Read Simte PHILIPPITE 3 Bible Online

PHILIPPITE 3 - Simte bible

PHILIPPITE 3

¹A tawppen in, ka unaute, Lalpa ah kipaah un. A ngeimah gelh chu kei diingin chimtaah a huai sih a, nanguh diingin a hoihzaw hi.

²Uite lahah kiveeng un, silgilou bawlte lahah kiveeng un, tahsa kisoisate lahah kiveeng un.

³Ajiahchu ei u’chu hagau a Pathian bia zehtante i hi a, huleh Khrist Jesu ah i nuam mahmah a, tahsa ah chu suan diing i nei sih hi.

⁴Tahsalamah chilei zong suan diing ka nei mei thei. Midang koiaha in tahsalama suan diing neia a kiheet inchu, ke’n ka nei sem hi.

⁵Ni giatni a zehtan, Israel chi, Benjamin phung, Hebraite laha Hebrai tahzet, daan heetlam a Pharisai;

⁶Phatuamngaih lama kouhtuam sawitu; daanbu a dihtatna lam a soiselbei ka hi.

⁷Hizongleh sil kei diing a lawhna zousiah chu Khrist jiahin manna in ka ngaita hi.

⁸Ahi, tahzetin, Khrist Jesu, ka Lalpa heetna hoih jiahin sil zousiah chu manna giapin ka ngai ahi; amah jiahin sil zousiah ka taanta a, huleh hute chu eeh bang giapin ka ngai hi, Khrist ka tan theihna diingin,

⁹Huleh daanbu a um banga keimah dihtatna nei hilou a, Khrist gin jala um, ginna a Pathian dihtatna chu nei a amaha muh a ka um theihna diingin.

¹⁰Huchia, a sihna toh kituaahtou jel a, amah leh, a thohkiitna silbawltheihna leh, a gimthuaahna kikoppihna bang ka heet theihna diingin.

¹¹Bangchi zawng aha beeh a misi lah apat thohkiitna ka tan theih khaahleh chi'n.

¹²Ka tang zouta ahi sih a, bukima um zouta zong ka hi sih; hizongleh Khrist Jesu in kei ahung matna, humah chu ka mat ve theihna diingin ka delh ahi.

¹³Unaute, kei chu man zouta in ka kisep sih a; hizongleh hi sil khat chu ka bawl hi, nunglama sil umte chu mangngilh in, huleh malam a sil umte chu delh in,

¹⁴Khrist Jesu a Pathian kouhna saang kipaahman mu diingin phaahtawpna chu ka delh ahi.

¹⁵Hujiahin eiuh a piching deuh tengin hitobang lungsim i nei chiat diing uh; huleh sil dang khat a lungsim dang na neih uleh, hizong Pathian in na kawmvah ahung hesah diing hi.

¹⁶Hizongleh i phaahna chiangchiang ah, hudan mahin gamta nihang in, lungsim kibangin um ni.

¹⁷Unaute, ka umdan hung juite hi chiat unla, huchibang a umte etton diing a na hung neihte uh chiamchih un.

¹⁸(Ajiahchu mi tampi a um uh, amahuh umdan ka hung hilh veuta hi, tuin zong kappum in ka hung hilh hi, amahuh chu Khrist kros meelmate ahi uhi.

¹⁹A tawpna u’chu manthaina ahi a, a Pathian u’chu a gilpi uh ahi, huleh a loupina u’zong a zumna uh ahi, leilam silte a ngaihtuah uhi).

²⁰Ajiahchu eihaw khualetui hihna chu vaan ah ahi a, hu a kipanin Lalpa Jesu Khrist, Hundampa chu i ngaah uh ahi.

²¹Ama’n chu, sil zousiah amah thuthu a, a umsah theihna natohdan dungjuiin i tahsa thulimlou chu amah tahsa loupitah batpih in ahung bawl thahsah diing hi.