Read Simte KORINTHTE II 12 Bible Online

KORINTHTE II 12 - Simte bible

KORINTHTE II 12

¹Kei diingin kiuahsah phatuam sih tamahleh; Silmuh leh Lalpa kilaahna ka hung soi diing hi.

²Kum sawmleli ahita, Khrist a um mi khat ka he a, (sapum in ahiai a um ka he sih; sapum louin ahiai a um ka he sih; Pathian in a he hi; ) huchibang mi khat chu vaan thumna tanah laahtouhin a um a.

³Huleh huchibang mi khat chu ka he a, (sapum in ahiai, sapum louin ahiai a um ka he sih; Pathian in a he hi; )

⁴Amah chu paradis ah laahtouh in a um a, mihing diing a soi sianglou, soi guallouh thu a va ja hi.

⁵Huchibang mi chu ka suang diing hi; keimah ka hihleh, ka haatlouhna loungal ka suang sih diing hi.

⁶Ajiahchu kisuan ut mahleng mingol ka hi sih diing; thutah soi diing ka hi ngal a; hizongleh mi koi aha in ahung muh bang leh ka thu a jah bang sanga ahung ngaih loupi louhna diingin ka kideeh diing hi.

⁷Huleh kilaahnate nasat beehseehna jala ka kingaihsang taatluat louhna diingin, Setan sawlleh ahung tuum diing ling khat ka tahsa ah ahung kipia hi; huchilouin chu ka kingaisang talokha diing hi.

⁸Kei apat a chiahmangna diingin, hi sil jiahin Lalpa kawmah thumvei ka ngen a.

⁹Huleh ama’n ka kawmah, Ka hehpihna nang a diingin a huntawh hi; ajiahchu ka haatna chu haat louhna ah suhbukim in a um hi, a chi a. Hujiahin Khrist silbawltheihna ka tunga a um theihna diingin, kipaahtahin ka haatlouhnate ka suang zaw diing hi.

¹⁰Hujiahin haat louhnate ah, suhduhdahnate ah, taahsapnate ah, sawihnate ah, hahsatnate ah Khrist jiahin ka kipaah hi; ajiahchu ka haat louh hun tahchiangin ka haat hi.

¹¹Kiuahsahna in mingol ka hung suaahta; nangun huchilou thei louin na hung bawl uhi; ajiahchu na hung paahtawi zawh diing uh ka hi a; bang jiahin ahiai i chih leh bangmah hi sih zongleh sawlleh lianpentahpa ka phaahlelhna bangmah a um sih hi.

¹²Tahzetin sawlleh hihna chiamchihnate chu kuhkalna chintengin, chiamchihnate in, silmahte in, silbawl loupite in na lahvah bawl ahi.

¹³Bang jiahin ahiai i chih leh ke’n nanguh ka hung suhbuai louh chih louh, bang lamah ahiai kouhtuam pawl dangte sanga nuainungzaw a na um uh? hi suhkhelhna hung ngaidam un.

¹⁴Ngai un, na kawmva hung diing a ka kipeih a thum veina diing ahi; ka hung subuai sih diing hi; bang jiahin ahiai chihleh na sil neih uh hawl ka hi sih a, nanguh hung hawl ka hi zaw hi; ajiahchu tate’n nulepa diing a, a kholkhawm diing uh ahi sih a, nulepate’n tate diing a, a kholkhawm diing uh ahi zaw hi.

¹⁵Huleh ke’n chu nanguh diingin kipaahtahin ka seeng diinga, ka kiseeng bei diing hi; ke’n nanguh hung lungsiat sem in, nangun kei hung lungsiat moh sem zongleh u’chin.

¹⁶Hizongleh ahi hi hitaleh, nanguh ka hung subuai sih hi; ahihvangin lungsim siam a doha a ka hung mat na hi uhi.

¹⁷Na kawmva ka hung sawlte laha koiaha zangin nanguh apat punna ka siamkha eimah?

¹⁸Tita chu na kawmva hung diingin kana deih ngei a, huleh amah toh unaupa khat ka hung sawl hi. Tita in nanguh ah punna a siamkha moleh? hagau kibangin ka gamtakhawm sih viai mah? kalsuan kibanga chiah hilou ka hi viai mah?

¹⁹Na lahva kei uleh keiuh kiphelhna diing hawl a hung ngaihtuah na hi u'maw? Khrist ah Pathian ma ah thu ka soi uh; hizongleh deihtahte, sil zousiah chu nanguh hoihna diingin ka bawl uhi.

²⁰Bang jiahin ahiai i chih leh ka hung chianga nanguh ka hung muh diing banga ka hung muh louhkha diing leh, kei na hung muh louh diing bang va na hung muh khaah diing ka lau hi; huchilou inchu kinialnate, kithangsiatnate, lungthahnate, kikhinnate, kisoisiatnate, kiguuhhounate, uanghaamnate, huleh buainate ahung umkha diing hi.

²¹Huleh ka hung kiit chiangin ka Pathian in na lahvah hung sumualphou in, tuma a na sualta sa, hizongleh si an louhna leh kingaihna leh huuhnate ana bawltaah vapat kisiih lou mi tampite ka kahkhumkha diing hi.