Read Simte TIMOTHI I 1 Bible Online

TIMOTHI I 1 - Simte bible

TIMOTHI I 1

¹Paul, i Hundampa uh Pathian leh, i kinepna uh Lalpa Jesu Khrist thupiah banga Jesu Khrist sawlleh in;

²Ginna a ka tapa tahzet Timothi kawmah; Pathian i Pa uleh i Lalpa uh Jesu Khrist kawma kipan, hehpihna leh, khotuahna leh, hamuanna umta hen.

³Makedonia gam a ka chiah diing kuan a, Ephesa khua a um zing diing a, mi khenkhat in kihilhna dihlou a hilh louhna diing uleh,

⁴Ginna a Pathian ngaihsah khosahdan um suhkhang sang a kinialna siam zoveu, taangthu pouh leh khang thu suiseenglouh meimei a ngaihsahlouhna diing va kawh diing a ka hung nget bangin, huchi'n bawl in.

⁵Huleh thupiah kipiahnasan chu, lungtang siangthou leh, sialepha heetna hoih leh, ginna dihtah akipan lungsiatna neih ahi.

⁶Mi khenkhatte a chiah kawi jiahun huchu a peetsan va, thulimlou soina lamah a chiahta uhi.

⁷A thusoi uh umdan leh a chihtahna uh he lou in daan hilhtute hih a ut uhi.

⁸Hizongleh daan chu a hoih chih i he ngal a, mi’n daan bangtah a, a jat inchu.

⁹Hichu he in, daan chu midihtatte diinga bawl ahi sih a, daan poisalou leh, daan bohsete a diing, Pathian ngaihsahlou leh misualte a diing, misianglou leh Pathian zahloute a diing, pate thatte leh nute thatte a diing, mihing thatte a diing,

¹⁰Kingaih haatte a diing, pasal kisubuahtuahte a diing, mihing gute a diing, zuau haatte a, diing, zuau a kihaahsialte a diing, huleh thugin dih toh kikalh sildang a um leh, hute a diingin ahi;

¹¹Ka kawma kolsah a um, paahtawitaah Pathian loupitah tanchinpha dungjuiin.

¹²Huleh thunatongtu a hung koih a ginum a ahung sim jiahin, ahung suhaattu, Jesu Khrist, i Lalpa u’chu ka phat ahi.

¹³Tumalaiin Pathian soisetu leh suduhdahtu leh sunatu ka na hi a; hizongleh khotuahna ka muta hi, ginlouhna a he lou a na bawl ka hih jiahin.

¹⁴Huleh i Lalpa uh hehpihna chu Khrist Jesu a um ginna leh lungsiatna in a dimlet ahi.

¹⁵Khrist Jesu chu misualte hundam diingin khovel ah ahung hi chih hi thu gintaat umleh, pomtaah mahmah ahi; hu misualte laha lianpen ka hi.

¹⁶Hijiangzongleh, tunungsiah a kumtuang hinna diinga amah hung gingta diingte etsahna diingin Jesu Khrist in a thuaahzohdan keimah a, a suhlat masat theihna diingin hikhu jiahin khotuahna ka mu hi.

¹⁷Tuin kumtuang kumpipa si thei lou, muhtheihlouh, Pathian pil chauh kawmah zahna leh loupina um zingta hen. Amen.

¹⁸Ka tapa Timothi, tuma a na kawma tanchin kisoilawh thute dungjuiin hi thupiah chu ka hung pia ahi, hute a kidouna hoih na dou theihna diingin.

¹⁹Ginna leh sialepha heetna hoih chu tukip in; huchu mi khenkhatte’n a paaikhia va, ginna lamah kuang sia bangin a keehgawpta uhi;

²⁰Amahuh lahah Himena leh Alexander ahi uh; Pathian soisiat louh a zil theihna diingun amahuh chu Setan kawmah ka peta hi.