Read Simte ROMETE 9 Bible Online

ROMETE 9 - Simte bible

ROMETE 9

¹Khrist ah thutah ka soi ahi, ka zuau sih, Hagau Siangthou jiahin ka sialepha heetna in zong ahung heetpih hi.

²Ka lungtangah hahsatna nasatah leh lungngaihna daai thei lou ka nei hi.

³Bang jiahin ahiai i chih leh ka unaute, tahsalama ka chipihte luang in keimah Khrist kawm apat bawltuam khopa haamse thuaahin um leng ka chi hi.

⁴Israelmi ahi ngal va; ta hihnate, loupinate, thuhunte, daanthu piahnate, Pathian natohnate leh thuchiamte bang amahuh neih ahi a;

⁵Pulepate amahuh a ahi a, huleh tahsalam thu ah Khrist zong amahuh laha kipana hung pawt ahi; amah chu sil zousiah tunga um, kumtuanga paahtawi taah Pathian ahi. Amen.

⁶Hizongleh Pathian thu bangmahlou banga umta ahi sih hi. Ajiahchu Israel haahte a bawnun Israel mi ahi veh sih uhi.

⁷Abraham haahte ahih jiahun zong a bawnun tate ahi veh tuan sih uh; Isaak ah na haah a kichi diing, chih ahi zaw hi.

⁸Huchu, tahsa tate chu Pathian tate ahi sih va; hizongleh thuchiam tate chu Abraham haah a ngaih ahi zaw uh chihna ahi.

⁹Ajiahchu thuchiam hikhu ahi, Tubang hunin ka hung diing a, Sarah in tapa a nei diing, chih.

¹⁰Huleh hu chauh ahi sih; hizongleh Rebekah in zong, mi khat, i pu uh Isaak laha nau a paai laiin;

¹¹Naupangte chu piang nailou in, silhoih leh silsia zong bawl nailou in, teel lam thu a Pathian thuguat a det theihna diingin, silbawl jiah hi lou a, a koutu deih jiah hizaw in;

¹²A kawmah, A upazaw in a naupangzaw nna a tohsah diing, Pathian in a chi hi.

¹³Jakob ka lungsiat a, himahleh Esau chu ka mudah hi, chih gelh bangin.

¹⁴Ahihleh bang i soita diai? Pathian ah dihtatlouhna a um a adiai? Um lou hial.

¹⁵Ajiahchu ama’n Mosi kawmah, Ka khotuah ut photmah ka khotuah diing a, huleh ka lungsiat ut photmah ka lungsiat diing, chi'n ana soita hi.

¹⁶Huchi'n a deihpa jiahin ahi sih a, a taipa jiahin zong ahi diah sih, hizongleh a khotuahtu Pathian jiahin ahi zaw hi.

¹⁷Ajiahchu Pathian lehkhathu in Pharaoh kawmah, Hi jiahtahin ka hung tungding a, nangmaha ka silbawltheihna ka etsah theihna diing leh, leitung pumpia ka min a than theihna diingin, a chi hi.

¹⁸Hujiahin Pathian in a ut photmah a khotuah a, a ut photmah zong a soihahsah veu hi.

¹⁹Nang in ka kawmah, Bang diinga ama’n i dih louhna hung kawh ahiai? A deihzawng kua’n a kalh ei? na chi ahi diing.

²⁰Hilou, hizongleh Aw mihing, nang Pathian dawng vialtu koi na hiai? Silsia min a siamtu kawmah, Bang diinga hitobanga hung siam na hiai, a chi diai mah?

²¹Beel kheengtu in beelleitang khat apat beel khat deihum tah a kheeng diing leh, beel khat thulimlou tah a kheeng diing in, beelleitang tungah thu a nei sih eimah?

²²Huleh lungthahna beel, mangthai taahte tungah Pathian in a lungthahna leh a silbawltheihna latsah ut a a thuaahzoh haamhaam leh bang a khawh diai?

²³Huleh khotuahna beel, loupina tang diing a malai apat ana guatlawhte tunga a loupina hauhdan a suhlat theihna diingin.

²⁴Hu khotuahna beelte chu, Judate lah chauh a kipan hilouin, Jentelte laha kipana zong kouhte, eihaw na chiang i hi uhi.

²⁵Hosea lehkhabu a, Ka mi hi ngeiloute chu ka mite ka chi diing a, lungsiat ngei louhnu zong lungsiat nu ka chi diing.

²⁶Huleh hichi ahung hi diing a, a kawmvah, Ka mite na hi sih uh, chih a umna ngei ah, Pathian hing tate vuahin a um diing uh, ana chih bangin.

²⁷Huleh Isaiah in zong Israelte tungtaang thu ana taangkoupih a, Israelte zaw tui khang lian sehneel bangin tam zongleh uh, a gawt mawh chauh hutdam in a um diing uh;

²⁸Ajiahchu Lalpa’n leitung a natoh tomkhat a bawl diing jiahin ama’n hu natoh chu a zou diing a, huleh dihtatna in a sutom diing hi.

²⁹Huleh Isaiah mahin, Mipite Lalpa’n chi haahtu diing hung na hawisahlou hileh Sodom khua bangin i umta diing a, huleh Gommorrah banga bawl in i umta diing uhi, chia ana soilawh bangin.

³⁰Ahihleh bang i soita diai? Dihtatna delhlou Jentelte’n dihtatna a phata uh ahi, ginna jiaha dihtatna chu.

³¹Hizongleh dihtatna daan delh Israelte’n hu dihtatna chu a phazouta sih uhi.

³²Bang achih jiahin ahiai? Ginna in a delh sih va, daan silbawl a muhtheih banga a delh jiahun ahi. Ajiahchu puuhna suang ah a puuhta uhi.

³³Ngai in, Zion ah puuhna suang leh daalna suangpi ka koih hi; koipouh amah gingta chu a zahtasah sih diing hi, chia gelh bangin.