Read Simte GALATIATE 2 Bible Online

GALATIATE 2 - Simte bible

GALATIATE 2

¹Huin kum sawm leh kum li nungin Barnaba toh Jerusalem ah ka chiahtou kiit a, huleh Tita zong ka pui uhi.

²Huleh kilaahna dungjuiin ka chiah tou a, Jentelte kawma ka tanchinpha soi chu a kawmvah ka hilh a, hizongleh mi zahum deuhte chu a tuamin ka hilh hi, huchilou inchu bangchi aha in a thawn a tai ka hikha diing hi.

³Hizongleh ka tonpih Tita chu Grik mi ahihvangin zehtansah teitei in a um sih hi.

⁴Huleh huchu suaah ahung tansah theihna diing va, Khrist Jesu a i zalenna neih uh enkhe diing a guuhsima hung luut unau tahloute jiah giap ahi.

⁵Tanchinpha thutah chu na kawmva a um zing theihna diingin pung khat sung jiang zong a thunuai va kipeluut lou hial ka hi uh.

⁶Hizongleh mi zahum deuh a kisoite lahah chu (bangtobang hita le uh kei diingin a poi sih; Pathian in koimah deihsah tuam a nei sih) mi zahum deuh a kisoite’n bangmah ahung soisah tuan sih uhi.

⁷Soisah naah sangin, zehtante tanchinpha Peter kawma kepsah a, a um bangin zehtan louhte tanchinpha ka kawmah kepsah in a um chih a he uhi.

⁸Ajiahchu zehtante sawlleh hi diing a Peter a silbawltu ngei in, Jentelte sawlleh hi diingin keimah ah sil nasatahin a bawl hi.

⁹Huleh khuam bang hial a um Jakob leh Kipha leh John in ka kawma hehpihna hung kipia a heet phetun, keiuh Jentelte kawma chiah a, amahuh zehtante kawma chiah diingin kei leh Barnaba chu kipawlkhawmna khut jiatlam ahung pia uhi.

¹⁰Migentheite ka heet zing uh a deih va, huchu ke’n zong bawl ka tup zing mawng ahi.

¹¹Hizongleh Antiok khua a Peter a hung in demna a um jiahin a maaitang ah kana salh hi.

¹²Ajiahchu ama’n Jakob kawm apata mi koite aha ahung ma un Jentelte kawmah an a ne veu a; hizongleh amahuh a hungtahun zehtante a lau jiahin a nungtawl a, a um tuamta hi.

¹³Huleh Judami dangte zong huchibangin amah toh a lepchiah va; huchi'n Barnaba nasan zong a lepchiahna va puimang in a umta hi.

¹⁴Hizongleh tanchinpha thutah bangin a um sih uh chih ka muh in, Peter kawmah, a bawnva ma ah, Nang Judami hi a, Judate um banga um lou a, Jentelte um banga na um ngal leh, bang diinga Jentelte Judami um banga umsah tum na hiai mah? ka chi a.

¹⁵Kei u’chu Jentel misualte hilou in, Judami mawng a piang ka hi uh.

¹⁶Daan silte bawl jiahin mi siamtang in a um sih a, Jesu Khrist gintaat jiah chauhin siamtang in a um uh chih i he a, en zong daan silbawl jiah hilou a, Khrist ginna jiaha siamtang a i um theihna diingin Khrist Jesu chu i gingta ahi; ajiahchu daan silte bawl jiahin koimah siamtang in a um sih diing hi.

¹⁷Hizongleh Khrist ah siamtang a um tum kawmpi a eimah ngei zong misualte i na hih leh, hujiahin Khrist sualna natongtu ahiai mah? Hi dawilou.

¹⁸Keima’n ka sil suhsiatte bawlpha kiitta leng, daan botsetu ka hi chih ka kihesah phet ahi diing hi.

¹⁹Ajiahchu Pathian lama ka hin theihna diingin, kei chu daan jiahin daan lamah ka sita hi.

²⁰Khrist toh kilhbeh in ka um hi; hizongleh ka hing ahi; keimah hing hi nawn louin, Khrist keimah ah a hing ahi zaw hi; huleh tu a tahsa a ka hin chu, ahung lungsiat a ka luang a kipepa Pathian tapa ginna a hing ka hi.

²¹Pathian hehpihna chu bangmahlou ka suaahsah sih; ajiahchu daan jiaha siamtanna a um inchu Khrist a thawn a si ahi diing hi.