹⁹Hizongleh ka chi ahi, Israelte’n a he sih va ahiai mah? A masapenin Mosi in, Nam a soi thamlouhte zangin ka hung thangsesah diing a, huleh nam ngolte zangin ka hung sulungthah diing hi, ana chi hi.

²⁰Huleh Isaiah in, haangsantahin, Ahung hawlloute kawmah muhdohin ka um a; ahung kouloute kawmah suhlatin ka umta hi, a chi hi.

²¹Hizongleh Israelte kawmah chu, Mi thumangloute leh nialhaatte diingin suun nitum in ka baan ka jah hi, chi'n a soi hi.