Read Simte EPHESITE 2 Bible Online

EPHESITE 2 - Simte bible

EPHESITE 2

¹Huleh nanguh na bohsiatna uleh na sualna uh jiaha si chu ahung hundam a;

²Hu a chu, tumalaiin hi khovel daan bangin na um va, huihkhua a thuneitu lal, tu a thumanglou tate sunga tong zingtu hagau daan bangin;

³Hute lahah eiuh zong tumalaiin i tahsa utna ah, i tahsa leh i lungsim deihzawng supiching in i um va; huleh mi dangte banga piandan mawng a lungthahna tate i na hi uhi.

⁴Hizongleh Pathian, khotuahna haupa’n, a lungsiatna nasatah a eite ahung lungsiatna jiahin,

⁵Sual a si i hih laiun zong Khrist toh ahung suhingkhawmta a, (hehpihna a hutdamna hi uh; )

⁶Huleh amah toh ahung kaithoukhawmta a, vaan munahte Khrist Jesu ah ahung toukhawmsahta hi.

⁷Huchi'n hun hung tung diingte ah Khrist Jesu jala i tunga a chitna a a hehpihna hauh nasatdan a ensah thei diing hi.

⁸Ajiahchu hehpihna a ginna jala hutdam na hi uh; hu zong nanguh a suaah ahi sih a; Pathian silthawnpiah ahi;

⁹Natoh jiahin ahi sih, huchilou inchu mi’n a suang kha diing uh.

¹⁰Bang jiahin ahiai i chih leh, Pathian in malai peha i umna diing a ana guatkholh Khrist Jesu a nna hoih tong diing a siam, amah khutsuaah i hi uhi.

¹¹Hujiahin nanguh tumalam a tahsa a Jentelte, tahsa khuta tan zehtan a chihte un zehtanlouh ahung chihte uh,

¹²Huchih lai a Khrist nei lou a, Israel khua leh tui toh kimat loua, khovel a kinepna bei leh Pathian nei lou a na um va, chiamna thuhunte laha mikhual a ana um na hih uh he zing un.

¹³Hizongleh tuin chu Khrist Jesu ah, nanguh ni danga gamlapia umte, Khrist sisan a suhnai in na umta uhi.

¹⁴Ajiahchu amah hi i kilemna uh ahi a, i kikala kidaidanna baang chu suchim in, nihte chu pumkhat in a siamta hi;

¹⁵Biahna silbawlte a thupiah dan umte kimeelmatna chu a tahsa a sumang in, amah ah nihte chu mihing thah khata siam diingin kilemna a bawl hi.

¹⁶Kimeelmatna chu kros a sulum in, humah in nihte chu sapumkhat a Pathian toh a kilepsah theihna diingin.

¹⁷Huleh amah chu hungin, nanguh gamlapia umte kawmah lemna tanchinpha ahung soi a, huleh naitakhat a umte kawma zong ahung soi hi.

¹⁸Ajiahchu amah jiahin eihaw’n Hagau khat in Pa kawma luut theihna i nei tuaah uhi.

¹⁹Hujiahin tuin chu mikhual leh gamtuammi na hi nawn sih va, misiangthoute toh khotual khat leh Pathian innkuante na hi zota uhi.

²⁰Huleh Jesu Khrist ngei chu a ninga suang poimohpen hiin, sawllehte leh zawlneite innbullep tung a lam na hi uhi.

²¹Amah ah chu inn lam zousiah kituaahtah a suhtuah in, Lalpa ah biahinn siangthouin a khang tou ahi.

²²Amah ah nanguh zong Hagaua Pathian teenna diing a lepkhawm na hi uhi.