Read Simte THESSALONIKATE II 1 Bible Online

THESSALONIKATE II 1 - Simte bible

THESSALONIKATE II 1

¹Paul leh, Silvana leh, Timothi in, i Pa uh Pathian leh Lalpa Jesu Khrist a Thessalonika khua a um kouhtuam kawmah:

²I Pa uh Pathian leh Lalpa Jesu Khrist a kipan hehpihna leh hamuanna na kawmvah um hen.

³Unaute, na ginna uh nasatah a a khanlet a, na bawnva na kilungsiattuahna uh a punsem jiahin, na tung thu vah, hihtuaah ahih mahbangin, Pathian kawma kipaahthu soi zing diing mawng ka hi uhi.

⁴Huchi'n mi’n nanguh ahung sawihnate uleh, na gimthuaahnate zousiah va na kuhkal dan uleh, na gindan zousiah uh jiahin Pathian kouhtuam pawlte lahah ka hung suang uhi.

⁵Hichu Pathian gam mi hitaah a guat na hihtheihna diing va Pathian vaihawmna dihtah chiamchihna chiantah ahi, hu diing maha zong thuaah na hi uhi;

⁶Nanguh hung subuaite gimthuaahna a thuh chu Pathian a diing a sil dihtathuai ahi chih he in;

⁷Huleh nanguh suhgim a umte chu, Lalpa Jesu vaan a kipan a, a vaansawlleh haatte toh ahung kilaah chiangin, kei u’toh khawlna a thuhkiit in,

⁸Mei kuang a ahung kilaah chiangin, Pathian heloute leh i Lalpa uh Jesu Khrist tanchinpha awiloute tunga phuba la in;

⁹Amah u’chu Lalpa ma leh a silbawltheihna loupitaha kipanin kumtuang manthaina ah gawt in a um diing uh.

¹⁰Hunia a misiangthoute a suhloupi a um diing leh, a gingta zousiahte a (ajiahchu ka hung thuheetsah uh na gingta uh) limdangsah a um diinga ahung chiang in.

¹¹Hujiahin i Pathian un nang u’chu ahung kouhna toh kiphutawh mawng ahung sah theihna diing leh, hoih utna zousiah leh ginna natoh zousiah a silbawltheihna toh ahung buchinsah theihna diingin, nanguh diingin zong ka haamtei ngiitngeet uhi.

¹²I Pathian uleh Lalpa Jesu Khrist hehpihna dungjui a, i Lalpa uh Jesu min chu nanguh a, huleh nanguh amah a suhloupia a um theihna diingin.