Read Simte KORINTHTE I 9 Bible Online

KORINTHTE I 9 - Simte bible

KORINTHTE I 9

¹Sawlleh hilou ka hiaimah? zalen hilou ka hiaimah? I Lalpa uh Jesu Khrist ka mu sih eimah? nanguh Lalpa a ka natoh hilou na hi viaimah?

²Midangte diingin sawlleh hi sih mah zongleng, nanguh diingin chu ka hi ngei mei hi; bang jiahin ahiai i chih leh Lalpa a ka sawlleh hihna chiamchihna chu nanguh na hi uhi.

³Kei hung enkhetute kawma ka dawnna chu hikhu ahi,

⁴Neehna diing leh dawnna diing thu nei lou ka hi viai mah?

⁵Sawlleh dangte leh, Lalpa unaute leh, Kipha banga unaunu khat kipuileh a, ji a nei thei lou ka hi viai mah?

⁶Ahihlouhleh, nna toh louhna diingin kei leh Barnaba chauh thunei lou ka hi viai mah?

⁷Sepaih koi ahiai amah neihsa seeng a gaalkuan ngei? grep hu an bawl ngal a, a gah ne lou koi a um ei? ahihlouhleh ganhon khawi ngal a, a nawi ne lou koi a um ei?

⁸Hi thute mihing ngaihdan chauha soi ka hiai mah? ahihlouhleh daanthu in zong humah a soi sih eimah?

⁹Ajiahchu Mosi daanbu ah, Bawngtal in buh a chil laiin a muuh kaan sin, chih gelh ahi. Pathian in bawngtalte diing chauh ngaihtuah ahiai mah?

¹⁰Ahihlouhleh ama’n eite diing jiah maha a soi ahiai mah? Eite diing jiaha gelh ahi tahzet hi; leilettu in kinemtahin a let diing ahi a; huleh kinem puma buhvotu in zong a kinepna chu a muh diing ahi.

¹¹Keiun na kawmva hagaulam silte tuh ka hih uleh, na tahsalam silte uh aat le’ung sil loupi ahiai mah?

¹²Midangte’n na tungva hi thuneihna tang ahih uleh, kei un zong ka tang sih diviai mah? Ahihvangin hi thuneihna ka zang sih uhi; Khrist tanchinpha ka daal louhna diingun bangkim ka thuaah zaw uhi.

¹³Sil siangthou a biahna natongte’n Pathian biahinn a silte a ne va, huleh maitaam a natongte’n maitaam a silte ah tan a nei uh chih na he sih viai mah?

¹⁴Huchimahbangin tanchinpha soitute chu tanchinpha maha a hin diing uh chi'n Lalpa’n a guat hi.

¹⁵Hizongleh ke’n chu hi silte khatbeeh ka zang sih; huleh hi silte ka tungah kibawlleh chia gelh zong ka hi sih hi; ajiahchu koiaha in ka kisuannapen bangmahlou a, a bawl sangin, kei di’n sih a hoihzaw hi.

¹⁶Bang jiahin ahiai i chih leh tanchinpha soi zongleng suan diing bangmah ka nei sih hi; bawl louh theih louh ka tunga kinga ahihjiahin; tanchinpha soi sih leng ka tung gih diing ahi.

¹⁷Ajiahchu hi sil ka utthu a bawl ka hihleh kipaahman muh diing ka nei hi; hizongleh ka utthu lou a bawl ka hih inchu tanchinpha kepna ka khut a piah ka hi diing hi.

¹⁸Huchi hileh ka kipaahman bang ahitai leh? Tanchinpha ka soi chianga tanchinpha a ka thuneihna a vuum a val a ka zat louhna diing a Khrist tanchinpha a man bei a ka umsah chu ahi.

¹⁹Ajiahchu mi zousiah apat zalen himahleng, mi tamsem ka laahluut theihna diingin mi zousiah suaahin ka kibawl hi.

²⁰Judate ka laahluut theihna diingin Judate kawmah Judami bangin ka um a; daan nuaia umte ka laahluut theihna diingin, daan nuaia umte kawmah daan nuaia umte bangin ka um hi, daan nuaia um lou himah zongleng.

²¹Daan neiloute ka laahluut theihna diingin, daan neiloute kawmah daan nei lou bangin ka um hi, Pathian daan nuaia um lou tuan louin, Khrist daan nuaia um ngal in.

²²Mi haatloute ka laahluut theihna diingin, mi haatloute kawmah haat lou bangin ka um hi; bangchizawng aha a mi khenkhat beeh ka hutdam theihna diingin mi zousiah kawmah sil bangkimin ka kibawl hi.

²³Nang u’toh tan ka neih theihna diingin tanchinpha jiahin hichu ka bawl ahi.

²⁴Kitaidemte chu a bawnun a tai va, hizongleh khat chauhin kipaahman a mu veu uh chih na he sih viai mah? Na tan theihna diingun huchibang mahin tai un.

²⁵Huleh koipouh kidemna a zoh tum mi chu sil zousiah ah a kideeh veu uhi. Amahun vang lallukhuh sethei muhna diingin a bawl uh ahi a; eite’n chu lallukhuh sethei lou diingin ahi.

²⁶Hujiahin huchimahbangin ka tai a, jiah bei hilou in; a guaahpi tuum hilouin ka pang hi.

²⁷Hizongleh ka sapum ka sawi a, ka thu nuaiah ka koih hi; huchilouin chu midangte kawma tanchinpha ka soi zoh nungin keimah houh paihkhiah in ka umkha diing hi.