Read Simte KORINTHTE II 3 Bible Online

KORINTHTE II 3 - Simte bible

KORINTHTE II 3

¹Kei uleh keiuh kisoiphapan kiit ka hita viaimah? Ahihlouhleh, kei un midangte bangin, na kawmvah, ahihlouhleh, nanguh apat, soiphatna lehkha poimoh, ka hi viaimah?

²Nang u’chu ka lehkhathot uh, ka lungtang va gelh, mi zousiah heet leh sim na hi uhi.

³Khrist lehkhathot, keiuh gelh, lehkhatui a gelh hilou a, Pathian hing Hagau a gelh; suang peeh a gelh hilou a, tahsa lungtang peeh a gelh na hi zaw uh chih chiantah a suhlat na hi uhi.

⁴Huleh huchibang muanna Khrist jalin Pathian lamah ka nei uhi;

⁵Bang sil ahakhat keiuh apat ahi chi diingin keiuh chauhin ka chin sih va; ka chinna u’chu Pathian a kuan ahi zaw hi.

⁶Ama’n chu keiuh thuhun thah natong thei diingin ahung bawl a; lehkhajem a hilou in, Hagau a natong diingin ahi zaw; ajiahchu lehkhajem in a sulum veu a, Hagau in chu hinna a pia hi.

⁷Hizongleh suhbei a um diing loupina a suhloupi a a um jiaha Israel tate’n Mosi maaitang entang thei lou khopa sihna natohna, suangpeeha sut a gelh bawn a loupi inchu;

⁸Hagau natohna chu bangchi'n a loupizaw lou thei diai?

⁹Ajiahchu siamlouh tansahna natohna bawn a loupi inchu, dihtatna natohna chu nasatahin a loupizaw diing hi.

¹⁰Bang jiahin ahiai i chih leh loupina umsa chu loupina na sazaw in a khumkhel jiahin hilam thu ah chu loupina a nei nawn sih hi.

¹¹Ajiahchu suhmanga um bawn a loupi a ahihleh, a um zing khu chu nasatahin a loupizaw sem ahi.

¹²Hutobang kinepna ka neih ziahun, haangtah a thusoi ngamna ka nei uhi.

¹³Huleh a kiam hiaihiai chu a tawptana Israel tate’n a et tang theihlouhna diing va a maaitang puan a khuh Mosi bang chu ka hi sih hi.

¹⁴Hizongleh a lungsim uh suhmial in a um a; ajiahchu tuni tanin thuhun lui a sim chiangun hu maaikhuhna chu hawhkhiah louhin a um zing a; hu maaikhuhna chu Khrist ah suhbei in a umta hi.

¹⁵Hizongleh tuni tanphain, Mosi lehkhabu a sim chiangun, a lungtang vah maaikhuhna chu a um zing hi.

¹⁶Ahihvangin Lalpa lama a kihei phaatphaat chiangun hu maaikhuhna chu laahmang ahita diing hi.

¹⁷Huleh Lalpa chu hu Hagau ahi a; Lalpa Hagau umna photah zalenna a um hi.

¹⁸Hizongleh ei uchu i bawnun, maai khuhlouh in, limlanga muh banga Lalpa loupina chu en zingin, huto kibang ngei a um diingin Lalpa Hagau in loupina apat loupina ah ahung sulimdang zing hi.