Read Simte KORINTHTE I 16 Bible Online

KORINTHTE I 16 - Simte bible

KORINTHTE I 16

¹Huleh misiangthoute diing a thohlawm thu chu, Galatia gam a kouhtuamte thu ka piah bangin nangun zong bawl un.

²Ka hung chiang a thohlawm donna a um louhna diingin, ni sagihni masapenin Pathian in a vangpiah bangin mi chinin na khut vah na koih khawl chiat un.

³Huleh ka hung chiangin, koi hitaleh pha na sahsah uh na silpiah uh va thah diingin na lehkha u’toh Jerusalem ah ka sawl diing hi.

⁴Huleh kei zong ka chiah a lem leh, kei toh kitonin a chiah diing uhi.

⁵Makedonia gam ka totsuaah zoh chiangin na kawmvah ka hung diing hi, ajiahchu Makedonia gam totsuaah ka sawm hi.

⁶Huleh ka chiahna diing photmaha na hung thah leh theihna diingun na kawmvah tomkhat, ahihlouhleh phalbi sung siah aha ka taam meithei hi.

⁷Ajiahchu tua zin kawma hung muh malam ka ut sih hi; hizongleh Lalpa’n lem a sah leh sawtdeuh na kawmva taam ka kinem hi.

⁸Hizongleh Pentikost dongin Ephesa khua ah ka taam diing hi.

⁹Ajiahchu kot lianpi leh phatuamtah kei diingin a kihong a, doutute zong tampi a um uhi.

¹⁰Huchi'n Timothi a hung a ahihleh, lauthawng lou a na lahva a um theihna diing ngaihtuah un; ajiahchu kei tobangin ama’n Lalpa nna a tong hi.

¹¹Hujiahin koima’n musit sih henla; ka kawma ahung theihna diingin lungmuangtahin ha zaw un; ajiahchu unaute toh ka kawma ahung uh ka kinem hi.

¹²Unaupa Apollo thu ahihleh, unaute toh na kawmva hung diingin ka deih mahmah a; hizongleh tutaha hung diing chu amah deihdan ahi sih hi; hizongleh hun lemtaang a neih chiangin ahung diing hi.

¹³Kiveeng unla, ginna ah dingkip un, pasalpha bangin um unla, haattahin um un.

¹⁴Na silbawl photmah uh lungsiatna a bawl hi heh.

¹⁵Unaute, (Stephana innkuanpihte chu Akaia gam a, Pathian thu a gah masapen ahi va, misiangthoute natohsah diingin a kipia uh chih na he uhi),

¹⁶Huchibangte kawm a leh mi chin keiuh toh huhna a tonggimte kawma kituluut diingin ka hung ngen hi.

¹⁷Stephana leh Fortunata leh Akaika hung chu ka kipaah hi; ajiahchu amahun na um louh awng uh a hu uhi.

¹⁸Bang jiahin ahiai i chih leh amahun kei lungsim leh nanguh lungsim ahung suhhalhsah uhi; hujiahin huchibang mite chu hesiam un.

¹⁹Asia gam a kouhtuamte’n chibai ahung buuh uhi. Akuila leh Prisilla in a inn va kouhtuam kikhawmte toh Lalpa ah chibai hoihtah ahung buuh uhi.

²⁰Unaute zousiah in chibai ahung buuh uhi. Tawp siangthouin khat leh khat chibai kibuuhtuah un.

²¹Kei Paul in keimah khut ngei a chibai ka hung buuhna ahi.

²²Mi koipouh in Lalpa Jesu Khrist a lungsiat louhleh haamse thuaah in um heh. (Anathema), Lalpa ahung hi. (Maranatha).

²³I Lalpa uh Jesu Khrist hehpihna na kawmvah um hen.

²⁴Khrist Jesu a ka hung lungsiatna na bawnva kawmah um hen. Amen.