Read Simte ROMETE 4 Bible Online

ROMETE 4 - Simte bible

ROMETE 4

¹Ahihleh tahsa daan a i pu uh Abraham in a muh bang ahiai i soi diing uh?

²Ajiahchu natoh jiaha Abraham siamtansaha a um leh suan diing a nei hi; hizongleh Pathian lamah chu a nei sih hi.

³Bang jiahin ahiai i chih leh Pathian lehkhathu in bang ahiai a soi? Abraham in Pathian a gingta a, hu ginna chu amah diing a dihtatna a ngaih ahi, a chi hi.

⁴Huleh natongtu loh chu hehpihna a ngaih ahi sih a, bat a ngaih ahi zaw hi.

⁵Hizongleh nna tonglou a, Pathian ngaihsahloute siamtangsahpa gingta zaw mi ginna chu dihtatna a ngaih ahi.

⁶Mi, natoh tellou a Pathian in dihtat a, a ngaih a, vang a piah thu chu David in zong,

⁷A bohsiatnate uh ngaihdam a umte leh, a sualnate uh khuh a umte chu a hampha uhi;

⁸Lalpa’n sualna nei a, a seh louhte a hampha uhi, chia a soi bangmahin.

⁹Ahihleh hu hamphatna zehtante tung chauha uhi ahiai, ahihlouhleh zehtan louhte tungah zong? Abraham ginna chu a dihtatna ngaih ahi i chi ngal a.

¹⁰Ahihleh huchu bangchi kingaih ahiai? a zehtan nungin ahiai, ahihlouhleh a zehtan ma in? A zehtan nungin ahi sih a, a zehtan ma in ahi zaw hi.

¹¹Huleh zehtan louha a um laia ginna a, a muh dihtatna heetna zehtan chiamchihna chu a mu a; zehtan louh hizongleh uh a gingta zousiah pa ahihtheihna diingin; dihtatna chu amahuh diing a zong seh ahih theihna diingin.

¹²Huleh zehtan louhte a diing a zehtante pa chauh ahi sih a, i pu uh Abraham zehtan louha a um lai a, a ginna neih banga neite pa zong ahi.

¹³Ajiahchu Abraham aha, ahihlouhleh a haah kawmah khovel gouluahtu ahi diing chih thu daan jiaha chiam ahi sih a, ginna a dihtatna jiahin ahi zaw hi.

¹⁴Bang jiahin ahiai i chih leh daan a mite gouluahtu ahih unchu, ginna bangmahlou ahita diing a, thuchiam zong panna bei ahita diing hi.

¹⁵Ajiahchu daan in lungthahna a siam a; himahleh daan um louhna ah bohsiatna zong a um sih hi.

¹⁶Hujiahin hehpihna jiaha ahihtheihna diingin, ginna jiahin ahi; haahte zousiah inzong thuchiam chu peelloua, a muhna diingun; daan nei mite chauhin hilouin, i bawnva i pu uh Abraham banga ginna nei zousiah inzong a mu diing uhi.

¹⁷(Nam tampite pa in ka hung bawl hi, chi a gelh bangin, ) misite suhingtu leh, sil um loute um banga soitu a gintaat Pathian mitmuh ah.

¹⁸Kinephuaia a um louh inzong ama’n chu kinemtahin a gingta a, nam tampite pa ahung hihtheihna diingin; Huchibangin na haah ahung hi diing, chi a kisoi dungjuiin.

¹⁹Huleh ginna a haatlou lou in, a sapum sisa banga um leh, (amah chu kum zakhat vel diing mi ahi a) Sarah chih zong a ngaihtuah sih hi;

²⁰Ginlelhna jalin Pathian thuchiam tahsanglouin a um sih a; ginna ah a haat a, Pathian a paahtawi hi.

²¹Huleh thu ama’n a chiam phot chu a taangtungsah thei ahi chih he in a gingta tinten hi.

²²Hujiahin a ginna chu a dihtatna a ngaih ahita hi.

²³Huleh a ginna chu a dihtatna a ngaih ahi chih, amah jiah chauha gelh ahi sih a;

²⁴Hizongleh misi laha kipana i Lalpa uh Jesu kaithoupa i gintaat inchu, eiuh diingin zong dihtatna a ngaih ahi diing hi.

²⁵Hu Jesu chu i tatsualnate jiahin piahkhiahin a um a, huleh siam i tanna diingin kaihthohin a um hi.