Read Simte KORINTHTE I 13 Bible Online

KORINTHTE I 13 - Simte bible

KORINTHTE I 13

¹Mihing haamte leh angel haamte in thu soi mahleng lungsiatna ka neih louh inchu sumeng tumging aha, ahihlouhleh daah khutbeh ging aha bang giap ka hi diing hi.

²Huleh thusoitheihna silpiah nei in, thuguuh zousiah leh heetna zousiah he veh mahleng, huleh taang kisuansah theihna khop ginna nei mahleng, lungsiatna ka neih louh inchu bangmah ka hi sih hi.

³Huleh ka neih zousiah migentheite vaahna diingin peveh in, huleh ka sapum haaltum diingin pe ngam mah zong leng, lungsiatna ka neih louh inchu bangmah a phatuam sih hi.

⁴Lungsiatna in a thuaah thei a, huleh a ching a; lungsiatna in a thangse sih a; lungsiatna chu a kiphat sih a, a kiuangsah sih hi,

⁵A kilawmlouin a gamta sih a, amah diing chauh a ngaihtuah sih a, a lungthah baih sih a, silgilou a ngaihtuah sih hi;

⁶Dihtatlouhna ah a kipaah sih a, hizongleh thutah ah a kipaah hi;

⁷Sil zousiah puaahdan a siam a, sil zousiah a gingta a, sil zousiah a lamen a, sil zousiah a thuaah mualsuaah hi.

⁸Lungsiatna chu bangchihmahin a bei sih diing; hizongleh thusoitheihnate um mah zong leh ahung bei diing a; haam heetlouhte um mah leh ahung tawp diing a; heetnate um mahleh ahung mang diing hi.

⁹Ajiahchu a kimlouin i he a, a kimlouin i soi uhi.

¹⁰Hizongleh a bukim ahung tun chiangin a kimlou chu suhbei ahita diing hi.

¹¹Ka naupan laiin naupang haam in ka haam a, naupang heet in ka he a, naupang ngaihtuah in ka ngaihtuah hi; hizongleh ka hung pichin phetin chu naupanlai silte ka paaita hi.

¹²Ajiahchu tuin limlang a et bangin chianloutahin i mu a; hizongleh hu hun chiangin chu kimaaituah in i muta diing hi; tuin chu a kimlouin ka he a, hizongleh hu hun chiangin chu kei hung kiheet bangin ka heta diing hi.

¹³Huleh tuin ginna toh, kinepna toh, lungsiatna hiteng thum a um zing hi; hizongleh hiteng laha lianpen chu lungsiatna ahi.