Read Simte KOLOSSITE 4 Bible Online

KOLOSSITE 4 - Simte bible

KOLOSSITE 4

¹Houtute, nangun zong vaan ah houtu na nei uh chih he in, na suaahte uh tunga a dih leh a kilawm hun chu bawl un.

²Haamtei zing unla, huah chu kipaahthu soi kawmin kiveeng zing un.

³Ka an a ka umna pen, Khrist thuguuh soi diing a Pathian in keiuh diing a thusoina kot ahung honsah theihna diingin kei uh diingin zong hung haamteisah un.

⁴Ka soi diing bangtah a, huchu ka soi thei na diingin.

⁵Hun lemtaang lei in, polam mite laha pilvaangtahin um un.

⁶Mi chin bangchibang a dawn but diing ahiai chih na heet theihna diingun na haam kamsuaah uh chu hehpihna tel, chi kisoh hi zing hen.

⁷Ka tanchin zousiah chu unau deihtah Tikika, natongtu ginum leh Lalpa a ka suaah hihpihin nanguh ahung hesah veh diing hi.

⁸Hu diing mahin amah chu na kawmvah ka hung sawl ahi, na tanchin uh a heet a, huleh na lungtang uh a suhhamuan theihna diingin;

⁹Onesima, unau ginum leh ngaihumtah, nanguh laha mi mah toh. Amahun hilam sil umtan zousiah ahung hesah diing uhi.

¹⁰Aristarkha, ka suangkultaanpih in chibai ahung buuh hi, huleh Mark, Barnaba sanggamnu tapa in zong chibai ahung buuh hi, (amah tungtaang ah thupiah na mu uh; na kawmva ahung leh kipaahtahin ana pom un).

¹¹Huleh Jesu, Justa a chih uh, zehtan mi in nanguh chibai ahung buuh hi. Hite chauh Pathian gam thu lam a ka natohpih, ahung hamuantute ahi uhi.

¹²Epaphra, na lahva mi, Khrist suaah in nanguh chibai ahung buuh hi; Pathian deihlam zousiah a hoihkim leh bukim a na dindet theihna diingun amah chu haamteinate ah theihtawp suah in a pang hi.

¹³Ajiahchu ama’n nanguh diing leh, Laodisia leh Hierapoli khua a umte diingin phatuam a ngai mahmah chih ka heetpih hi.

¹⁴Luke, doctor deihtah leh Dema in nanguh chibai ahung buuh uhi.

¹⁵Laodisia khua a unau umte leh, Nimpha leh a inn a kouhtuamte chibai hung na buuhsah in.

¹⁶Huleh hi lehkhathot na lahva na sim zoh chiangun Laodisia kouhtuamte lahah zong na simsah un; huleh nangun zong huchibangmah in Laodisia khua a lehkhathot na sim ve un.

¹⁷Huleh Arkippa kawmah, Lalpa a natohna na muh chu subuching diingin pilvaang in, na chi un.

¹⁸Kei Paul in, keimah khut a chibai ka hung buuh na ahi. Ka kolbuhte he zing un. Hehpihna na kawmvah um hen. Amen.