Read Simte KORINTHTE II 11 Bible Online

KORINTHTE II 11 - Simte bible

KORINTHTE II 11

¹Ka ngol deuhna ah nangun na hung thuaahtheih uh ka deih hi; huleh na hung thuaahthei ngei uh.

²Bang jiahin ahiai i chih leh Pathian thangsiatna in na tungvah ka thangsia hi; ajiahchu Khrist kawma nungaah siangthou banga ka hung piah theihna diing in, na pasal diing uh khat ka hung hualsah hi.

³Hizongleh guul in a doha a Evi a heem bangin, Khrist a tahna leh siangthouna apat bangchi ahakhat in na lungsim uh suhsiatin a umkha diing ka lauthawng hi.

⁴Ajiahchu ahung penin ka soi louh uh Jesu dang a soi a, na muh ngei louh uh hagau dang na muh va, ahihlouhleh na pom ngei louh uh tanchinpha dang na pom va ahihleh amah chu na ngaisiam uhi.

⁵Bang jiahin ahiai i chih leh sawlleh lianpen tahpa sanga nengtakhata zong neuzawin ka kingaihtuah sih hi.

⁶Himahleh thusoi ah kamsiam sih zongleng heetna lamah chu ka huchi sih hi; hizongleh sil bangkimah na lahvah suhlatin ka um uhi.

⁷Na kawmva Pathian tanchinpha a thawn a ka soi a, tawisang a na um theihna diing va ka kisuhngiam in sil bawlsual ka hiai mah?

⁸Nanguh nna ka hung tohsah theihna diingin, amahuh apat loh la in, kouhtuam pawl dangte chu a neih uh ka laahsah hi.

⁹Huleh na kawmva ka umlai a, ka taahsap in, koimah ka hung subuai sih hi; ajiahchu Makedonia gam apat hung unaute’n ka taahsap awng ahung huhsah uhi; huleh sil bangkimah nanguh subuai lou diingin ka kibawl a, huchi bangin ka kibawl jel diing hi.

¹⁰Khrist thutah keimaha a um jiahin, Akaia gam sunga hi ka kisuanna chu koima’n ahung sutawp sih diing hi.

¹¹Bangchih jiahin? nanguh ka hung lungsiat louh jiahin maw? Pathian in a he hi.

¹²Hizongleh lemtaanna deihte apat lemtaanna ka saattan theihna diingin, ka bawl chu ka bawl jel diing hi; a kisuanna va keiuh banga ahung um theihna diingun.

¹³Bang jiahin ahiai i chih leh huchibang mite chu Khrist sawllehte a kibawlthuh, natongtu heemhaatte, sawlleh tahloute ahi uhi.

¹⁴Huleh hichu a limdang sih; ajiahchu Setan ngei zong vaah sawllehin ana kibawlthuh hi.

¹⁵Hujiahin a natongtute zong dihtatna natongtute in kibawl le uh huchu sil loupi ahi sih hi; a tawpna u’chu a natoh bang dungjuiun ahi diing hi.

¹⁶Ka soi kiit ahi, koima’n mingolin hung ngaihtuah sih uheh; ahih louh vanglah leh, keimah neukhat beeh ka kisuan theihna diingin mingol bangin hung pom un.

¹⁷Ka thusoi chu Lalpa bangin ka soi sih a, hi kisahtheihna ah ngoltah bangin ka soi zaw hi.

¹⁸Mi tampi tahsalama a kisuan jiahun kei zong ka ki suang diing hi.

¹⁹Ajiahchu nanguh mipil na hi va, mingolte kipaahtahin na thuaah zou jel uhi.

²⁰Bang jiahin ahiai i chih leh mi’n suaah in hung bawl le uh, hung negam le uh, hung hingmat le uh, amah leh amah kiliansah le uh, na maai vah hung beeng le uh, na thuaah zou jel uhi.

²¹Haatlou ka hi uh chitobangin, keimah kisit in ka soi ahi. Hizongleh midang ngamna ah chu (mingol bangin ka soi ahi), kei zong ka ngam ahi.

²²Hebraimi ahi u'maw? Kei zong ka hi. Israelte ahi u'maw? Kei zong ka hi. Abraham haahte ahi u'maw? Kei zong ka hi.

²³Khrist natongtute ahi u'maw? (mingol bangin ka soi ahi, ) kei ka hi sem hi; tohgimna bangah a tamzaw sem in, vuaahna bangah a tuang a val in, suangkul taanna bangah mun semin, sihna bangah tampi vei.

²⁴Judate lahah vuaah na sawmli chinna diing khata sam ngaavei ka tuaah a.

²⁵Thumvei chianga jepin ka um a, khatvei suang a seh in ka um a, thum vei kuang siatna ka tuaah a, jan khat leh suun khat tuithuuh laiah ka um a;

²⁶Khualzinna ah tampivei, tuitung a lauhuai ah, suamhaatte laha lauhuai ah, ka chipihte laha lauhuai ah, Jentelte laha lauhuai ah, khopi sunga lauhuai ah, gamdai a lauhuai ah, tui khang lian a lauhuai ah, unau tahloute laha lauhuai ah;

²⁷Tohgimna leh hahsatna ah, tampivei ihmut louhna ah, gilkialna leh dangtaahna ah, tampivei anngawlna ah, dap thuaahna leh saguah na ah.

²⁸Polama hu silte chih louh zong, kouhtuam pawlte ka ngaihtuahna nichina hung net zing ka tungah a um hi.

²⁹Koi haat louhna ka haat louhpih a um ei? koi puuhna ka tawmpih louh a um ei?

³⁰Ki suang diing ka hih taah a leh ka haat louhna lam silte ka suang diing hi.

³¹Pathian leh i Lalpa uh Jesu Khrist Pa, kumtuanga paahtawi a um in ka zuau louh a he hi.

³²Damaska ah kumpipa Areta nuaia gamoptupa’n kei hung matsah tum in Damaskate khopi a veengsah a;

³³Huleh kotta ah bawmin kulhpangah ahung khaikhesuh va, huchi'n a khut apat ka suaahtata hi.