Read Simte KOLOSSITE 2 Bible Online

KOLOSSITE 2 - Simte bible

KOLOSSITE 2

¹Ajiahchu nang uleh Laodisia khua a umte leh tahsa a ka meel mu nailou photmahte diing a ka kihahbawl dan he leh u’chin ka ut hi;

²Pathian leh, Pa leh, Khrist thuguuh hedoh diing a heetsiamna kichiantah hauhsatna zousiah lama lungsiatna a khuikhawma a um va, a lungtangte uh hamuangtah a, a um theihna diingin.

³Hu Khrist ah pilna leh heetna gou zousiah phual in a um hi.

⁴Huleh hichu, koimah in kamsiam thu a ahung heem louhna diingun, ka soi ahi.

⁵Ajiahchu tahsain na kawmvah um sih zongleng, kipaahtahin, na kizendan uleh, Khrist a na ginna kipdan uh en in, hagau in na kawmvah ka um hi.

⁶Hujiahin Khrist Jesu, Lalpa chu na pomtaah mahbangun, amah ah um un;

⁷Amah ah zungha leh lamtouh a um in, ahung kihilhta mahbanga ginna a kipaahtaha um in, huah chu kipaahthu soina a dimin um un.

⁸Pilvaang un, huchilou inchu mi koiaha in Khrist thu bang hilou in, mihing thugousiah leh, khovel thubulte bang zaw in, khovel pilna leh heemna mai in gaallaah in ahung lakha diing uh.

⁹Ajiahchu amah ah Pathian taangchinna zousiah sapum nei in a teeng hi.

¹⁰Huleh nanguh amah ah na bukimta uhi, amah chu lalna leh thuneihna zousiah lutang ahi;

¹¹Amah ah nanguh chu khut a tan hilou a, tahsa sualna sapum paikhia a Khrist zehtanna a zehtan na hi uhi.

¹²Baptisma ah amah toh vui na hita va, humah ah misi laha kipana amah kaithoutu Pathian natoh gintaat jalin amah toh kaihthoh na hita uhi.

¹³Huleh nanguh, na sualnate uleh na tahsa va zehtanlouhna jiah a si chu, na bohsiatna zousiah uh hung ngaidam in, ama’n amah toh ahung suhingkhawmta hi;

¹⁴Daanthu, ei uh hung lang zawng leh ei toh kikalh lam a gelh chu nawtmang in, a kros dawn a kilhbeh in a lamangta hi;

¹⁵Huleh lalnate leh thuneihnate susia in, kros a hute chu zou in, a langtang in etsahna’n a bawlta hi.

¹⁶Hujiahin mi koimah in, neeh thu aha, dawn thu aha, ni siangthou thu aha, ha thah thu aha, ahihlouhleh khawlni thu aha in nanguh hung dem sih u’hen.

¹⁷Hute chu sil hung tung diingte liim ahi a; hizongleh a tahsa chu Khrist ahi.

¹⁸Mi koimah in, a sil muh ngeilouhte a um zingin, a tahsa lungsima kimawhsahtheih in, mahni siamthuh kingaihtawm na leh angelte biahna zangin na kipaahman muh diing uh hung laahsah sih heh.

¹⁹Huleh tahsa zousiah in kivaah khang na nei a, kizopkhawm leh kikaankhawm a nna tong a, huleh kihuuikhawm a Pathian khanna a, a khanletna lutang chu a tudet sih hi.

²⁰Huchih jiahin khovel thubulte apat Khrist toh si na hih taah uleh bang diinga khovel a hing banga daan thupiahte nuaia kituluut na hi viai?

²¹(Sukha sin; chiam sin; khoih sin; chihte

²²Hite chu zatpum a mangthai veh diing ahi;) hite bawl chu mihing thupiah leh thuhilhna juih ahi.

²³Hi silte chu utthu a biah leh, kingaihtawm leh, tahsa khawhsa lou a silbawl ah pilhuai a bangna a; hizongleh sa deihzawng suhpichingna lamah bangmah a phatuam sih hi.