Read Simte ROMETE 11 Bible Online

ROMETE 11 - Simte bible

ROMETE 11

¹Ahihleh Pathian in a mite paaikheta ahiai mah? Paaikhe lou hial. Bang jiahin ahiai i chih leh kei zong Israelmi, Abraham haah, Benjamin phung a mi ka hi.

²Pathian in a mi a heetlawhte a paaikhe sih hi. Pathian lehkhathu in, Elijah thu a soi na he sih viai mah? Ama’n Israelte tung thu Pathian kawmah a tut a,

³Lalpa na zawlneite a that va, na maitaamte a suchim va; huleh keimah tangin ka um a, kei zong thah ahung tum uhi, chi'n.

⁴Hizongleh Pathian in a dawnna’n bangchi’n a soi ei? Baal lim ma a khupdin ngei lou mi saang sagih keimah diingin ka kikoihheh hi, chih a dawng hi.

⁵Hutobangin tulaiin zong hehpihna a teel dungjuiin paihmawh honkhat a um nalai hi.

⁶Huleh hehpihna jiah ahih inchu, natoh jiah ahita sih hi; huchilou in chu hehpihna chu hehpihna ahita sih diing hi. Hizongleh natoh jiah ahih inchu, hehpihna ahita sih diing; huchilou inchu natoh zong natoh ahita sih diing hi.

⁷Ahihleh bangchi ahita diai? Israelte’n a hawl uh a mu sih va, hizongleh teelte’n chu a mu uh; a dang zousiah chu suhtawt in a umta uhi.

⁸Pathian in tuni dongin a kawmvah lusuhna hagau a pia a, a muhtheihlouhna diing uh mitte leh, a jah theihlouhna diing uh bilte toh, chih gelh bangin.

⁹Huleh David in, A dohkaan uh chu amahuh diingin thaang leh, pial leh, puuhna leh, phubalahna hung hi heh;

¹⁰A muhtheihlouhna diingun a mitte uh hung mial henla, huleh nangma’n a nunguh kuunsah zingin, a chih hi.

¹¹Ahihleh ka chi ahi, A kisuih uh a puuhdenna diinguh ahiai mah? Hilou hial. Hizongleh a puuh jiahun amahuh thangsiatsahna diingin Jentelte kawmah hutdamna ahung tung zawta hi.

¹²Huleh a puuh uh bawn khovel suhhauhsatna ahih a, huleh a kiamna uh zong Jentelte hauhsatna ahih inchu, a buchinna uh bangchi phet a hauhsatna ahita diai mah?

¹³Hizongleh nanguh Jentelte kawmah ka soi ahi, kei Jentelte sawlleh ka hih jiahin ka natohna ka paahtawi hi.

¹⁴Bangchizawng ahakhat a ka chipihte ka thangsiatsah a, a lahva khenkhatte beeh ka hutdam theih khaah leh chi'n.

¹⁵Bang jiahin ahiai i chih leh amahuh paihkhiahna bawn khovel toh kituah kiitna ahihleh, amahuh deihkiitna chu sihna apat hinkiitna loungal bang ahi diai?

¹⁶Ajiahchu a gah masa a sianthou inchu a lawmpi zong huchimahbangin a siangthou hi; huleh a zung a sianthou inchu a bate zong huchimahbangin a siangthou hi.

¹⁷Huleh a ba khenkhatte suhtana a um a, nang, olive tahlou a lahva phuhluut a na um leh, olive singa hoihna kikoppih na hih jiahin,

¹⁸Ba dangte tungah kiuangsah sin. Kiuangsah zonglechin a zung tawmtu nangmah na hi sih a, a zung chu nang hung tawmtu ahi zaw hi.

¹⁹Ahihleh nangin, Phuhluut a ka um theihna diingin bate suhtana um ahi, na chi ahi diing.

²⁰Ahi, a gintaat louh jiahun ahi suhtana a um uh, huleh nang na ginna jiahin na diing ahi. Kiuangsah sinla, lau zaw in.

²¹Bang jiahin ahiai i chih leh Pathian in ba tahte bawn a hawi louh inchu, nang zong ahung hawi tuam sih diing hi.

²²Hujiahin Pathian hoihdan leh thukhauhdan en in: a puuhte tungah a thukhauh ahi; nang lamah chu a hoih ahi, a hoihna a na um zing leh; huchi ahih louh inchu nang zong saatkhiahin na um ve diing hi.

²³Huleh amah u’zong gingta loua a um zing louh unchu, phuhluut in a um diing uhi; ajiahchu Pathian in amahuh a phutluut thei hi.

²⁴Ajiahchu nang, piandan a olive tahlou apat saatkhiah bawn piandan louh a olive sing hoih a phuhluut a na um leh; hi ba tahte chu amahuh olive sing ngei ah phuhluut in naah umsem na unchia?

²⁵Bang jiahin ahiai i chih leh unaute, na kipilsah louhna diingun, hi thuguuh, Jentelte bukimna ahung tun tokalin Israelte tungah heetsiamlouhna hunkhop chiang ahung tung tadih ahi, chih na heet louh uh ka deih sih hi.

²⁶Huchi'n Israel mi zousiah hutdam in a um diing uhi; Zion akipanin Hundampa ahung diing a, Jakob akipat Pathian ngaihsahlouhna a sumang diing hi.

²⁷Ajiahchu, A sualnate uh ka laahmang tahchianga a kawmva ka thuhun diing chu hikhu ahi, chih gelh bangin.

²⁸Tanchinpha lam ngaihtuahin chu nanguh jiahin meelma ahi va; hizongleh teel thu lam ngaihtuahin chu pulepate jiahin deihtahte ahi uhi.

²⁹Ajiahchu Pathian in a silthawnpiah ah leh a kouhna ah lungsim a kheel ngei sih hi.

³⁰Bang jiahin ahiai i chih leh nidang laiin Pathian na gingta sih va; hizongleh tuin chu amahuh awi louh jiahin khotuahna na muta uhi.

³¹Hutobangmahin nanguh ahung khotuahna jala khotuahna a muh theihna diingun, tuin hite’n zong gingta lou ahita uhi.

³²Ajiahchu Pathian in a khotuah veh theihna diingin, mi zousiah chu thumanlouhna nuaiah a khum vehta hi.

³³Aw Pathian pilna leh heetna thuuh hina lawmlawm e! A vaihawmnate bawl guallouh leh, a lampite muh guallouh hina meijen e!

³⁴Ajiahchu Lalpa lungsim kua’n ahiai he? Ahihlouhleh kua ahiai amah lemguatpihtu a pang ngei?

³⁵Ahihlouhleh a dit kiit diing a zong kua’n ahiai a kawma sil pe masa phot?

³⁶Bang jiahin ahiai i chih leh amaha kipan leh, amah jalin leh, amah diinga sil zousiah um ahi; amah kawmah kumtuang in loupina um hen. Amen.