Read Simte GALATIATE 6 Bible Online

GALATIATE 6 - Simte bible

GALATIATE 6

¹Unaute, mi kua aha a suhkhelhna a matdoha a um leh, nanguh hagau mite’n, nangmah ngei zong heemna na tuaahkha diing chih ngaihtuah in, huchibang mi chu thunuaigolhtahin tung diing kiit un.

²Khat leh khat na puaahgih uh kidawn chiat unla, huchi'n Khrist daan juikim un.

³Ajiahchu mi bangmah hiloupi a a kingaih saang leh amah leh amah a kihem ahi.

⁴Hizongleh mi chinin amah natoh kietchian chiat zaw heh, huchi'n midang tung hilou in, amah chauh tungah suan diing a nei diing hi.

⁵Ajiahchu mi chinin amah puaah chiat kipuaah diing ahi.

⁶Thuhilh a umpa in a hilhtu kawmah sil hoih zousiah pephal heh.

⁷Heem in um sih un; Pathian chu muhsit gual ahi sih hi; ajiahchu mi’n a tuh phot uh, humah chu a aat kiit diing uhi.

⁸Ajiahchu tahsalama tuhpa’n tahsalama siatna a aat diing a; hizongleh Hagau lama tuhpa’n chu Hagau a kumtuang hinna a aat diing hi.

⁹Huleh sil hoih bawl i chimtaah sih diing uh; ajiahchu i lungkiah louhleh a hun tahin i aat diing uhi.

¹⁰Hujiahin hun lemtaang i neih bangjelin mi zousiah kawmah sil hoih i bawl diing uh, a diahkhol in ginna a i innkuanpihte kawma i bawl diing uhi.

¹¹Keimah khut ngei a, na kawmva jem golpipia lehkha ka hung gelh en un.

¹²Tahsa a kilat hoih tum photmahte’n zehtan diingin nanguh ahung sawl teitei uh; bangmah dang hilou in, Khrist kros jiaha sawihna a thuaah louhna diingun ahi.

¹³Ajiahchu, amahuh zehtante mawngin zong daanthu a jui tuan sih uhi, na tahsa va suan diing a neih theihna diingun zehtan le u’chin chih a deih phet uh ahi.

¹⁴Hizongleh ke’n chu i Lalpa uh Jesu Khrist kros loungal ka suang het sih diing hi; amah jiahin khovel kei diingin kilhbeh ahita a, kei khovel diingin kilhbeh ka hita hi.

¹⁵Ajiahchu Khrist Jesu ah chu, siamthahna loungal, zehtan bangmah a phatuam sih a, zehtan louh zong bangmah a phatuam sih hi.

¹⁶Huleh hi daan banga umte tengteng tungah hamuanna leh khotuahna um hen, huleh Pathian Israelte tungah zong.

¹⁷Tua kipanin koima’n hung subuai nawn sih heh, ajiahchu ka tahsa ah Lalpa Jesu chiamtehna ka pua hi.

¹⁸Unaute, i Lalpa uh Jesu Khrist hehpihna na hagau uh kawmah um hen. Amen.