Read Simte THESSALONIKATE I 2 Bible Online

THESSALONIKATE I 2 - Simte bible

THESSALONIKATE I 2

¹Ajiahchu unaute, na lahva ka luutna uh a thawn ahi sih chih nanguh ngei in na he uhi;

²A thawn hihmalah in, hu ma in, na heetsa mahbangun, Philippi khua a zumhuaitaha bawlgawp a ka um nungun buai pumpum in zong Pathian tanchinpha na kawmva soi diingin ka Pathian vah ka na haangsan zaw mah uhi.

³Ajiahchu, ka thusoi uh zuau a pawt ahi sih a, sianglou a pawt zong ahi sih a, huleh heembawlna in zong ahi sih;

⁴Tanchinpha kolsah a um diing a Pathian phatsah mi ka hih bang ngeiun mihing kipaahsah diing bang hilou a ka lungtang uh endihtu Pathian kipaahsah hi zaw in, thu ka soi jel uh ahi zaw hi.

⁵Ajiahchu bangmah chihin zong kimaitangphatna leh duhaamna thu aha ka zang ngei sih uh chih na he uh; Pathian ahung heetpihtu ahi.

⁶Khrist sawllehte ka hihna un thuneihna zang thei hi zongle ung, mihing tung leh, nanguh tung leh, midangte tungah zong, paahtawina ka hawl ngei sih uh.

⁷Nuin a tate a duatbawl bangin na lahvah jaidamtahin ka um zaw uhi.

⁸Huchi'n, ka deihtahte uh na hung hihtaah jiahun nanguh hung ngaina mahmah in Pathian tanchinpha chauh hilou in, keiuh hinna tanpha hung piah ka ut uhi.

⁹Ajiahchu unaute, ka tohgimdan uleh ka tawldan uh na he zing uhi, na lahva koimah ka suhbuai louhna diingun suun leh jan a tong in Pathian tanchinpha nanguh ka hung hilh uhi.

¹⁰Nanguh gingtute laha siangthoutah leh dihtah leh soisel bei a ka gamtatdan uh ahung heetpihtute na hi uh, huleh Pathian zong.

¹¹Pain a tate tunga a bawl bangin, nanguh hung hasot in, hung hamuan in, huleh hung hilhin na tungva ka bawldan uh na he uhi.

¹²A lalgam leh a loupina a nanguh hung kouluutpa Pathian mi hitaah a na um theihna diingun.

¹³Hi jiahin Pathian kawmah tawplou in kipaahthu ka soi uhi, ajiahchu Pathian thu kei u’a kipana na jah uh na pom laiun, mihing thu banga pom louin, thutah, nanguh a gingtate a zong nasataha natong thei Pathian thu bangin na pom zaw uhi.

¹⁴Ajiahchu, unaute, Judia gam a Pathian kouhtuam pawl Khrist Jesu a umte juitute na hi va; amahun Judate laha a thuaah bangun, nangun zong na gam mite uh lahah na thuaah ve uhi.

¹⁵Hu Judate’n chu Lalpa Jesu leh a zawlneite a that va, keiuh zong ahung sawi uh; huleh Pathian a sulungkim sih va, mi zousiah a kalh uhi.

¹⁶Hutdam ahihtheihna diing va Jentelte kawma thusoi ahung khap va, a sualna uh suhdim zingna diingin; hizongleh Pathian lungthahna chu a khawh theitawpin a tungvah ahung tungta hi.

¹⁷Hizongleh kei u’chu, unaute, tomchakhat sung lungtang lam hilou a, meel lam chauh a kikhen a i um jiahin, kilawptah a na meel uh mu diingin ka hahpan sem uhi.

¹⁸Huchih jiahin na kawmva hung ka tum ten va, kei Paul ngei in zong nihvei jen hung ka tumta a; hizongleh Setan in ahung daal veu hi.

¹⁹Ajiahchu ka kinepna uh aha, ka kipaahna uh aha, ahihlouhleh ka kipaahna lallukhuh uh bang ahiai? A hung chianga i Lalpa Jesu ma ah nanguh ngei na hi sih diviai mah?

²⁰Nanguh chu ka suan uleh ka kipaahna uh na hi uhi.