Read Simte KORINTHTE I 2 Bible Online

KORINTHTE I 2 - Simte bible

KORINTHTE I 2

¹Huleh unaute, kei chu na kawmva Pathian thu heetsahna phuang a ka hung laiin thusoi siamna mahmah leh pilna loupitah toh hung ka hi sih hi.

²Bang jiahin ahiai i chih leh ke’n Jesu Khrist leh, amah kilhbeh a um thu chauhlou chu na lahvah bangmah dang heet ka tum sih hi.

³Huleh kei chu haatlou leh lau in, nasataha kithing kawmin na lahvah ka um a.

⁴Ka kamsuaahte leh ka thusoite chu mihing pilna a zawlsiamna thu ahi sih a, Hagau leh silbawltheihna a suhlat in ahi zaw hi.

⁵Huchia na ginna uh mihing pilna a kinga loua, Pathian silbawltheihna a, a kingah zawhna diingin.

⁶Ahiinlah pichingte lahah chu pilna thu zong ka soi jel uhi, ahihvangin hi khovel pilna thu ahi sih a, hi khovel vaihawmtu mangthai diingte pilna thu zong ahi sih hi.

⁷Hizongleh kei un chu Pathian pilna thuguuh, i loupina diing a Pathian in khovel um ma a, a guatsa pilna kiphual thu chu ka soi zaw veu uhi.

⁸Huchu hi khovel vaihawmtute mawngmawngin a he sih uh; ajiahchu na he hitaleh uh loupina Lalpa chu ana kilhbeh sih diing uhi.

⁹Hizongleh, Mit a muh ngei louh, bil a jah ngei louh, huleh mihing lungtang a zong luut ngei lou, Pathian in amah lungsiatte diing a, a bawlsah silte chu, chia gelh bangin.

¹⁰Hizongleh Pathian in hute chu a Hagau in i kawmah ahung hesahta hi; ajiahchu Hagau in bangkim a hawldoh veh a, ahi, Pathian thugilte zong.

¹¹Mihing thute mihinga um hagau loungalin kua’n ahiai he diing? huchimahbangin Pathian thute zong Pathian Hagau loungalin kuamah in a he sih hi.

¹²Huchi'n Pathian in a thawn a ahung piah silte i heettheihna diingin, ei unchu khovel hagau hilou in, Pathiana kuan Hagau chu i tang uh ahi.

¹³Hu silte chu mihing pilna thuhilhna thu a soi louin, Hagau Siangthou thuhilh chu soi zaw in, hagaulam thute hagaumite kawm a hilhchianin i soi veu uhi.

¹⁴Hizongleh khovel mi’n chu Pathian Hagau lam silte a pom thei sih hi, ajiahchu amah ngaihin hute chu ngolhuai ahi; Hagaua heet ahihjiahin he zong a he thei sih hi.

¹⁵Hizongleh hagau mi’n chu sil zousiah a hechian veu a, amah ahihleh kuama’n a hechian sih hi.

¹⁶Ajiahchu amah thuhilh thei diing a kua’n ahiai Lalpa lungsim heta? Hizongleh eiun chu Khrist lungsim i pua uhi.