Read Simte THESSALONIKATE I 1 Bible Online

THESSALONIKATE I 1 - Simte bible

THESSALONIKATE I 1

¹Paul leh, Silvana leh, Timothi in, Pa Pathian leh Lalpa Jesu Khrist a Thessalonika khua a um kouhtuamte kawmah; i Pa uh Pathian leh Lalpa Jesu Khrist kawm apat hehpihna leh hamuanna na kawmvah um hen.

²Ka haamteina va na min uh lou in, nanguh zousiah jiahin Pathian kawmah kipaahthu ka soi zing uhi.

³I Pathian leh Pa ma ah na ginna natohte uh, lungsiatna natohgimte uh, huleh i Lalpa uh Jesu Khrist a kinepna jiaha na hahkatnate uh bang mangngilh lou a he zing in,

⁴Unau deihtahte, Pathian teel na hihna uh he in.

⁵Ajiahchu ka tanchinpha uh thu mai a na kawm uh tung lou a, silbawltheihna leh Hagau Siangthou leh heetchetna nasatah toh hung tung hi a; nanguh jiahin na lahva mi bangtobang ka hi va chih na heet bangun.

⁶Huleh hahsatna thuaahpum in, Hagau Siangthou a kipaah kawmin thu chu pom in, kei uleh Lalpa juite na hi uhi.

⁷Huchi'n Makedonia leh Akaia gam a gingtu zousiah diingin etton diing na hita uhi.

⁸Bang jiahin ahiai i chih leh nanguh a kipanin Lalpa thu chu a thang kheta a, Makedonia leh Akaia gam chauh ah hilou in, mun chinah Pathian lam a na gindan uh a thangta hi; kei un bangmah ka soi uh a ngai nawn sih hi.

⁹Ajiahchu amahuh ngei in na lahva bangtobang luutna aha ka muh uh, ka tanchin uleh, Pathian hing leh dih be diing a milimte a kipana Pathian lam na ngatdan bang uh ahung hesah uhi.

¹⁰Huleh a Tapa, misi laha kipana a kaihthoh, lungthahna hung tung diing lah a hung suaahta sahpa Jesu vaan apat na ngaah diingin.