Read Simte TITA 1 Bible Online

TITA 1 - Simte bible

TITA 1

¹Paul, Pathian suaah leh, Pathian miteelte ginna dungjui leh, Pathian ngaihsahna banga thutah heetna lama Jesu Khrist sawlleh in;

²Zuautheilou Pathian in khovel um mapeh a, a chiamsa kumtuang hinna kinepna ah;

³Hizongleh Pathian i Hundampa uh thupiah dungjui a ka kawma kolsaha um thu taangkoupihna jalin a huntah ah a thu chu suhlat in a umta hi.

⁴Ginna munkhatlam thu a ka tapa ngei Tita kawmah; Pa Pathian leh Lalpa Jesu Khrist i Hundampa uh kawm a kipan hehpihna, khotuahna huleh, huleh hamuanna um hen.

⁵Hikhu jiahin ahi Krit tuikulh gam a ka hung nuutsiat, sil bawlzohlouh a umte na bawlzohna diing leh, ka hung thupiah banga khochin a upate na guat theihna diingin;

⁶Koi hitaleh, demna bei, ji khat nei, Pathian gingta tatsiatna leh thununlouhna nei lou tate nei a hihphot unchu.

⁷Ajiahchu kouhtuam houtu chu Pathian sumkoltu ahihjiahin demna bei ahih ngei diing ahi; thusuaah tum lou, lungthah baih lou, uain kham haat lou, mivuaah chiing lou, punna niina huaiham lou mi ahih diing a;

⁸Mitaangphal hih ut, mihoihte ngaina, lungsimdih, midihtat, misiangthou, mikisuumthei ahih diing ahi.

⁹Thugin dihtaha nialkalhtute a hasot theihna diing leh, a siam louhdan uh a heetsah theihna diingin amah kihilh nasa banga thu chu a tuuhkip zing diing ahi.

¹⁰Ajiahchu mi thunung lou, thulim lou, soisiat haat leh mi heemhaatte tampi a um uhi, amahuh chu zehtan haw laha mi ahi diahkhol uhi.

¹¹Hute kam chu hupsah diing ahi, punna niin deih man in thu a hilh louh diing uh a hilh va, mi innkuan sung a tohbuai veu uhi.

¹²Amahuh laha khat, a zawlnei ngei uh khat in, Krit gam mite chu zuau soi zingte, gamsa giloute, thase anhaite ahi uh, chi'n a soi hi.

¹³Hi heetpihna thu a dih ahi. Hujiahin ginna a ahung lamzan theihna diingun naahtahin taihilh in;

¹⁴Judate taangthu leh, thutah nungheisante thupiah a ngaihsah louhna diingun.

¹⁵Mi siangthou a diingin sil zousiah a siangthou hi; hizongleh mi bolhhoh leh gingloute a diingin bangmah a siang a um sih hi; a lungsim uleh a sialepha heetna nasan uh sianglou ahita hi.

¹⁶Pathian ka he chi'n a kam un a phuang va; hizongleh a silbawl un a nual uhi, kihdah umte, thumangloute, sil hoih bawl lam photmah a Pathian deih louh lam mite ahi uhi.