Read Simte TIMOTHI II 3 Bible Online

TIMOTHI II 3 - Simte bible

TIMOTHI II 3

¹Huleh hizong he in, ni nunung lamah hun hahsa tahtahte ahung um diing hi.

²Ajiahchu mi amahuh kilungsiatte, sumngainate, kiuangsahte, kisatheite, Pathian soisete, nulepa thumangloute, kipaahnataang heloute, siangthouloute;

³Itna pianpih neiloute, buaina bawlte, zuau a miheehte, kideehthei loute, mi huhamte, hoih mawngmawng deihloute,

⁴Leptatte, ngongtatte, kingaisangte, Pathian lungsiat sanga amahuh kipaahna ngaina zote bang ahi diing uhi.

⁵Pathian ngaihsah batna a nei diing va, hizongleh a silbawltheihna a tahsang sih diing uh; huchibangte chu nungheisan in.

⁶Ajiahchu huchibangte laha mi chu innte banga luut a, numei sualgih pua ngol deuhte sala man a, duhgawlna chinteng a puimangte;

⁷Zil zing napi a thutah hepha hetloute ahi uhi.

⁸Huleh Jaanni leh Jambri in Mosi a khin bangun hite’n zong thutah a doudaal zing uhi; lungsim sesuaah mi, ginna lama Pathian deih louh mi ahi uhi.

⁹Hizongleh hu kaan a bawl thei sih diing uhi; ajiahchu a ngoldan uh mi zousiah kawmah ahung kilang diing hi, hute a ahung kilat mahbangin.

¹⁰Hizongleh nang chu ka thuhilh, ka hindan, ka siltup, ka ginna, ka thuaahtheihdan, ka lungsiatna, ka kuhkaldan,

¹¹Antiok khua leh, Ikonium khua leh, Listra khua a sawina ka thuaahte na he kim veh hi; hizongleh hute zousiah ah Lalpa’n ahung hundohta hi.

¹²Ahi, mi Khrist Jesu a Pathian ngaihsah a umtum zousiah in sawina a thuaah diing mah ahi.

¹³Hizongleh migilou leh mi heemhaatte chu mi heem leh heem a um in a sesuaah deuhdeuh diing uhi.

¹⁴Hizongleh nang chu, koi kawm apat na zil ahiai chih he in, na zil sa leh heetchiansah a na umna silte ah um zing in.

¹⁵Huleh nang chu na naupan lai apat, Khrist Jesu a ginna jiaha hutdamna mu khopa nang hung hilhpilthei lehkha siangthou he na hita hi.

¹⁶Pathian lehkhathu zousiah chu Pathian huhaihkhum a piah ahi a, thuhilhna diing bang, kitaihilhna diing bang, kisuhdihna diing bang, huleh dihtatna lama thuhilhna diing bangin a phatuam hi.

¹⁷Pathian mi chu na hoih zousiah tong diing a kimtaha kithuama a bukim theihna diingin.