Read Simte GALATIATE 5 Bible Online

GALATIATE 5 - Simte bible

GALATIATE 5

¹Hujiahin suaah hi nawn lou diing a Khrist in ahung zalensahna ah ding kip unla, suaah ngawngkol ah taang kiit nawn sih un.

²Ngai un, kei Paul in na kawmva ka soi ahi, zeh na tan uleh Khrist nanguh diingin bangmah phatuam lou diing ahi.

³Ajiahchu zehtante zousiah kawmah, daan zousiah juih diing na bat ahi, chih ka hung hesah kiit hi.

⁴Nanguh, daan a siam kitangsah pouhmahte, Khrist chu nanguh diingin a phatuam lou ahita a, hehpihna na puuhsanta uhi.

⁵Ajiahchu kei un Hagau jalin ginna a siamtanna kinepna chu ka ngaah uhi.

⁶Bang jiahin ahiai i chihleh Jesu Khrist ah zehtan bangmah a phatuam sih a, zehtan louh zong bangmah a phatuam sih hi; lungsiatna a tong ginna chu a phatuam hi.

⁷Hoihtahin na tai uh ka sa a, thutah jui lou diingin kua’n ahiai nanguh hung daal?

⁸Hi heemna chu nanguh hung koutu apat ahi sih hi.

⁹Tol tawmtakhat in tanghou beupi a jelsuaah hi.

¹⁰Nangun lungdang na geel sih diing uh chih Lalpa ah ka hung muang hi; hizongleh nanguh hung subuaitu in, koi hita zongleh, a tunga thupuuh chu a thuaah diing hi.

¹¹Huleh unaute, ke’n zehtan thu soi nalai hileng, bang diinga sawihna thuaah nalai ka hiai? Huchi ahihleh kros a kipalpuuhna chu suhbei ahita diing hi.

¹²Nanguh hung subuaite kisaatkhe hial maileh ka ut hi.

¹³Ajiahchu, unaute, zalen diing a kou na hi uh a, na zalenna uh tahsa diing a lemtaanna in zang sih unla, lungsiatna in khat leh khat nna kitohsah zaw un.

¹⁴Ajiahchu, nangmah na kilungsiat bangin na inn veengte na lungsiat diing ahi, chih thuteng khatah daanthu zousiah suhbukim in a um hi.

¹⁵Hizongleh na kikeih va, na kineehtuah uleh na kisuhmang louhna diingun pilvaang un.

¹⁶Huchi'n hi ka soi ahi, Hagau ah um un, huleh tahsa utna na sutaangtung sih diing uhi.

¹⁷Ajiahchu tahsa in Hagau a dou a, Hagau in tahsa a dou hi; sil na bawltumte uh na bawl theih louhna diingun, hite chu a kikalhtuah veu uh ahi.

¹⁸Hizongleh Hagau pui a na um unchu daan nuaia um na hi sih uhi.

¹⁹Huleh tahsa silbawlte chu a kilang hi, huchu hite ahi; aangkawmna, kingaihna, thanghuaina, huuhna.

²⁰Milimbiahna, bumna, muhdahna, kihauna, thangsiatna, lungthahna, kilanna, kikhinna, gintuamna,

²¹Deihgohna; tualthahna, zukhamna, eltol gualnop bawlna leh huchibang dangdangte ahi; huchibang silbawlte’n Pathian gam a luah sih diing uh, chi a malai a ka hung hilh taah mah bangin, ka hung hilh khawl hi,

²²Hagau gah ahihleh, lungsiatna, kipaahna, hamuanna, thuaahtheihna, jainemna, hoihna, ginumna,

²³Thunuaigolhna, kisuumtheihna, ahi; hichibangte kalhin daan a um sih hi.

²⁴Huleh Khrist a hi mite’n tahsa chu a lunggulhna leh a duhgawlna toh a kilhbehta uhi.

²⁵Hagau a hing i hihleh, Hagau mah ah i um diing uh,

²⁶Khat leh khat kilang leh kithangsiat a um louin, a mawh a kiloupisah i tum sih diing uhi.