Read Simte ROMETE 8 Bible Online

ROMETE 8 - Simte bible

ROMETE 8

¹Hujiahin tuin chu Khrist Jesu a um, tahsa daan a um loua Hagau daan a um zote diingin siamlouhtansahna mawngmawng a umta sih hi.

²Bang jiahin ahiai i chih leh Khrist Jesu a um hinna Hagau daan in sual leh sihna daan a kipan ahung zalensahta hi.

³Ajiahchu tahsa jala haatlouhna jiaha daan in a bawl guallouh chu, Pathian in a tapa ngei, sualna tahsa gilou lim puain, huleh sual thoihna diing a hung sawlin, tahsa a sual um chu siamlouh a tangsahta hi.

⁴Tahsa daan a pai loua, Hagau daan a pai zaw eihaw a daan dihtatnate suhtaangtunga a um theihna diingin.

⁵Bang jiahin ahiai i chih leh tahsa daan a umte’n tahsalam silte a lunggulh veu uhi; hizongleh Hagau daan a umte’n chu Hagau lam silte a lunggulh uhi.

⁶Ajiahchu tahsalam silte lunggulh chu sihna ahi a; hizongleh Hagau lam silte lunggulh chu hinna leh hamuanna ahi.

⁷Salam lunggulh chu Pathian toh kidouna ahih jiahin; huchu Pathian daan nuaiah a um sih a, um zong a um thei lou him ahi.

⁸Huchi'n tahsa a umte’n Pathian a kipaahsah thei sih uhi.

⁹Hizongleh Pathian Hagau nanguh a a um tahzet inchu tahsa a um na hi sih va, Hagaua um na hi zaw uhi. Ahiinlah mi koipouh Khrist Hagau nei lou chu amah a ahi sih hi.

¹⁰Huleh Khrist nanguh a a um leh sapum chu sual jiahin a si ahi; hizongleh Hagau chu dihtatna jiahin a hing ahi.

¹¹Hizongleh misi laha kipana Jesu kaithoupa Hagau nanguh a a um inchu misi laha kipana Khrist kaithoupa’n nanguh a um Hagau jiahin na sapum uh sitheite zong a suhing diing hi.

¹²Hujiahin unaute, bat i nei hi, tahsa daan a um diingin tahsa lahah chu ahi sih.

¹³Bang jiahin ahiai i chih leh tahsa daan a na um unchu na si diing uhi; himahleh sapum silbawlte Hagau a na suhlup jel unchu na hing diing uhi.

¹⁴Ajiahchu Pathian Hagau puia um photmahte chu Pathian tate ahi uhi.

¹⁵Laua um kiit diingin suaah hihna hagau na mu uh ahi sih a; ta hihna Hagau na mu uh ahi zaw hi, hu Hagau jiahin Abba, Pa, chi'n i kikou hi.

¹⁶Hagau ngei in eimah hagau toh Pathian tate i hi chih ahung hesah hi.

¹⁷Huleh tate i hih inchu, gouluahtute i hi uh; a kawma paahtawi a i um theihna diing a amah i thuaahpih tahzet inchu Pathian gouluahtute, Khrist luahpihtute i hi uhi.

¹⁸Bang jiahin ahiai i chih leh tulaia thuaahgimnate chu izawchianga eiuh a loupina suhlata um diing toh tehkaah tham in ka ngai sih hi.

¹⁹Ajiahchu silsiam zousiah in kinem mahmahin Pathian tate kilatna diing a ngaahlah mahmah uhi.

²⁰Bang jiahin ahiai i chih leh silsiam zousiahte chu sil thulimlou thuthu a umsah in a umta uh, amahuh ut thu hilouin, kinepna neia amahuh umsahtu jiahin ahi zaw hi,

²¹Ajiahchu silsiam zousiah zong siatna suaah apat suahtaatsaha um in, Pathian tate noplenna loupi a luut diing ahi uhi.

²²Ajiahchu silsiam zousiah tutandongin thuum leh nauveina thuaahin a um uh chih i he uhi.

²³Huleh amahuh chauh zong ahi sih a, Hagau gah masa nei eihaw ngei zong, ta hihna, i sapum uh tatna muhna diing ngaah in, eihaw na chiang lungsim in i thuum veu uhi.

²⁴Bang jiahin ahiai i chih leh kinepna in ahi hutdama i um uh; hizongleh muhsa zinga kinep chu kinepna ahi sih hi; mi’n a muhsa zing ah bang diingin a kinem nalailai diviai?

²⁵Hizongleh i muh louh i kineppih inchu kuhkaltahin i ngaah zoveu hi.

²⁶Hutobangmahin, Hagau in i haatlouhnate a panpih jel hi; ajiahchu bangchi banga haamtei diing i hiai chih i he sih a; hizongleh Hagau in thuumna soi guallouhin ahung ngetsah zing hi.

²⁷Huleh Pathian deihzawng banga misiangthoute diinga a ngetsah jiahin, amah lungtang entu in Hagau deihzawng bang ahiai chih a he hi.

²⁸Huleh Pathian lungsiatte, ama’n a guat banga a kouhte diingin, sil zousiah in a hoihna diingun a tongkhawm chiat hi chih i he hi.

²⁹Ajiahchu a heetlawhte chu amah tapa banga um diingin a guatlawh a; a tapa chu unau tampite laha ta masapen ahung hihtheihna diingin.

³⁰Huleh a guatlawhte chu kouh zong a kou a; huleh a kouhte chu siam a tangsah a; huleh siam a tansahte chu a paahtawi hi.

³¹Ahihleh hi thute ah bang i soita diai? Pathian i lama apan leh, kua’n ahiai hung dou thei diing?

³²Amah tapa ngei zong hawi loua, i bawnva diing a hung pepa in bang diingin sil zousiah a thawnin amah toh ahung pekhawm lou diai?

³³Pathian miteelte kua’n ahiai heeh diing? Siamtangsahtu Pathian ahi ngal a.

³⁴Kua’n ahiai siamlouh tangsah diing? A si chu Khrist ahi ngal a; ahi, thou kiit zawta a, Pathian jiatlama um a, hung ngetsahtu zong ahi.

³⁵Khrist lungsiatna a kipan kua’n ahiai hung khen diing? gimthuaahna in ahiai, lungngaihna in ahiai, gawtna in ahiai, kialin ahiai, saguahna in ahiai, lauhuaina in ahiai, namsaau in ahiai hung khen diing?

³⁶Nangmah jiahin nitum in thahin ka um uh; goh diing belaamte banga ngaih ka hi uh, chia gelh bangin.

³⁷Khenlou hial diing; hite zousiah ah ahung lungsiattu jalin gualzoute sanga tungtuang zaw i hi uhi.

³⁸Ajiahchu sihna aha, hinna aha, angelte aha, lalnate aha, silbawltheihnate aha, sil um zingte aha, sil hung um diingte aha,

³⁹Saanna aha, thuuhna aha, ahihlouhleh silsiam dang mawngmawng in zong i Lalpa uh Khrist Jesu a um Pathian lungsiatna a kipan ahung khen thei sih diing chih dihtahin ka he hi.