Read Simte KORINTHTE II 5 Bible Online

KORINTHTE II 5 - Simte bible

KORINTHTE II 5

¹Bang jiahin ahiai i chih leh hi puanbuuh i lei inn uh suhsiat in um mah zongleh, khut a bawl hilou, Pathian khut a kuan kumtuang inn det vaan ah i nei uh chih i he uhi.

²Ajiahchu vaan akipan a i inn diing uh silhthuaahsaha um ut mahmah in hi sungah i thuum zing uhi.

³Huchibang a silhthuaahsaha i um inchu saguah in i um sih diing uhi.

⁴Ajiahchu eiuh hi puanbuuha umte chu puaahgih pua in i thuum zing uh; silhlou a i umna diingun hilou in, si thei chu hinna valhzoha a um theihna diing a silhthuaahsaha i um ut jiahin ahi zaw hi.

⁵Huleh hukhu diing a eiuh hung siamtu chu Pathian ahi a, khaamna Hagau hung petu zong ahi.

⁶Hujiahin sapum inn a i um laisiah uh, Lalpa kawma um lou i hi uh chih he in, bangchih laipouhin muangtahin i um uhi.

⁷(Ajiahchu muhtheiha pailou in, ginna in i paizaw uhi).

⁸Muangtahin i um uh, ka chi ahi, sapum a um lou a, Lalpa kawma um i utzaw uhi.

⁹Huchihjiahin um in um lou zong lehang amah kipaahpih zawng i hihtheihna diingun i tonggim uhi.

¹⁰Bang jiahin ahiai i chih leh mi chinin a sapum a a silbawlte asia apha, a bawl bang banga a muhtheihna diingin Khrist vaihawmna touphah ma-ah i bawnun suhlat in i um diing uhi.

¹¹Hujiahin Lalpa lauhuaidan he in mite ka zawl teitei uhi; hizongleh Pathian kawmah suhlat in ka um va; huleh na sialepha heetna va suhlat a ka um uh zong ka kinem hi.

¹²Ajiahchu na kawmvah ka hung kisoipha kiit uh ahi sih a; lungsung lama hilou a, a polaang a ki suang te na dawnna diing uh bang aha na neih theihna diingun, keiuh lama kisuan theihna hung bawlsah in ka soi zaw uhi.

¹³Bang jiahin ahiai i chih leh ka ngol uleh Pathian a diing in ahi a; ka pil uleh nanguh diingin ahi.

¹⁴Khrist lungsiatna in ahung sawl teitei hi; ajiahchu hichi'n ka ngaihtuah uhi, mi zousiah sih luang a mi khat a sih inchu, mi zousiah si ahita hi.

¹⁵Huleh a hingte zong amahuh diinga a hin nawn taahlouh va, a sih luang va si a, huleh thou kiitpa a diinga a hin zawhna diingun, amah chu mi zousiah diingin a si ahi.

¹⁶Huchihjiahin tukalsiah chu tahsalamah koimah ka he nawn sih uhi; ahi, tahsadan in Khrist na he zong le’ung, tuin chu ka he nawn sih uhi.

¹⁷Hujiahin mi koipouh Khrist a, a um inchu, silsiamthah ahita hi; sil luite a beita a; ngai un, sil zousiah ahung thah vehta hi.

¹⁸Huleh sil zousiah chu Pathian a kuan ahi a, ama’n Jesu Khrist in amah toh kilem in ahung bawl a, huleh ka kawmvah kilepna natohna ahung pia hi.

¹⁹Huchi'n Pathian chu Khrist a um in, khovel amah toh kilem in a bawl a, a tatsualnate uh tatsualna a sehsah louin; ka kawmvah kilepna thu ahung kolsahta hi.

²⁰Hujiahin kei u’chu Khrist palaite ka hi va, Pathian in keiuh manga nanguh hung ngen bangin, Pathian toh kilem un chi'n, Khrist luang in ka hung ngen uhi.

²¹Ajiahchu amah a Pathian dihtatna i hung hihtheihna diingin, sualna mawngmawng he lou amah chu Pathian in eiuh jiahin sual in a bawlta hi.