Read Simte KORINTHTE II 13 Bible Online

KORINTHTE II 13 - Simte bible

KORINTHTE II 13

¹Hichu na kawmva ka hung a thumveina diing ahi. Heetpihtu nih leh thum kamah thu chinteng suhkip in a um diing hi.

²Tuma in ka hung hilhta hi, a nihveina a na kawmva ka umlai a ka soi bangin, tuin na kawmva um louin, tumalama sil bawlsualte leh midang zousiah kawmah ka hung ma soi ahi, ka hung kiit inchu ka hawi sih diing hi.

³Nangun Khrist, keimaha thusoi chu heetchi ana na bawl jiahun, amah nanguh lamah a haatlou sih a, na lahvah silbawltheitah ahi zaw hi.

⁴Bang jiahin ahiai i chih leh haatlouhna jalin kilhbeh in um mahleh, Pathian silbawltheihna in a hing zing ahi. Ajiahchu keiuh zong amah ah haat lou ka hi va, hizongleh Pathian silbawltheihna in nanguh lamah amah toh ka hingkhawm diing uhi.

⁵Ginna ah na umna viai mah nang uleh nanguh kienkhia unla; nanguh mimal kienchian un. Nang u’ah Jesu Khrist a um chih nanguh ngei in kiheet lou na hi viai mah? deih louh na hih louhngal uleh.

⁶Hizongleh kei u’chu deih louh ka hi sih uh chih na he diing uh chih ka gingta hi.

⁷Huleh silgilou na bawl louhna diingun Pathian kawmah ka ngen hi; huchu keiuh deihhuai a ka kilat theihna diing uh ahi sih a, nangun keiuh deih louh hitamah le’ung, a kilawm photmah na bawl theihna diing uh ahi zaw hi.

⁸Ajiahchu thutah a diing chih louh chu, thutah dou diingin bangmah ka bawl thei sih uhi.

⁹Bang jiahin ahiai i chih leh keiuh ka haat louh va, nanguh na haat chiangun ka kipaah uhi; huleh na hoih bukimna diing u’zong ka ngen veu uhi.

¹⁰Hujiahin suse diing hilou a, bawl hoih diing zaw a Lalpa hungpiah thuneihna dungjuia ka hung vau louhna diingin, na kawmva ka um louh laiin hi silte ka hung gial hi.

¹¹A tawp pen in, unaute, kipaahtahin um un. Hoihbukim in um unla, hamuangtahin um unla, lungsim munkhat pua unla, kituaahtahin um un; huleh lungsiatna leh hamuanna Pathian na kawmvah a um diing hi.

¹²Kitawp siangthou in khat leh khat chibai kibuuh un.

¹³Misiangthoute zousiah in nanguh chibai ahung buuh uhi.

¹⁴Lalpa Jesu Khrist hehpihna leh, Pathian lungsiatna leh, Hagau Siangthou kipawlpihna na bawnva tungah umta hen. Amen.