Read Simte EPHESITE 6 Bible Online

EPHESITE 6 - Simte bible

EPHESITE 6

¹Naupangte haw, Lalpa ah na nulepate uh thu mang un; hichu sildih ahi.

²Na pa leh na nu zahtaat in; huchu chiam nei thupiah masapen ahi.

³Huchi'n nang a diingin a hoih diing a, leitung ah na damsawt diing hi.

⁴Huleh nanguh pate haw, na tate uh sulungthah sih unla, Lalpa thununna leh thuhilhna in enkol zaw un.

⁵Suaahte haw, Khrist thu na man bangun, laudan siam leh kiliing pum in lungsiangtahin tahsa daana na pute uh thu mang un.

⁶Mihing kipaahsah diing a mitmei chauh veeng hilou in, Khrist suaah bang a lungtang a Pathian deihzawng bawl zaw in:

⁷Mihing kawm a hilou in, Lalpa kawm a hoihlam deih a natong hiin;

⁸Mi chin in, suaah hiin, suaahlou hitaleh, sil hoih a bawl phot uh Lalpa kawm apatin humah a mu kiit diing uh chih he in.

⁹Huleh nanguh pute haw, huchimahbangin a kawmvah bawl un, amah uleh nanguh pu chu vaan ah a um chih leh, ama’n mi deihsah tuam a nei sih chih he in, vaubawl sih un.

¹⁰A tawppenin, ka unaute, Lalpa ah leh a haatna silbawltheihna ah haattahin um un.

¹¹Diabol zeheemnate na dou zoh theihna diingun Pathian gaalthuam bukim in kithuam un.

¹²Bang jiahin ahiai i chih leh i dou uh chu tahsa leh sisan ahi sih a, lalnate, thuneihnate, hi khovel mial tunga vaihawmtute leh, vaan mun a hagau gilou umte ahi zaw uhi.

¹³Hujiahin ni hoihlou na douzoh na diing uleh, na bawl zohveh nung va zong na din theihna diingun, Pathian gaalthuam bukim la un.

¹⁴Hujiahin, na kawnguh thutah a gaah in, dihtatna awmphaw but in,

¹⁵Lemna tanchinpha kisahkhawl na chu na keeng va but in ding un.

¹⁶A bawn a tungah, ginna lum la un, hukhuin giloupa thal kuang thei zousiah na sumit thei diing uhi.

¹⁷Huleh hutdamna siihlukhuh leh Hagau namsaau Pathian thu la un;

¹⁸Haamteina leh ngetna chintengin bangchihlaipouhin Hagau a haamtei zing a um in, hulam pangah chu misiangthoute zousiah diingin thuaah haatna leh ngetsahna toh ngaihsah zing in um un.

¹⁹Huleh kei diingin zong, tanchinpha thukiphual hesah diing a haangsantaha ka kam ka kaah a, thusoitheihna piah a ka um theihna diingin.

²⁰Hu diing a siihkolbut palai ka hi ngal a; huchia hulampang ka soi diing banga haangsantaha ka soi theihna diingin.

²¹Hizongleh nangun zong bangchibanga ka um ka tanchin na heet theihna diingun, Tikika, Lalpa a unau deihtah leh thunatongtu muanhuai in bangkim ahung hilhpah diing hi;

²²Ka tanchin uh na heetna diing uleh, na lungtang uh a hamuan theihna diing chi a amah na kawmva ka hung sawl ahi.

²³Pa Pathian leh Lalpa Jesu Khrist kawma kipan hamuan na, huleh ginna leh lungsiatna unaute kawmah um hen.

²⁴I Lalpa uh Jesu Khrist chihtahtah a lungsiatte zousiah kawmah hehpihna um hen. Amen.