Read Simte GALATIATE 3 Bible Online

GALATIATE 3 - Simte bible

GALATIATE 3

¹Aw Galatia mingolte, na lahva, na mitmuh ngei va Jesu Khrist chu kilhbeh a chiantah a kipuangta, hu thutah chu jui lou diing a kua’n hung bumngol ahitai?

²Na lahva kipan hi chauh ka he nuam hi, Daan silte bawl jiahin ahiai Hagau chu na muh uh, ahihlouhleh na ngaihkhiah va na gintaat jiahun?

³Hichi lawmin na ngol uh ahi maw? Hagau a pan zouta in, tahsa a subukim diing na hi uh maw?

⁴Sil huzahpi a thawn a thuaah na hi viai mah? a thawn bang hitaleh.

⁵Hujiahin na kawmva Hagau hung petu leh, na lahva silmah bawltu in daan silte bawl jiahin ahiai a bawl, ahihlouhleh na ngaihkhiah va na gintaat jiahun?

⁶Abraham in Pathian a gingta a, huchu a dihtatna a sehsah ahih mahbangin.

⁷Hujiahin ginna a umte, hute mah chu Abraham tate ahi uh chih he un.

⁸Huleh Pathian lehkhathu in, ginna jiahin Pathian in Jentelte siam a tangsah diing chih helawh in, Abraham kawmah, Nangmah ah nam zousiah vangpiahin a um diing uh, chih tanchinpha ana soita hi.

⁹Huchi ahihjiahin ginna a umte chu mi ginum Abraham toh vangpiahkhawm in a um uhi.

¹⁰Bang jiahin ahiai i chihleh daan silbawlte a um photmahte chu haamse nuai a um ahi uh; ajiahchu hichibanga gelh ahi, Daanbu a bawl diing a kigial zousiah jui zing lou chu haamsiat in a um uhi.

¹¹Hizongleh Pathian mitmuh in koimah daan a siamtang a um sih uh chih a lang chian hi; ajiahchu, Midihtat chu ginna in a hing diing, chih ahi.

¹²Huleh daan chu ginna a suaah ahi sih a, hizongleh, Huchibang a bawltu chu hute ah a hing diing hi, chih ahi zaw hi.

¹³Khrist chu ei luang a haamsiata hung um in, daan haamsiatna apatin ahung tandohta hi; ajiahchu hichibanga gelh ahi, Singdawna khailup photmah chu haamse thuaah ahi uh.

¹⁴Huchi'n Abraham tunga vangpiahna chu Jesu Khrist jala Jentelte tunga ahung um a, eihawn Hagau chiam chu ginna jala i muhtheihna diingun ahi.

¹⁵Unaute, mihing daanin ka soi ahi; hichu mihing thuhun hitamahleh, suhkip ahih inchu koima’n a phel ngei sih a, beh zong a behlap ngei sih uhi.

¹⁶Huleh Abraham leh a haah kawmah ahi thuchiam chu na kipia. Ama’n tampite soina bangin, Chihaahte kawmah, a chih sih a, mi khat tungthu soi bangin, Na chihaah kawmah, a chih zaw hi, huchu Khrist ahi.

¹⁷Huleh hichu ka soi ahi, Pathian in Khrist a, a suhkipsa thuhun chu, kum ja li leh kum sawmthum nunga hung um daanin thuchiam chu bangmahlou suaah diingin a sumang thei sih hi.

¹⁸Gouluah diing chu daan jiah ahihleh, thuchiam jiah ahita sih diing hi; hizongleh Pathian in thuchiam jiahin Abraham ana peta hi.

¹⁹Ahihleh bang diinga daan um ahiai leh? Hichu, chihaah, a kawma thuchiam piah a umpa ahung masiah, bohsiatna jiahin behlap in a um a, angelte zanga palai khut a suhkip ahi.

²⁰Huleh palai chu mi khat chauh palai ahi sih a, Pathian ahihleh khat ahi.

²¹Ahihleh daan chu Pathian thuchiam kalh ahiai mah? Hi lou hial; hinna pe thei daan ana kipeta hitaleh siamtansahna chu daan jiahin a um ngei diing hi.

²²Hizongleh Jesu Khrist gin jiaha thuchiam chu a gingtate a kipiah theihna diingin, Pathian lehkhathu in mi zousiah sualna nuaiah a khaahkhumta hi.

²³Hizongleh ginna ahung tun ma in daan nuai a kol in ina um a, hung kilang diing ginna ah khaahkhum in i na um uhi.

²⁴Huchi'n daan chu, ginna jiaha siam i tantheihna diing a Khrist kawma hung pui diing, i hilhtupa uh ana hi hi.

²⁵Hizongleh ginna ahung tun nungin hilhtupa nuaiah i um nawnta sih uhi.

²⁶Ajiahchu na bawnun Khrist Jesu ginna jiahin Pathian tate na hi uhi.

²⁷Bang jiahin ahiai i chihleh na lahva Khrist a baptisma tang photmah chu Khrist a kithuam na hita uhi.

²⁸Huah chu Judami, Grik mi a um nawn sih; saltaang leh zalen zong a um nawn sih; huleh pasal leh numei zong a um nawn sih hi; ajiahchu na bawnun Khrist Jesu ah pumkhat na hita uhi.

²⁹Huleh Khrist a na hih unchu, Abraham haah, thuchiam dungjui a gouluah diingte na hi uhi.