Read Simte TITA 3 Bible Online

TITA 3 - Simte bible

TITA 3

¹Amahuh chu vaihawmtute leh thuneitute kawma kituluut diingin, thukhentute thu mang diingin, sil hoih taphot bawl diing a kigingsa a um diingin,

²Mi koimah soise lou diingin, thupawt bawl lou diingin, nunnem a, mi zousiah kawma thunuailuutna ensah zaw diingin hilh pha in.

³Ajiahchu eite ngei zong malaiin mingolte, thumangloute, heema umte, utna leh nopna chituamtuam bawlte, gilou leh thangse zing a umte, kihdahhuaite, huleh khat leh khat kimudahte i na hi uhi.

⁴Hizongleh mihing tunga i Hundampa uh Pathian chitna leh lungsiatna ahung kilat nungin,

⁵Dihtatna natoh, eiuh bawlte jiah hilou in, pianthahna silna leh, Hagau Siangthou siamthah kiitna in, a khotuahna dungjuiin ahung hundamta hi;

⁶Hu Hagau Siangthou chu Jesu Khrist i Hundampa uh jalin i tungvah naahpitahin ahung leihbua hi.

⁷A hehpihna a siamtansah a um in kumtuang hinna kinepna dungjuiin gouluahtu diing a siamin i um ngei diing uhi.

⁸Pathian gingtasate’n sil hoih bawl zing diing ngaihtuah u’heh chih thu hi a ginum ahi, huleh hi thute chu khauhtaha na soi zing ka deih hi. Hite chu mihing diingin a hoih a, huleh a phatuam hi.

⁹Hizongleh thudoh ngolhuaite leh khang thu suutte leh, kinialnate leh, daanthua kikalhnate chu kiheimangsan in; ajiahchu hute hi sil phatuamlou leh bangmahlou ahi.

¹⁰Gindan dihlou nei mi chu khatvei nihvei na hilh nungin nual in.

¹¹Huchibang mi chu a sia in, a sual a, amah leh amah siamlouh kitangsah ahi chih na he hi.

¹²Artema aha, Tikika aha na kawma ka hung sawl chiangin Nikopoli khua ah ka kawmah hung teitei tum in; ajiahchu hu munah phalbi sung um ka tum hi.

¹³Zena, daanhetu leh, Apollo a khualzinna va bangmah a taahsap louhna diingun phatuamngaitahin hung pui in.

¹⁴Huleh eimah mite zong gahlou a, a um louhna diingun a poimohna a zat diing sil hoih bawl zing diingin kizilsah in.

¹⁵Ka kawma umte zousiah in nang chibai ahung buuh uhi. Ginna a ei hung lungsiatte chibai na buuh in. Na bawnva kawmah hehpihna um hen. Amen.