Read Simte KORINTHTE I 5 Bible Online

KORINTHTE I 5 - Simte bible

KORINTHTE I 5

¹Na lahvah kingaih a um chih a thang vengvung hi, huchibang kingaih Jentelte laha zong um ngeilou, mi khat in a pa ji a kiteenpih, chih.

²Huleh huchibang silbawlpa chu na lah vapata nohdoh diing a lungngaih naahsangin na kiuahsahpih zaw uhi.

³Ajiahchu keimah tahsa a ka tel louh vangin ka hagau in ka tel a, hutobanga gamtapa chu na lahva tel tobangin a tungvai ka hawm zouta hi.

⁴I Lalpa uh Jesu Khrist minin, ka hagau leh i Lalpa uh Jesu Khrist silbawltheihna toh na kikhopkhawm chiangun,

⁵Huchibang mi chu Lalpa Jesu ni chianga a hagau hutdam a, a um theihna diingin, a tahsa suhmangna diingin Setan kawmah piah diing ka chi hi.

⁶Na kisahtheihna uh a hoih sih hi. Tol themchakhat in tanghou beu a pum in a zelsuaah veu hi chih na he sih u'maw?

⁷Hujiahin tol sohlouh na hih bangmahun, tanghou beu thah na hih theihna diingun tol lui chu paaisiang un. Bang jiahin ahiai i chih leh ei di’n i chiahkaan uh Khrist chu goh in a umta hi.

⁸Hujiahin gual vaahna nei nihang, tol lui toh chu hilou in, nunsia leh giitlouhna tol toh zong hilou in; hizongleh tahna leh dihna tanghou tol sohlouh toh i nei zaw diing uhi.

⁹Ka lehkhathot ah kingaihhaatte kithuahpihlou diingin ka hung gial hi.

¹⁰Hi khovela kingaihhaatte toh aha, mi huaihamte toh aha, leepgute toh aha, ahihlouhleh milem bete toh aha kithuah heet louh diing chi chu ka hi sih hi; ajiahchu huchi diing hileh khovel apat na chiahdoh uh ngai diing ahi.

¹¹Hizongleh tuin chu, koipouh unau chih hi ngal a kingaih haat aha, huaiham aha, milembia aha, haansan aha, zukham haat aha, a hihlouhleh leepguuh haat aha ahih inchu amah chu kithuahpih lou diingin na kawmvah ka hung gial hi; huchibang mi toh neeh zong nekhawm lou diingin.

¹²Ajiahchu polam mite ke’n ka ngaihtuah khawh diing bang awm ei? a sunga umte hilou maw nangun na ngaihtuah veu uh?

¹³Hizongleh polam a mite chu Pathian in a ngaihtuah veu hi. Hujiahin na lah vapatin hu migiloupa chu nohdoh un.