Read Simte THESSALONIKATE I 5 Bible Online

THESSALONIKATE I 5 - Simte bible

THESSALONIKATE I 5

¹Hizongleh a hun leh a ni lam thu chu unaute, gelhsah na ngai sih uhi.

²Ajiahchu nanguh mahin Lalpa ni chu jan a guta bangin ahung tung diing hi chih chiantah in na he uhi.

³Muanna leh bitna, chia a soi laitahun numei nauvei bangin thakhat in manthaina a tungvah a tung diing a; a suaahta hial sih diing uhi.

⁴Hizongleh unaute, nanguh chu hu niin guta bang a ahung phawn diingin mialah na um sih uhi.

⁵Na bawnun vaah tate leh suun tate na hi uhi; jana mi i hi sih a, mial a mi zong i hi sih hi.

⁶Hujiahin midangte bangin i ihmu sih diing uh; kigingin i ngaihsah zaw diing uh.

⁷Ihmute chu jan ah ahi a ihmut uh; huleh zukhamte zong jan ah ahi a kham uh.

⁸Hizongleh ei suun a mite’n chu ginna leh lungsiatna phaw silh in, hutdamna kinepna chu lukhuh a khuh in i ngaihsah diing uhi.

⁹Ajiahchu Pathian in lungthahna tuaah diing hilou in, i Lalpa uh Jesu Khrist vang a hutdamna mu diingin ahung guat ahi zaw hi.

¹⁰Amah chu i luang in a si a, i hah in zong, i ihmut in zong, amah toh i hinkhawm theihna diingin.

¹¹Hujiahin na na hih veu mah bangun kisuhamuang khawm chiat unla, kisuhaattuah chiat un.

¹²Huleh unaute, na lahva tonggimte leh, Lalpa a na houtute uleh, nanguh hung hilhtute he diingin;

¹³Huleh a natoh jiah va amahuh nasataha lungsiatna a ngaisang diingin ka hung ngen uhi. Kituaah chiatin um un.

¹⁴Tuin unaute, ka hung hasot uhi, daan banglou a umte hilh unla, lungkete hamuan unla, haatloute panpih unla, mi zousiah lamah thuaahzoutahin um un.

¹⁵Koimah in koi giitlouh zong giitlouh a thuh lou diingin pilvaang un; hizongleh nang u’lah hiin, mi zousiah lamah hitaleh a hoih taphot jui un.

¹⁶Kipaah zingzing un.

¹⁷Tawplou in haamtei un.

¹⁸Sil bangkimah kipaahthu soi zing un; ajiahchu nanguh lam thu ah Khrist Jesu ah hichu Pathian deihzawng ahi.

¹⁹Hagau sumit sih un.

²⁰Pathian thu kisoi musit sih un.

²¹Sil zousiah enchian unla, a hoihlam photmah tudet un.

²²Sual a kilang zousiah apat kihemkhia un.

²³Huleh hamuan na Pathian ngei in napumun hung susiangthou heh; huleh na hagau uleh, na lungsim uleh, na tahsa uh i Lalpa uh Jesu Khrist hung chiang a soiselbei diingin humbit in um hen.

²⁴Nanguh hung kou pa a ginum a, bawl zong a bawl diing hi.

²⁵Unaute, hung haamteisah un.

²⁶Unaute zousiah tawp siangthou in chibai na buuh un.

²⁷Hi lehkhathot unau siangthoute zousiah kawma simsah diingin Lalpa minin thu ka hung pia hi.

²⁸I Lalpa uh Jesu Khrist hehpihna na kawmvah um hen. Amen.