Read Simte TIMOTHI I 5 Bible Online

TIMOTHI I 5 - Simte bible

TIMOTHI I 5

¹Teehsete chu tai sinla, hizongleh pa bangin, tangval deuhte chu unau bangin;

²Piteehte chu nute bangin, nungaah deuhte chu sanggamnu bangin, siangthoutahin hasot in.

³Meithaite, meithai tahzette chu zahbawl in.

⁴Hizongleh meithai koipouh in tate aha, tute aha a neih inchu, amahun innsungah Pathian ngaihsah dan leh a nulepate uh zahdan zil masa u’heh; ajiahchu Pathian muh in huchu a hoih a, huleh a pomtaah hi.

⁵Huleh meithai tahzet, amah tang a um in chu Pathian ah kinepna a nei a, suun leh jan a ngen in a haamtei zingzing hi.

⁶Hizongleh amah nopsahna a hingnu chu, a damlai in zong si ahi.

⁷Huleh soiselbei a, a um theihna diingun hi thute pia in.

⁸Hizongleh koipouh in amah mite a diing, a diahkhol a amah innkuanpihte a diinga ngaihtuah kholh louhleh ginna chu a zuausan a, ginglou mi sangin a gilou zaw ahi.

⁹Meithai kum sawmguup nuailam, mi khat ji na hita chu meithai a sim louh diing ahi.

¹⁰Sil hoih bawl lam a mi paahtawi a um a; tate khoi lian a, mikhualte na zintun a, misiangthoute keeng na silta a, mi gimthuaahte na panpihta a, sil hoih photmah thanuamtaha na bawl zou ahihleh.

¹¹Hizongleh meithai nungaah deuhte zaw gial sin; ajiahchu Khrist lam a ahung kip louh chiangun pasal neih a ut veu uhi.

¹²A ginna masa uh a paih jiahun siamlouh tangin a um veu uhi.

¹³Hulou zong, inn chinah a vaahleh va, thasiat a chiing veu uhi; huleh thasiat chauh zong hilou in, a soi louhlouh diing uh soi in kamtam leh mi demhaat ahi veu uhi.

¹⁴Hujiahin, meithai nungaah deuhte’n chu pasal nei u’henla, soiselna diing lemtaang mawngmawng meelma musah sih leuh ka deih hi.

¹⁵Ajiahchu tuin zong mi khenkhat Setan lamah a peetkheta uhi.

¹⁶Gingtu numei aha, pasal aha in meithai a neihleh somdawl u’heh; meithai tahzette a somdawl theihna diingin kouhtuam suhbuai in um sih heh.

¹⁷Kouhtuam upa vaihawm hoihte chu a leh niha zahbawltuaah a seh hi u’heh, a diahkhol in thu leh thuhilhna lama tonggimte chu.

¹⁸Ajiahchu Pathian lehkhathu in, Bawngtal in buh a chil laiin a muuh kaan sin; huleh natongtu chu loh mutaah ahi, a chi hi.

¹⁹Kouhtuam upa a heehna u’chu heetpihtu nih aha, thum aha louin pom sin.

²⁰Misualte chu, midangte’n zong a lau theihna diingun, mi zousiah ma-ah taihilh in.

²¹Khentuam nei a bangmah bawllou a, deihsahtuam nei lou a hi thute jui diingin, Pathian leh Lalpa Jesu Khrist leh angel teelte mitmuh ah thu ka hung pia hi.

²²Mi koimah tungah khut nga pahpah sinla, midangte sualna ah zong kikum sin; siangtahin kikoih zingin.

²³Na gilpi jiahin leh na damlouh veu jiahin, tui chauh dawn nawn sinla, uain themkhat khat zang veu in.

²⁴Mi khenkhatte sualna chu a malat a, vaihawmna ah a tung masa veu hi; hizongleh mi khenkhatte chu a nung vah a jui hi.

²⁵Huchimahbangin khenkhatte sil hoih bawl kilangmasa a um a; huchibang loute zong phual theih ahi sih hi.