Read Simte TIMOTHI I 4 Bible Online

TIMOTHI I 4 - Simte bible

TIMOTHI I 4

¹Hizongleh hun nunung lam chiangin mi khenkhatte’n puimangna hagaute leh dawite thuhilhna ngaihsah in, ginna chu a tawpsan diing uh chih Hagau in chiantahin a soi hi;

²Lepchiahna a zuauthu soi in; a sialephaheetna uh siih aam a bih a um in;

³Kiteen khaam in, huleh neeh diingte, thutah gingta a hete’n kipaahthu soi a saan diing a Pathian in a siamte chu ne lou diingin thu a pia uhi.

⁴Pathian silsiam zousiah chu a hoih hi, kipaahthu soi a saan ahih photleh bangmah nual diing a um sih hi.

⁵Ajiahchu Pathian thu leh haamteina a suhsiangthou ahita hi.

⁶Hi silte unaute na heetsah leh, nang chu Jesu Khrist thunatongtu hoih, ginna leh thuhilhna hoih tutan a na zop thu a vaah khang a um na hi diing hi.

⁷Hizongleh Pathian zahlouhna thu leh piteehte taangthu deih sinla, Pathian ngaihsahna lamah kithunun in.

⁸Ajiahchu tahsa kithununna ahihleh them khat chauh a phatuam a; hizongleh Pathian ngaihsahna chu, hinna, tu a um zing leh hung um kiit diing piah thuchiam a neih jiahin sil zousiah ah a phatuam hi.

⁹Hi chu thu gintaat umleh pomtaah mahmah ahi.

¹⁰Ajiahchu huchia Pathian hing i muan jiahin i tonggim a, i pang teitei uh ahi; amah chu mi zousiah Hundampa ahi a, a gingtate a ahi diahkhol hi.

¹¹Hi thute chu pia inla, huleh hilh in.

¹²Na naupanna koimah in musit sih heh; hizongleh haam kamsuaah ah, gamtatdan ah, lungsiatna lam thu ah, hagaulam thu ah, ginna thu ah, sianthouna lam thu ah, gingtute etton diing hizaw in.

¹³Ka hung masiah lehkhasim leh, hasot leh, thuhilh ngaihsah in.

¹⁴Nangmaha um silpiah, soilawhna a piah, upate khut ngah a Pathian in nang ahung neihsah chu thahdah sin.

¹⁵Mi zousiah kawma na phattuamna a lat theihna diingin hu silte ngaihtuah inla, hute ah kizang zou in.

¹⁶Nangmah leh na thuhilh ah pilvaang in; hu silte ah um zing in; huchibang hihna jalin nangmah leh na thu jate na hundam diing hi.