Read Simte KORINTHTE I 7 Bible Online

KORINTHTE I 7 - Simte bible

KORINTHTE I 7

¹Tuin ka kawma na hung silgelhte uh thu ah; pasal diingin numei suhkhaah louh a hoih hi.

²Ahihvanginlah, kingaihnate a umlouhna diingin pasal chinin amah ji chiat kineih heh, huleh numei chinin zong amah pasal chiat kineih heh.

³Pasal in a ji kawmah a tan diing hun chu pia heh; huchimahbangin numei in zong a pasal kawmah pia heh.

⁴Ji in amah sapum tungah thu a nei sih a, a pasal in a nei zaw hi; huchimahbangin pasal in zong amah sapum tungah thu a nei sih a, a ji in a nei zaw hi.

⁵Angawlna leh haamteina a na kipumpiah theihna diing va hun khat sung pha satuaah na hih louhngal uleh, kuamah kikhaam sih un; huleh na kisuum zoh louh jiah va Setan in ahung heem louhna diingin hung umkhawm jel un.

⁶Hizongleh hi thu chu thupiah bang a soi louin, phalsah thuin ka soi zaw ahi.

⁷Ajiahchu mi zousiah keimah bang chiat leuh ka deih hi. Hizongleh mi chinin Pathian apat silpiah tuam chiat i nei uh, khat in hitobangin, a dang in hutobangin.

⁸Hujiahin kiteeng nailoute leh meithaite kawmah hichi'n ka chi hi, Keimah bangin umleh uh amahuh diingin a hoih diing hi.

⁹Ahihvangin a kisuum zoh louh unchu kiteeng u’heh; ajiahchu huuh sangin kiteen a hoihzaw hi.

¹⁰Huleh kiteengsate kawmah thu ka pia hi, kei piah hilouin, Lalpa piah ahi zaw, Ji in a pasal paisan sih heh;

¹¹Hizongleh a paisan inchu pasal nei lou in um zing heh; ahihlouhleh a pasal toh kilem kiit u’heh; huleh pasal in a ji khul sih heh.

¹²Hizongleh a dangte kawmah chu Lalpa hilou in, ke’n ka soi hi; Unau koipouh in gingloumi ji a, a neih a, amahnu a kawma a um nuam zing leh khul sih heh.

¹³Huleh numei, gingloumi pasal a neihin chu, a pasal in a kawma um zing a ut leh nuse sih heh.

¹⁴Bang jiahin ahiai i chih leh ginglou pasal chu a ji jiahin suhsiangthouin a um a, huleh ginglou ji zong a pasal jiahin suhsiangthouin a um hi; huchi hilouleh na tate uh a siang sih diing hi; hizongleh tuin chu a siangthou uhi.

¹⁵Ahihvangin a ginglou zawin a khen leh khen mei heh. Unaupa aha, unaunu aha chu huchibang thu ah kaanin a um sih; hizongleh Pathian in eiuh kituaah a um diingin ahung kou hi.

¹⁶Bang jiahin ahiai i chih leh Aw ji, na pasal na hutdam diing leh diing louh bang na he ei? ahihlouhleh, Aw pasal, na ji na hutdam diing leh diing louh bangchi'n na he ei?

¹⁷Hizongleh Pathian in mi chin kawma a hawmsahtaah bangin, Lalpa’n mi chin a kouh taah bangin, huchi'n um heh. Huleh huchibangin ke’n zong kouhtuam chinah ka namdet hi.

¹⁸Zehtansa a kouh mi a um ei? zehtan louh hung hituan sih heh. Zehtan louh a kouh mi a um ei? zehtantuan sih heh.

¹⁹Pathian thupiah juih chih louhngal, zehtan bangmah ahi sih a, zehtan louh zong bangmah ahi sih hi.

²⁰Mi chin kouh a, a umna mah vah um zing u’heh.

²¹Suaah hilai kouh na hiai? poisa sin; hizongleh suaahtaatsah theih diing na hih inchu, huchu zang in.

²²Ajiahchu suaah hihlaia Lalpa a kouh chu, Lalpa mi zalen ahi; huchimahbangin zalen hihlai a kouh zong Khrist suaah ahi.

²³Man a leisa na hi va; mite suaah hi sih un.

²⁴Unaute, mi chin kouh a, a umna bang chiatin, huah Pathian toh um zing heh.

²⁵Huchiangleh nungaah siangthoute tungtaang ahihleh Lalpa thupiah bangmah ka nei sih hi; hizongleh ginum a um diing a Lalpa hehpihna tang ka hih jiahin ka ngaihdan ka soi diing hi.

²⁶Huchi'n tulai hahsatna jiahin hichu hoih diingin ka ngaihtuah hi, mi a um ngei va a um zing uh a hoih hi, ka chi hi.

²⁷Ji a kaan na hiai mah? kisuutkhiah tum sin. Ji a kaan louh na hiai mah? ji neih tum sin.

²⁸Hizongleh ji na neih zongleh sil bawlsual na hi sih; huleh nungaah siangthou inzong pasal nei mahleh sil bawlsual ahi sih. Ahihvangin huchibang mite’n tahsa ah gimna a thuaah diing uhi; hizongleh ke’n chu na thuaah louh uh ka deih hi.

²⁹Hizongleh unaute, hikhu ka soi ahi, hun a tomta hi, huchi'n ji neite chu nei lou bangin,

³⁰Huleh kapte chu kap lou bangin; kipaahte chu kipaah lou bangin; sil leite chu a nei lou bangin;

³¹Huleh khovel mangte chu mang val lou bangin um heh; ajiahchu hi khovel umtan hi a beimang zing hi.

³²Hizongleh ke’n chu lungkhamna bei a na um uh ka hung deihsah hi. Ji nei lou in chu Lalpa a kipaahsah theihna diingin, Lalpa lam silte a ngaihsah veu hi.

³³Hizongleh ji nei in chu a ji a kipaahsah theihna diingin, khovel silte a ngaihsah veu hi.

³⁴Pasal nei leh nungaah siangthou zong a kibang sih hi. Pasal nei louin chu sapum leh hagau a siangthoutaha a um theihna diingin Lalpa lam silte a ngaihsah hi; hizongleh pasal nei in chu a pasal a kipaahsah theihna diingin khovel lam silte a ngaihsah veu hi.

³⁵Huleh hite chu na hoihna diing va ka soi ahi; nanguh thaang a awhsah tum a ka soi ahi sih a, hizongleh umdan kilawm huna na um theihna diing uleh, Lalpa na buai lou a natoh theihna diing va ka soi ahi zaw hi.

³⁶Hizongleh mi koipouh in a ta nungaah siangthou a kuul donga a leensah a, a tunga dihlou kisa a a pasal neih diing khawh a sahleh, hoih a sah bangin bawl heh, a bawlsual sih; pasal neisah mei heh.

³⁷Ahihvangin lah lungsim dettah pua a, a khawhna nei lou a, amah lungsim kithunun zou a, a ta nungaah siangthou kep zing a lungtang a tumpa’n chu a bawl hoih hi.

³⁸Huchi'n a ta nungaah pasal neisahpa’n a bawl hoih a; hizongleh pasal neisahloupa’n a bawl hoihzaw hi.

³⁹Ji chu a pasal a damsung siah daan a kaan ahi; hizongleh a pasal a sih inchu a deih phot a kiteenpih thei hi; Lalpa a um a hih phot inchu.

⁴⁰Hizongleh kei ngaihtuah danin chu a um ngeiin umleh nuam a sa zaw diing hi; huleh keima’n Pathian Hagau nei in zong ka kingaihtuah hi.