Read Simte THESSALONIKATE I 3 Bible Online

THESSALONIKATE I 3 - Simte bible

THESSALONIKATE I 3

¹Hujiahin ka thuaah zoh nawn louh phetun Athen khua ah keiuh chauh nuutsiat in um leung hoih ka sa va,

²Huleh i unaupa uh Timothi, Pathian natongtu, Khrist tanchinpha lama ka tohpih uh, nanguh hung sukip diing leh na ginna lam va hung hamuan diingin ka hung sawl uhi.

³Hi gimthuaahnate jiaha koimah a kiliin louhna diingin; ajiahchu hi silte thuaah diing mawng a guat i hi uh chih nanguh ngei in na he uhi.

⁴Bang jiahin ahiai i chih leh na kawmva ka um laiun sawihna thuaah diing i hi uh chih ka hung hilh khawlta uh; huchibang ngei in a tungta hi, huchu na he uhi.

⁵Hi jiahin ka thuaah zoh nawn louh phetin, heemtu’n nanguh ahung heempuuhkha diing a, ka tohgimna uh a thawnkha diing chi'n na gindan uh he diingin mi ka hung sawl hi.

⁶Hizongleh tu a Timothi na kawm vapat ka kawm uh ahung tunin na ginna uleh na lungsiatna uh, huleh kei un nanguh ka hung muh nuam mahmah bangun nangun zong keiuh hung mu nuam mahmah in na hung he zing uh chih tanchin kipaahhuaitah ahung puaah hi.

⁷Hujiahin, unaute, ka thuaahgimna uleh, ka hahsatna zousiah vah na ginna jiahun na tungvah hamuangtahin ka um uhi.

⁸Ajiahchu tuin ka hingta uh, Lalpa a na dinkip phot uleh.

⁹I Pathian uh ma ah na tungva ka kipaahna zousiah uh jiahin nanguh lam thu ah Pathian kawmah bangtobang kipaahthu ka soi thei taphet diviai?

¹⁰Na meel uh ka muh theihna diing uleh, na ginna lam va na taahsap uh ka hung suhbuchinsah theihna diingun suun leh jan a nasataha haamtei in.

¹¹Huchi'n Pathian ngei leh i Pa un, huleh Lalpa Jesu Khrist in na kawm lam vah hung pui hen.

¹²Huleh nanguh lama lungsiatna ka hauh bangun, Lalpa’n nanguh khat leh khat kilungsiattuahna leh, mi zousiah na lungsiatna uh hung supung in, hung hausahta hen.

¹³Huchi'n i Lalpa Jesu Khrist, a misiangthoute zousiah toh ahung chiangin Pathian, i Pa uh ngei ma ah na lungtangte uh sianthouna lama soisel beiin ahung sukip thei diing hi.