Read Simte PHILIPPITE 2 Bible Online

PHILIPPITE 2 - Simte bible

PHILIPPITE 2

¹Hujiahin Khrist a kihehnepna bang, kilungsiatna hamuanna bang, Hagau a kipawlkhawmna bang, huleh kilainatna leh kikhotuahna bang a um leh,

²Lungsim kibang a um in, lungsiatna kibang nei in, tup kibang leh lungsim khat nei a um in ka kipaahna subukim un.

³Kinialna aha, ahihlouhleh kiloupisahna jiah aha in bangmah bawl hi sih heh; hizongleh lungsim ngiamtahin mi chinin amah sangin midang hoihzaw in ngai chiat heh.

⁴Na lahva mi koipouh in amah a chauh en sih henla, midang a zong en u’heh.

⁵Khrist Jesu a zong um hi lungsim chu nanguhah um heh;

⁶Amah chu Pathian bang a um hiin, Pathian toh kibang a um chu sil khiahlahhuai in a ngaihtuah sih a;

⁷Hizongleh amah chu hung kikoihngiam in, suaah bangin ahung um a, mihing banga siam in ahung um a;

⁸Huleh mihing limlemeel bang hung pua in, ahung kingaingiam a, sihna tanpha in thu ahung mang hi, kros sihna ngei chu.

⁹Huchihjiahin Pathian in zong amah chu nasatah in a tawisangta a, min lahlah a min tungnungpen a peta hi;

¹⁰Huchia Jesu min a mi zousiah, vaan a sil umte, lei a sil umte, huleh lei nuai a sil umte a khupdin a,

¹¹Lei chinteng in, Jesu Khrist chu Pa Pathian loupina diinga Lalpa ahi chih a phuan theihna diingun.

¹²Huchihjiahin, ka deihtahte, ka um peet chiang chauh hilou a, tua ka um louh lai a zong, thu na man veu mah bangun, lau leh liing pum in na hutdamna chiat uh tongdoh un.

¹³Ajiahchu, amah lungdeihlam bawl diinga nanguh hung utsahtu leh hung tongsah diing a bawltu chu Pathian ahi hi.

¹⁴Sil zousiah phun lou leh nial lou in bawl un.

¹⁵Khangthah gilou leh chihmohte lah a khovel a vaahte banga na vaahnate lahva soiselna bei, suhsiat nei lou Pathian tate na hihtheihna diingun;

¹⁶Hinna thu chu taahlang in; Khrist ni chianga ke’n a thawn in ka tai sih a, huleh a thawn in ka tonggim sih chia ka kipaah theihna diingin.

¹⁷Ahi, na ginna kipumpiahna uleh, nna natohna tungvah kei piahdoh in umta leng ka kipaah a, huleh na bawnun ka hung kipaahpih hi.

¹⁸Hukhu jiah mahin nanguh zong kipaah unla, kei zong hung kipaahpih un.

¹⁹Hizongleh Timothi na kawmva hung sawlpah diingin Lalpa Jesu ah ka kinem hi, na tanchin uh ka heet chianga kei zong lungmuangtaha ka um theihna diingin.

²⁰Ajiahchu ka kawmah huchibang a na umdan uh hung ngaihtuah diing awm midang ka nei sih hi.

²¹Bang jiahin ahiai i chih leh mi zousiah in Jesu Khrist silte hawl louin, amahuh a diing chiat a hawlta uhi.

²²Hizongleh tapa in a pa nna a toh bangin, ama’n chu tanchinpha ah kei ahung tohpih chih heetchi ana amah ah na nei uhi.

²³Hujiahin bangchi banga ka um diing ka heetchian hunhun in amah hung sawlkhiahpah ka kinem hi;

²⁴Hizongleh, keimah ngei zong hungpah diingin Lalpa ah ka kigingta hi.

²⁵Ahiinlah ka sanggam leh, natohpih leh, sepaihpih, na sawlleh uleh ka taahsapna a hung kithuahpihtu Epaphrodita na kawmva hung sawl kiphamoh ka sa hi.

²⁶Bang jiahin ahiai i chih leh, na bawnun ahung ngai mahmah a, a damlouh thu na jah jiahun a lungkham mahmah hi.

²⁷Ajiahchu si dehtahin a china ngei mah a; hizongleh Pathian in a khotuah a; ahi, amah chauh hilouin kei zong ahung khotuah hi, kei diinga lungkhamna tunga lungkhamna a um sawn louhna diingin.

²⁸Hujiahin amah chu khawhsatahin ka hung sawl hi, amah na muh kiit chiang va na kipaah va, huleh kei lungkhamna zong a daih deuhna diingin.

²⁹Hujiahin amah chu kipaahtahin Lalpa ah na pom un; huleh hutobangte chu zahbawl un.

³⁰Ajiahchu kei diinga na hung tohsahna uh kimloute suhkimna diingin Khrist natohna ah ama’n chu a hinna zong khawhsa louin ana si dehtah ahi.