Read Simte TIMOTHI I 3 Bible Online

TIMOTHI I 3 - Simte bible

TIMOTHI I 3

¹Koipouh kouhtuam houtu a pan ut chu, natoh hoih ut ahi, chih a dih ahi.

²Huchi'n kouhtuam houtu chu, soiselbei, ji khat nei, kisuumthei, pilvaangtah, gamtathoih, mitaangphal, thuhilh siam;

³Uain khamhaat lou, mivuaah chiing lou, punna niin a huaiham lou, mithuaahthei, minialhaat lou, eenhaat lou;

⁴Amah innsung vaihawm siam, zahumtah a, a tate thununsiam mi ahi diing ahi.

⁵(Ajiahchu mi’n amah innsung bawn vaihawmdan a heet louhleh, bangchi’n Pathian kouhtuamte a enkol thei diai?)

⁶Gingthah mi ahilou diing ahi, huchilou inchu a kisatheikha diing a, diabol siamlouh tanna a tangve kha diing hi.

⁷Hulou zong polam mite soiphat ahih ngei diing ahi; huchilou inchu soisiat a um in diabol thaangah a awhkha diing hi.

⁸Huchimahbangin, kouhtuam upate chu mi zahum, kamtam lou, uain hai lou, punna niin a huaiham lou ahi diing uh ahi.

⁹Sialepha heetna siang in ginna thuguuh kem mi ahi diing ahi.

¹⁰Huleh hite ah etchian in um masa u’henla, hunungin soiselbei ahih uleh kouhtuam upa nna tong u’heh.

¹¹Huchimahbangin a jite u’zong mi zahum ahih ngei diing uh ahi, kamtam lou, kisuumthei, sil zousiah a ginum ahi diing uh ahi.

¹²Kouhtuam upate chu ji khat nei, a tate uleh a innsung uh feltah a vaihawmsiam mi hi heh.

¹³Ajiahchu kouhtuam upa na hoihtah a tongte’n dinmun hoihtah leh Khrist Jesu a um ginna lama haansanna loupitah a kisiam uhi.

¹⁴Sawtloukal a na kawm a hung kinem in hi thute na kawmah ka hung gial hi;

¹⁵Hizongleh ka hung um sawt khaah leh, Pathian inn sunga bangchibang a gamta diing na hiai chih na heetna diingin ka hung gial ahi, huchu Pathian hing kouhtuam, thutah khuam leh kingahna ahi uhi.

¹⁶Huleh Pathian ngaihsahna thuguuh chu nial guallouh in a loupi ahi; Pathian chu tahsa in ahung kilang a, Hagau in siam a tang a, angelte’n a mu va, Jentelte kawma taangkoupih in a um a, khovel a gintaat in a um a, loupina a puitouh in a umta hi.