Read Simte KORINTHTE II 8 Bible Online

KORINTHTE II 8 - Simte bible

KORINTHTE II 8

¹Huchiangleh unaute, Makedonia gam a kouhtuam pawlte tunga Pathian hehpihna piah chu ka hung hesah diing hi;

²Huchia hahsatna a ze-etna loupi a a kipaahna uh dimlet leh, a zawn mahmah na u’chu a silphalna loupi uh ahung hihdan chu.

³Ajiahchu ahih zoh bangun, ahi, ahih zoh saang va zong loupizaw in, amahuh utthutah in a pia uhi chih ka heetpih hi;

⁴Hu silpiah chu pomsah diingin leh, misiangthoute natohna a, a tel theihna diingun hah nget in ahung ngen uhi.

⁵Huleh hichu ka kinep bang va hilou in, Pathian deihlam in, amahuh mahmah Lalpa kawm ah leh keiuh kawmah a kipe masa phot uhi.

⁶Huchi'n tuma a, a patsa, hu hehpihna chu na lahva bawl zou diingin Tita chu ka ngen hialta uhi.

⁷Hujiahin sil bangkim a, ginna a, thusoitheihna a, phatuamngaihna zousiaha, huleh keiuh na hung lungsiatna va na hauh bangun, hi hehpihna a zong na hauh na diinguh ngaihtuah un.

⁸Thupia bangin chu ka soi sih a, midangte phatuamngaihna in, na lungsiatna uh tahzia zong chiansah diingin ka soi ahi zaw hi,

⁹Ajiahchu i Lalpa uh Jesu Khrist hehpihna chu na he uh; a gentheihna jiaha na hung hauhsat theihna diingun, amah chu hausa mah zongleh, nang u’ jiahin ahung gentheita hi.

¹⁰Huleh hi-ah ka hoihsahdan ka soi ahi; ajiahchu hikhu nanguh diingin a hoih hi, kumkhat ma a bawlpan masa na hi va, na bawlpat chauh uh hilou in, phatuamngaih zong na ut uhi.

¹¹Hujiahin ut diing a kipeihna a um bangin, na neih bang jel va taangtunna zong a um theihna diingin, tuin bawltaangtungta un.

¹²Ajiahchu utna lungsim a um masat photleh, mi a neih louhdan dungjui a hilou in, a neihdan dungjui a pomsah ahi.

¹³Ajiahchu midang a gim louh va, nanguh na gimna diingun ka chi ahi sih hi.

¹⁴Hizongleh tuhuntaha na neih val u’chu amahuh taahsap awnghuhna ahung hih a, amahuh neih val zong nanguh taahsap awnghuhna ahung hih theihna diing in, kibatgualna diing in ka chi ahi zaw hi; huchi'n kibatgualna ahung um thei diing hi.

¹⁵A lakhawm tam in a val in a nei sih a, a lakhawm tawm in lah a tasam tuan sil, chih gelh bangin.

¹⁶Hizongleh na tungva huchibang mah phatuamngaihna Tita lungtang a umsahtu Pathian kawmah kipaahthu um heh.

¹⁷Ajiahchu keiuh chiilna mang chu ahi ngei a; hizongleh amah mawng a phatuamngai a, amah utthu a na kawmva hung ahi.

¹⁸Huleh amah toh tanchinpha lama a phatna thu kouhtuam pawt zousiah a kithang unaupa chu ka hung sawl uhi.

¹⁹Huleh huchi chauh zong hilou in, Lalpa loupina diing leh, ka lungsim kipeihdan uh etsahna a, a nna ka toh uh, hi hehpihna thu a kei u’toh zinkhawm jel diing a kouhtuam pawlte guatsa mawng ahi.

²⁰A nna ka toh uh, hi silpiah tampi lam thu a koima’n ahung dem louhna diing va pilvaang in;

²¹Lalpa mitmuh chauh ah hilouin, mihing mitmuh ah zong sil kilawm ka ngaihtuah jel uhi.

²²Huleh amahuh toh i unaupa uh ka sawl va, amah chu sil tampiah a phatuamngaihdan ka hechianta va, tu diahin na tungva tahsanna liantah a neih jiahin phatuam a ngai nasa sem ahi.

²³Tita tungtaang thu ahihleh, amah hi nanguh lam thu a ka lawm leh ka natohpih ahi; huleh i unaute uh ahihleh, kouhtuam pawlte thupotu leh Khrist loupina ahi uhi.

²⁴Hujiahin amahuh kawm leh kouhtuam pawlte ma-ah na lungsiatna uh heetchi ana leh nanguh ka hung suanna u’chu ensah un.