Read Simte HEBRAITE 6 Bible Online

HEBRAITE 6 - Simte bible

HEBRAITE 6

¹Hujiahin Khrist thubulte chu nusia in, pichinlam i manoh diing uh; silbawl sisa apat kisiihnate, Pathian lam a ginnate,

²Baptisma thute leh, khutngah thute leh, misi thohkiitna thute leh, kumtuang vaihawmna lam thuhilhnate chu bulphuh kiit nawnlou in.

³Huleh Pathian in pha a sah inchu hichibang i bawl ngei diing uhi.

⁴Bang jiahin ahiai i chih leh khatvei suhvaah a um a, vaan silpiah chiamta a, Hagau Siangthou tansah a um a,

⁵Huleh Pathian thu hoih leh hun hung um diing a silbawltheihnate chiam haw chu,

⁶A puuh va ahihleh, hute chu kisiih diing a siamthah gual ahi sih uhi; Pathian Tapa chu amahuh tuma kikilhbeh thah leh sumualphou ahihjiahun.

⁷Ajiahchu lei, a tung a ju guahtui na dawnin, amahuh diing a lou na kihohte diinga anteh louhing neehtheih hung suah in, Pathian apat vangpiahna a mu hi.

⁸Hizongleh lingkung leh hampa lingnei suahdoh chu deih louh in a um a; huleh haamse dong phial in a um hi; a tawpna chu mei a haal ahi.

⁹Hizongleh, deihtahte, huchibangin soi mah le’ung, nangun chu huchibang silte sang a hoihzaw leh hutdamna toh kithuahkhawm silte na bawl uh ka hung gingta uhi.

¹⁰Ajiahchu a min a na natoh uleh, na lungsiatna suhlat uh, misiangthoute na natohsah va, huleh tua zong na toh zing u’chu mangngilh diingin Pathian chu a dihtatlou sih hi.

¹¹Huleh nanguh kuapouh in, kinepna heetchi ana kim tang diingin, a tawp dongin thanop suah chiat leh u’chin ka hung deih mahmah uhi.

¹²Na kithahdah louh va, ginna leh kuhkalna jiaha thuchiam gouluahtute umdan juitute na hih uh ka hung deih uhi.

¹³Bang jiahin ahiai i chih leh Pathian in Abraham kawma thu a chiam laiin, amah sang a lian zawa a kihaahsial theih louh jiahin, amah le amah in a kihaahsial a,

¹⁴Tahzetin vang ka hung pe diing a, suhpung zong ka hung supung diing hi, chi'n.

¹⁵Huchi'n ama’n kuhkaltaha a thuaah mualsuaah nungin silchiam chu a muta hi.

¹⁶Bang jiahin ahiai i chih leh mihingte chu amahuh sanga lianzaw in a kihaahsial veu uh; huleh thu namdetna diing a kihaahsialna chu amahuh diingin kinialna zousiah suhtawpna ahi.

¹⁷Hubangin Pathian in silchiam luah diingte kawmah a lunggel kihenkit theih louhdan nasatah a ensah nuam in, huchu kihaahsialna in a sukipta hi.

¹⁸Huchu Pathian zuauthei ahih louhna kihengkiit thei lou sil nihte jiaha, eiuh kihumbitna diinga i ma a kinepna kikoih tu diinga taite’n hasotna nasatah i neihna diingun ahi.

¹⁹Hu kinepna chu hinna siihka kipin i nei a, chiantah leh kiptah, huleh puanjah sunga luut chu ahi.

²⁰Huah chu Jesu Melkisedek umdan bang a kumtuang a siampu lal a siam in, eiuh diing a ma puitu in ana luut masata hi.