Read Simte ROMETE 14 Bible Online

ROMETE 14 - Simte bible

ROMETE 14

¹Ginna a haat lou mi chu, a ginlahnate soisel lou in ngai un.

²Mi khat in bangkim ne theiin a kigingta a; mi haat louin chu antehlouhing chauh a ne hi.

³A nete’n a neloute simmoh sih henla; huleh a neloute’n zong a nete soisel sih heh; Ajiahchu Pathian in amah a kipaahpihta hi.

⁴Midang suaah soiseltu nang koi na hiai? a din leh a puuh a pu a diing ahi. Ahi, amah chu dinsah in a um diing hi; ajiahchu Pathian in amah a dingsah thei hi.

⁵Mi khat in ni khat chu ni dang sangin a ngai poimoh tuam a, midangin ni tengteng kibang chiatin a ngai hi. Mi chin amahuh lungsim chiat ah kihechian u’heh.

⁶Ni tangtu in Lalpa ah a tang a; huleh ni tangloutu in Lalpa ah a tanglou ahi. Bangkim netu in Pathian kawma kipaahthu a soi jiahin Lalpa ah a ne a; huleh a ne loutu in zong Pathian kawma kipaahthu soi in a ne lou ahi.

⁷Bang jiahin ahiai i chih leh koimah ei a diing a hing i hi sih a, huleh koimah ei a diing a si zong i hi sih uhi.

⁸Ajiahchu i hin, leh Lalpa a diingin i hing a; i sih, inzong Lalpa a diingin i si uh ahi; hujiahin i hin inzong, i sih inzong, Lalpa a i hi uhi.

⁹Bang jiahin ahiai i chih leh misite leh mihingte Lalpa ahihtheihna diingin Khrist chu a si a, a thou kiit a, huleh suhhing in a um ahi.

¹⁰Hizongleh nang bang diinga na unau soisel na hiai? ahihlouhleh nang bang diinga na unau simmoh na hiai? Ajiahchu i bawnva Khrist vaihawmna touphah mai a ding diing i hi uhi.

¹¹Bang jiahin ahiai i chih leh Lalpa’n, Mi zousiah ka ma ah a kuun diing a, lei chinteng zong Pathian kawmah a kiphuang diing uh, chi'n ka chiam hi, a chi; chin gelh ahi.

¹²Huchi'n i bawnun Pathian kawmah eimah tanchin chiat i soi diing uhi.

¹³Hujiahin khat leh khat i kisoisel nawn sih diing a, hizongleh koipouh in a unau kisuihna diing aha, ahihlouhleh kipuuhna diing bangmah bawl louhna diing ngaihtuah zaw hen.

¹⁴Sil amaha sianglou mawngmawng a um sih chih, Lalpa ah ka hechian a ka tahsang mahmah hi; hizongleh bang khat sianglou a ngaitu diingin, huchu amah diingin sianglou ahi.

¹⁵Hizongleh na bangkhat neeh jiaha na unau lungsim a nat inchu lungsiatna daan in na gamta lou ahi. A sih luang a Khrist in a sihsahpa chu na bangkhat neehin sumang sin.

¹⁶Huchi'n na hoihna uh chu gilou a soi in um sih hen.

¹⁷Bang jiahin ahiai i chih leh Pathian gam chu neeh leh dawn thu ahi sih a; himahleh dihtatnate, kilepnate, huleh Hagau Siangthou a kipaahna bang ahi zaw hi.

¹⁸Hujiahin koipouh hi silte a Khrist natong chu Pathian kipaahpih leh, mihing paahtaat in a um veu uhi.

¹⁹Hujiahin kilepna diing leh, kisuhhaattuahna diing silte i delh diing uhi.

²⁰Na bangkhat neehin Pathian natoh suse sin. Sil zousiah chu a siangthou ngei ahi; hizongleh a bangkhat neeh jiaha mi a lungnopmoh inchu, a netu diingin gilou ahi.

²¹Na unau puuhna diing aha, ahihlouhleh lunghihmohna diing aha, ahihlouhleh suhzawngkhalna diing ana hihin chu sa neeh louhte, uain dawn louhte, huleh sil bangmah bawl louh a hoih hi.

²²Ginna na nei maw? Pathian ma ah nangmah chauhin kineih in. Amah hoihsah lama siamlouh kitangsahlou mi chu a hampha hi.

²³Huleh gingleltu in a neeh inchu ginna a neeh louh jiahin siamlouh tangin a um hi; ajiahchu ginna lou a bawl photmah chu sual ahi.