Read Simte KORINTHTE I 8 Bible Online

KORINTHTE I 8 - Simte bible

KORINTHTE I 8

¹Huleh milemte biahna silte tungtaang ahihleh koipouh in heetna i nei chiat uh chih i he uhi. Heetna in mi a kisatheisah a, hizongleh lungsiatna in mi a siam hoih hi.

²Mi koipouh in bang aha he a, a kingaihtuah inchu a heet diing bangin a he nailou ahi.

³Hizongleh mi koipouh in Pathian a lungsiat inchu, hu mi mah chu Amah heetin a um hi.

⁴Hujiahin milem biahna kithoihna silte neeh lam thu ahihleh, khovelah milem kichi bangmah ahi sih a, huleh khat chauh loungal Pathian dang a um sih chih i he uhi.

⁵Bang jiahin ahiai i chih leh, vaan ah aha, lei ah aha pathian chi a minvohte um mahleh uh (huchibang pathian tampi leh lalpa tampi a um uh),

⁶Eiuh diingin chu Pathian khat chauh, Pa chu a um a, amah a kuanin sil zousiah a um a, ei u’zong amah a um i hi uhi; huleh Lalpa khat chauh, Jesu Khrist a um hi, amah jiahin sil zousiah a um a, ei u’zong amah jiah a um i hi uhi.

⁷Ahiinlah hu heetna chu mi zousiah ah a um sih hi; ajiahchu khenkhat in tutanin milem biahna chu milem biahna banga ngai in na ne zing va, a sialepha heetna uh a haat louh jiahin a subolhhoh veu uhi.

⁸Hizongleh neeh in Pathian paahtaat ahung lohsah ahi sih hi; ajiahchu i neeh jiahun i hoihzaw uh ahi sih a, ne sih zonglei i sezaw uh ahi tuan sih hi.

⁹Hizongleh pilvaang un, huchilouin chu na zalenna uh bangchi aha in mi haatloute diingin puuhna ahung suaahkha diing hi.

¹⁰Bang jiahin ahiai i chih leh, heetna nei nang mi koiaha in milem biahna ankuang uum a tou hung mu taleh, amah sialepha heetna haatloupa chu milem biahna silte ne diing a haansan lohta lou diing ahiai mah?

¹¹Huchi'n na heetna jiahin unau haatlou, a sih luang a Khrist in a sihsah chu a mangthai diing hi.

¹²Hizongleh huchia unau tunga na sual va, a sialepha heetna haat lou uh na suhliamsah chiangun, Khrist tungah na sual uh ahi.

¹³Huchihjiahin, neehin ka unau a suhpuuh inchu, ka unau puuh louhna diingin bangchihtan in sa mawngmawng ka ne sih diing hi.