Read Simte HEBRAITE 4 Bible Online

HEBRAITE 4 - Simte bible

HEBRAITE 4

¹Hujiahin i lau diing uh, huchilou inchu a khawldamna a luutna diing thuchiam um zing napi in, na lahva mi khattou chinglou bangin na umkha diing uhi.

²Bang jiahin ahiai i chih leh amahuh kawm a soi a hihbangin, tanchinpha chu i kawma soi ahi a; hizongleh a thu jatute a ginna toh a kizop louh jiahin, a thu jahte u’chu amahun a phattuampih sih uhi.

³Bang jiahin ahiai i chih leh eiuh a gingtasate chu khawldamna ah i luut uhi, Ka lungthah a ka kihaahsial bangin, leilung siam chiil apat nnate tohzohsa hita mahleh, ka khawldamna ah a luut sih diing uh, chia a soi bangin.

⁴Ajiahchu ama’n mun khat ah ni sagihni thu hichibangin a soi hi, Huleh Pathian in ni sagihni in a natoh zousiah a khawlsanta, chi'n.

⁵Huleh hi munah, Ka khawldamna a, a luut taah uleh, a chih kiit hi.

⁶Hujiahin mi khenkhat khawldamna a, a luut diing uh thuchiam a um naahlai jiah leh, nidang a tanchinpha soi masatnate gintaatlouhna jiaha a luut louh jiahin;

⁷Hun sawttah nungin David zangin, Tuni, chi'n, bang ni ahakhat a guat kiit a, Tuni a a aw na jah uleh, na lungtang uh khauhsah sih un, chi a kisoi bangin.

⁸Ajiahchu Joshua in amahuh na khawldamsahta hileh, hunungin ama’n ni dang thu a soi sih diing hi.

⁹Hujiahin Pathian mite a diingin khawldamna khat a um nalai hi;

¹⁰Ajiahchu Pathian a natohna apat a khawldam bangin, amah khawldamna a luut in zong a natohte apat a tawpta ahi.

¹¹Hujiahin hu khawldamna a luut diingin i hahpan diing uh, huchilou inchu mi khattou hu gintaatlouhna etsahna bang a um in a puuhkha diing hi.

¹²Ajiahchu Pathian thu chu a hing a, sil a bawlthei a, namsaau hiamtuah sangin a hiamzaw a, hinna leh hagau, huleh guhtuah leh chintuiguh khen thei khopin a sun thei a, lungtang a ngaihtuahte leh tupte hekhentu ahi.

¹³Silsiam khat mah amah mitmuha kilang lou mawngmawng a um sih a; a kawma i tanchin i tutna diingpa mitmuh a’chu bangkim saguah leh kihongsa ahi.

¹⁴Huchi'n vaante haw a paisuaah Siampu Lal loupitah, Jesu Pathian Tapa i neih jiahin i thugin uh i pomkip diing uhi.

¹⁵Ajiahchu i haatlouhnate uh hung thuaahpih pha lou Siampu Lal nei i hi sih a; himahleh eihaw banga lam chintenga heemna tuaahsa, sual ahihleh sual lou, nei i hi zaw uhi.

¹⁶Hujiahin khotuahna i tan theihna diing uleh, taahsap hun chianga panpihna diinga hehpihna i muh theihna diingun, haangsantahin hehpihna laltouphah chu i naih diing uhi.