Read Simte KORINTHTE I 10 Bible Online

KORINTHTE I 10 - Simte bible

KORINTHTE I 10

¹Unaute, hite na heet louh uh ka deih sih, huchia i pulepate a bawnva mei nuaia ana um va, huleh a bawnva tuipi a kaan va;

²Huleh a bawnva mei ah leh tuipi a Mosi kawm a baptis a a um va;

³Huleh a bawnva hagaulam an kibang a neeh va;

⁴Huleh a bawnva hagaulam dawn kibang a dawn chiat uh; ajiahchu amahuh juitu hagaulam suangpi a a dawn chiat uhi; hu suangpi chu Khrist ahi.

⁵Hizongleh a lahva mi tampite tungah Pathian a lungkimta sih a; gamdai ah a puuhlum gamta uhi.

⁶Hite chu ei u’diing a i etton diing uh ahi, silgilou a lunggulh bang va i lunggulh louhna diingun.

⁷A lahva khenkhat milem bemi ahih bangun milem bemi hi sih un; Mipite chu ne diing leh dawn diingin a tou va, huleh kimawl diingin a ding jel uh, chih gelh bangin.

⁸A lahva khenkhat in nungaah a ngai va, ni khat in saang sawmnih leh saang thum a puuhlup loh bangun ei u’chu i kingai sih diing uh.

⁹A lahva khenkhat in a ze-et va, guula suhmang a, a um bangun, eiun zaw Khrist i ze-et sih diing uh.

¹⁰Huleh a lahva khenkhat a phun va, sumangtu suhmang a a um bangun i phun sih diing uhi.

¹¹Huchi'n hite zousiah chu etton diingin a tungvah ana tung ahi; huleh eiuh khovel huntawp hung tunnate kawma thuhilhna diing a gelh ahi.

¹²Huchi ahihjiahin dinga kingaihtuah chu pilvaang heh, huchilouin chu a puuhkha diing hi.

¹³Mihing thuaahzoh val heemna na tungvah a tung ngei nai sih, hizongleh Pathian chu a muanhuai hi, ama’n na thuaahzoh val uh heemna na tuaah diing uh a phal sih diing; na thuaahzoh na diingun heemna toh kitonin taikhiahna lampi zong ahung siamsah zo diing hi.

¹⁴Hujiahin ka deihtahte, milembiah taisan un.

¹⁵Mipilte kawma thusoi bangin ka soi ahi; ka thusoi ngaihtuah un.

¹⁶Vangpiahna nou i dawn uh Khrist sisan kipawlkhawmpihna hilou ahiai mah? Tanghou i balkeeh uh Khrist sapum kipawlkhawmpihna hilou ahiai mah?

¹⁷Ajiahchu eiuh tampi hingalin tanghou khat, huleh sapumkhat i hi uh; bang jiahin ahiai i chih leh hu tanghou beu khatah tan nei chiat i hi uhi.

¹⁸Tahsa daan a Israelte en un; kithoihna sa nete, maitaam toh tan neikhawm ahi sih viai mah?

¹⁹Ahihleh bang ahiai ka soi? Milem chu sil bangahakhat ahi a, huleh milem biahna a sil kilaante zong sil bangah a khat ahi chi ka hiai mah?

²⁰Jentelte kithoihna chu Pathian kawmah hilou in, dawite kawmah a kithoih uh chih ka soi zaw ahi; nanguh dawite toh na kipawlkhawm uh ka hung deihsah sih hi.

²¹Lalpa nou leh dawite nou na dawnkhawm thei sih diing uh; Lalpa dohkaan a leh dawite dohkaan a zong na nekhawm thei sih diing uhi.

²²Ahihleh Lalpa thangsiat diing a haantawh tum i hi viai? Amah sanga haatzaw i hi viai mah?

²³Sil zousiah kei diingin a siang a, hizongleh sil zousiah a hoih kim sih hi; sil zousiah kei diingin a sianga, hizongleh sil zousiah in a siam hoih sih hi.

²⁴Mi koimah in amah ngen hoihna diing hawl lou in, midangte hoih na diing hawl zaw heh.

²⁵Sa, dawl a kizuah photmah chu, sialepha heetna jiahin bangmah dongse louin ne un;

²⁶Ajiahchu leilung leh a sunga um zousiah Lalpa a ahi.

²⁷Ginglou mite laha koiaha in an ne diing a ahung chial a, huleh chiah na ut ngal unchu, na ma va a lui phot uh, sialepha heetna jiahin bangmah dongse louin ne mei un.

²⁸Hizongleh mi koiaha in, Hichu milem kawma kithoihna ahi, chia ahung hilh leh, amah ahung hilhpa jiah leh, sialepha heetna jiahin ne sih un; ajiahchu leilung leh a sunga um zousiah Lalpa a ahi;

²⁹Nangmah sialepha heetna chi ka hi sih a, midang sialepha heetna chi ka hi zaw hi; bang jiahin ahiai i chih leh midang sialepha heetna in bang diinga ka zalenna hung awimoh diing ahiai?

³⁰Ajiahchu, kipaahtaha ka neeh leh, bang diinga kipaahthu ka soina tunga soisiat a um ka hiai?

³¹Hujiahin na neeh un hileh, na dawn un hileh, na bawl photmah uh Pathian loupina diingin bawl veh un.

³²Judate aha, Jentelte aha, ahihlouhleh Pathian kouhtuamte hitaleh a puuh na diingun bangmah bawl sih un.

³³Keimah phattuamna diing hawl loua, hutdam ahihtheihna diing va mi tampite phattuamna diing hawl zaw a, sil zousiaha mi chinteng ka kipaahsah bang mahin.