Read Simte ROMETE 5 Bible Online

ROMETE 5 - Simte bible

ROMETE 5

¹Hujiahin ginna jiaha siamtansah a um in, i Lalpa uh Jesu Khrist jalin Pathian toh kilemin i um uhi.

²Amah jal mahin hi i dinkipna hehpihna huang ah ginna a luut theihna i neita uhi; huleh Pathian loupina a kinemin kipaahin zong i um uhi.

³Huleh hu chauh zong hilouin, gimthuaahna in kuhkalna a siam chih he in gimthuaahna ah zong i kipaah uhi.

⁴Huleh kuhkalna in heetchi ana a siama, heetchi ana in kinepna a siam a;

⁵Huleh kinepna in chu a zahtasah sih; ajiahchu hu Hagau Siangthou i kawma ahung piahin Pathian lungsiatna i lungtang vah a leihleetta hi.

⁶Ajiahchu i haat louh laiin, a hun tahin Khrist chu Pathian ngaihsahloute diingin ahung sita hi.

⁷Bang jiahin ahiai i chih leh midihtat luang a sih mi a ut khol sih diing a, ahiinlah mi hoih luang a sih chu mi khenkhat in a ngap meithei hi.

⁸Hizongleh misualte i hihlaia Khrist i luang a ahung sihna ah Pathian in ahung lungsiatna chu phattuaahin a langsahta hi.

⁹Hubanah, a sisana siamtansaha i um nungin amah jalin lungthahna apatin hutdam in i um diing uhi.

¹⁰Ajiahchu meelma i hih laia bawn a Tapa sihna jiaha Pathian toh kilemta i hih unchu, kilema i um zohnung un a hinna jiahin hutdam in i um ngei diing uhi.

¹¹Huchi chauh zong ahi sih a, tu a tatna i muhna i Lalpa uh Jesu Khrist jalin Pathian ah zong i kipaah uhi.

¹²Huchihjiahin, mi khat jiaha sual khovel a ahung luut a, sual jiaha sihna ahung luut mahbangin mi zousiah ana sualtaah jiahin sihna in mi zousiah a jelsuahta hi.

¹³Ajiahchu daan umma tanin sual khovel ah a um a; hizongleh daan um louh laiin sual chu sual a ngaih ahi sih hi.

¹⁴Hizongleh Adam a kipana Mosi tanphain Adam sualna banga sil bawlsual loute tungah zong sihna in vai a hawm hi; Adam chu a hung diingpa etsahna ahi.

¹⁵Hizongleh silthawnpiah chu giitlouhna toh kibang ahi sih hi. Ajiahchu mi khat giitlouh jala bawn mi tampi a sih va ahihleh, Pathian hehpihna leh, mi khat Jesu Khrist hehpihna jiaha silthawnpiah chu mi tampite tungah vuhin a um ngei diing hi.

¹⁶Huleh silthawnpiah chu mi khat sual jiaha sil hung um toh a kibang sih hi; bang jiahin ahiai i chih leh siamlouh tansahna vaihawmna chu mi khat jiahin ahung um a, hizongleh silthawnpiah chu gilou tampite jiahin siamtansahna diingin ahung um zaw hi.

¹⁷Ajiahchu mi khat giitlouh jiaha sihna in hu mi khat jiah mah a thuneitah a a um ngal inchu, hehpihna nasatah leh, dihtatna silthawnpiah mute’n mi khat, Jesu Khrist jiahin hinna ah vai a hawm ngei diing uhi.

¹⁸Hujiahin mi khat giitlouh jiah a siamlouh tansah na vaihawmna chu mi zousiah tungah ahung um a; huchimahbangin mi khat dihtatna silbawl jiahin hinna muhna diingin siamtansah na silthawnpiah chu mi zousiah tungah ahung um hi.

¹⁹Ajiahchu mi khat thuman louh jiaha mi tampite misual a kihihsah mahbangin, mi khat thuman jiahin mi tampite midihtat hihsah ahi diing uhi.

²⁰Huleh giitlouhna a tamsemna diingin daan ahung um behlap nalai a. Hizongleh sual a punna phot ah hehpihna zong a pung zosem hi.

²¹Sualin sihna a vai a hawm mahbang a, hehpihna in dihtatna jala kumtuang hinna tanna diing khop a i Lalpa uh Jesu Khrist jiaha vai a hawm theihna diingin.